ජූනි මාසයේ දී උද්ධමනයේ වෙනසක් නැහැ

ජාතික පාරිභෝගික මිල දර්ශකයෙහි (ජා.පා.මි.ද., 2013=100) වාර්ෂික ලක්ෂ්‍යමය වෙනස මගින් මනිනු ලබන මතුපිට උද්ධමනය, 2021 ජුනි මාසයේ දී සියයට 6.1හි නොවෙනස්ව පැවතුණු අතර, මේ සඳහා 2020 ජුනි මාසයේ පැවති ඉහළ පදනම් අගය මගින් ඇති වූ සංඛ්‍යානමය බලපෑම හේතුවිය. මේ අතර, ආහාර කාණ්ඩයෙහි වාර්ෂික ලක්ෂ්‍යමය උද්ධමනය 2021 මැයි මාසයේ දී පැවති සියයට 10.3 හි සිට 2021 ජුනි මාසයේ දී සියයට 9.8 දක්වා පහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය 2021 මැයි මාසයේ පැවති සියයට 2.5හි සිට 2021 ජුනි මාසයේ දී සියයට 2.9 දක්වා ඉහළ ගියේය.

වාර්ෂික සාමාන්‍ය පදනම මත මනිනු ලබන ජා.පා.මි. දර්ශකයෙහි වෙනස, 2021 ජුනි මාසයේ දී සියයට 5.4හි නොවෙනස්ව පැවතුණි.

2021 ජුනි මාසයේ දී ජා.පා.මි. දර්ශකයෙහි මාසික වෙනස 1.45ක් ලෙස වාර්තා වූ අතර, ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ ඉහළ යෑම් මේ සදහා හේතු විය. තවද, ආහාර සහ ආහාර නොවන කාණ්ඩවල මාසික වෙනස්වීම් පිළිවෙළින්, සියයට 1.23ක් සහ සියයට 0.22ක් ලෙස වාර්තා විය. ඒ අනුව, 2021 ජුනි මාසයේ දී ආහාර කාණ්ඩයේ, ප්‍රධාන වශයෙන්, සහල්, එළවළු, පොල්තෙල් සහ නැවුම් මත්ස්‍ය මිල ගණන්වල ඉහළ යෑමක් දක්නට ලැබුණි. තවද, ප්‍රධාන වශයෙන් ප්‍රවාහන (පෙට්‍රල් සහ ඩීසල්) යන උප කාණ්ඩයේ මිල ගණන්හි සිදුවූ ඉහළ යෑම් හේතුවෙන්, ආහාර නොවන කාණ්ඩයෙහි අයිතමවල මිල ගණන්හි ඉහළ යෑමක් 2021 ජුනි මාසයේ දී වාර්තා විය.

තවද, වාර්ෂික ලක්ෂ්‍යමය පදනම මත මූලික උද්ධමනය 2021 මැයි මාසයේ දී පැවති සියයට 4.2හි සිට 2021 ජුනි මාසයේ දී සියයට 4.1 දක්වා සුළු වශයෙන් පහළ ගිය අතර, වාර්ෂික සාමාන්‍ය මූලික උද්ධමනය 2021 ජුනි මාසයේ දී සියයට 4.4හි නොවෙනස්ව පැවතුණි.

The post ජූනි මාසයේ දී උද්ධමනයේ වෙනසක් නැහැ appeared first on Adaderana Biz Sinhala | Sri Lanka Business News.