අද (13) දින පාර්ලිමේන්තුවේ දී වාචික පිළිතුරු අපේක්ෂාවේ මිලාන් ජයතිලක මන්ත්‍රීවරයා අසන ලද ප්‍රශ්නයකට පිළිතුරු ලබා දෙමින් අමාත්‍යවරයා මේ බව අනාවරණය කළේය.
මෙරට යටිතල පහසුකම් සංවර්ධන ව්‍යාපෘති ක්‍රියාත්මක කිරීම සඳහා හංගේරියාවේ එක්සිම් බැංකුව හරහා සහන මූල්‍ය පහසුකම් සැපයීමට ශ්‍රී ලංකාව හා හංගේරියාව අතර මූල්‍ය සහයෝගීතා ගිවිසුමකට එළඹීමෙන් අනතුරුව ඒ යටතේ කොහුවල සහ ගැටඹේ ගුවන් පාලම් ඉදිකිරීමේ ව්‍යාපෘතීන් ආරම්භ කෙරුණි.
මේ සම්බන්ධයෙන් ප්‍රතිචාර දැක්වූ ප්‍රවාහන අමාත්‍ය බන්දුල ගුණවර්ධන මහතා,
අපි කොන්ත්‍රාත්කරුවන්ට ගෙවිය යුතු ඉතා විශාල බිල්පත් ප්‍රමාණයක් නිරවුල් කරලා නැහැ. ඒ නිරවුල් කිරීමේ කටයුත්ත මේ දිනවල කරගෙන යනවා. ලක්ෂ 50ට අඩු සියලු දෙනාගේ ගෙවීම් ගෙවලා අවසන් කරලා තියෙන්නේ.
අධිවේගී මාර්ග ව්‍යාපෘති ආරම්භ කරලා තියෙන ඒවාට කලින් අත්සන් කරලා තියෙන ගිවිසුම් ප්‍රකාරව තමයි කටයුතු කරන්න වෙන්නේ. මේ සඳහා මූල්‍ය සපයා ගැනීම සඳහා රජයත් ඒ සඳහා අදාළ ආයෝජකයනුත් සමඟ ගිවිසුම්වලට එළඹිලා තියෙනවා. අධිකරණ කටයුතු ඉක්මනින් නිම කරලා පුළුවන් තරම් ඉක්මනට මේ ණය ප්‍රතිව්‍යූහගතකරණ ක්‍රියාවලියෙන් පස්සේ තමයි මේ යෝජනා ක්‍රම ආරම්භ කරන්න පුළුවන් වෙන්නේ.
උදාහරණයක් වශයෙන් වෙනත් විදේශ ආධාර යටතේ ආරම්භ කරලා තියෙනවා කොහුවල හන්දියේ ගුවන් පාලමක්. ඊළඟට ගැටඹේ ගුවන් පාලමක්. මේක වෙන විදේශ ආධාරයක් යටතේ ආරම්භ කරලා තියෙන්නේ. මහා මාර්ගය ඉදිරිපිට ඔක්කෝම කණු දාලා තියෙනවා. අපි ණය ගෙවන්න බැරි බංකොලොත් රටක් කිව්වට පස්සේ ඒ අනෙක් ගිවිසුමුත් ඔක්කෝම නතර වෙලා තියෙනවා.
ඉතිං ඒ නිසා මේ ණය ප්‍රතිව්‍යූහගතකරණය කර ගත්තේ නැත්නම් ආණ්ඩුව කාගේ තිබුණත් කවුරු අමාත්‍යධූරය දැරුවත් මේ කිසිදෙයක් කරන්න බැහැ, මේ ණය ප්‍රතිව්‍යූහගතකරණය කර ගෙන අර්බුදය විසඳා ගත්තේ නැත්නම්. ඒක තමයි තියෙන ජාතික ප්‍රශ්නය. අපි ඒ ප්‍රශ්නය විසඳා ගැනීම සඳහා සක්‍රීය ලෙස දායක වෙනවා.
දැනට ජාත්‍යන්තර මූල්‍ය අරමුදල සමඟත්, ඊළඟට අනෙක් ණය ගිවිසුම් සමඟත්, ආයෝජනයන් සමඟ ඇති කර ගෙන තිබෙන සියල්ල අත්හිටවෙලා තිබෙන්නේ. ඒක නිසා ඒ ගැටළුව අපි හිතනවා ලබන වර්ෂය මුල වෙන කොට විසඳා ගන්න පුළුවන් වෙයි.
එයින් පස්සේ තමයි අනෙක් කටයුතු ගැන සාකච්ඡා කරන්න පුළුවන්කම ඇත්වෙන්නේ.
ඡායාරූපය – රාජගිරිය ගුවන් පාලම
The post කොහුවල ගුවන් පාලම ණය ප්‍රතිව්‍යූහගතකරණයෙන් පසු – ඇමති බන්දුල appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka