දින 3 කදී ඒකක 1,160 කින් කොටස් වෙළෙඳපොළ පසුබසී

අඛණ්ඩ තෙවෙනි දිනයටත් කොළඹ කොටස් වෙළෙඳපොළේ දැවැන්ත පහළ යාමක් අද (30) දිනයේ දී වාර්තා විය.

ඒ අනුව සියලු කොටස් මිල දර්ශකය ඒකක 352.66 කින් සහ S&P SL20 දර්ශකය ඒකක 141.84 කින් දිනය තුළ දී පහළ යන ලදී.

දිනය අවසානයේ දී සියලු කොටස් මිල දර්ශක අගය ඒකක 9,294.89 ක් ලෙසින් සටහන් වූ අතර එය 2021 සැප්තැම්බර් 28 දිනෙන් පසු වාර්තා වූ පහළම අගය වේ.

S&P SL20 දර්ශකය ඒකක 3,196.19 ක් ලෙසින් සටහන්ව තිබේ.

රු. බිලියන 3.29 ක ගනුදෙනු පිරිවැටුමක් අද දින වාර්තා විය.

අද දින අවස්ථා දෙකක දී කොටස් වෙළෙඳපොළ ගනුදෙනු අත්හිටුවීමක් වාර්තා වූ අතර S&P SL20 දර්ශකය පෙර දිනයට සාපේක්ෂව 5% ක් හා 7.5% ක් බැගින් අවස්ථා දෙකක දී පහළ යාම හේතුවෙන් එලෙස මිනිත්තු 30 බැගින් වූ කාලසීමාවන් සඳහා ගනුදෙනු අත්හිටුවනු ලැබිණි.

මෙම සතියේ ආරම්භක ගනුදෙනු දිනය වූ මාර්තු 28 සඳුදා දිනයේ දී ඒකක 313.03 කින් සියලු කොටස් මිල දර්ශකය පහළ ගිය අතර ඊයේ (29) දිනයේ දී ඒකක 494.74 ක පහළ යාමක් වාර්තා විය.

මේ අනුව දින තුනක දී ඒකක 1,160.43 කින් කොටස් වෙළෙඳපොළ කඩා වැටී තිබේ.

The post දින 3 කදී ඒකක 1,160 කින් කොටස් වෙළෙඳපොළ පසුබසී appeared first on Adaderana Biz Sinhala | Sri Lanka Business News.