කොමර්ෂල් බැංකුවේ තුන්වැනි ‘අරුණළු සිත්තම්’ සම්මාන උත්සවයේදී, රුපියල් මිලියන 3ක ත්‍යාග ළමා චිත‍්‍ර ශිල්පීන්ට පිරිනමයි

ශ‍්‍රී ලංකාවේ දක්‍ෂතම ළමා චිත‍්‍ර ශිල්පීන් පිරිසක් සහ ඔවුන්ගේ දෙමවුපියන් පසුගියදා කොමර්ෂල් බැංකුවේ ‘අරුණළු සිත්තම් 2022’ සම්මාන උත්සවයට සහභාගී විය. ‘අරුණළු සිත්තම්’ චිත‍්‍ර තරගයේ ජයග‍්‍රාහකයින් ඇගයීම සඳහා කොමර්ෂල් බැංකුව විසින් මෙම උත්සවය සංවිධානය කරනු ලබන අතර, මෙම තරගය සඳහා දිවයින පුරා සිටින සිසුන්ගෙන් චිත‍්‍ර නිර්මාණ 11,000කට අධික සංඛ්‍යාවක් ලැබී තිබිණි.

මෙම ‘අරුණළු සිත්තම්’ චිත‍්‍ර තරග සම්මාන ප‍්‍රදානෝත්සවයේදී බැංකුව විසින් දරුවන් 137 දෙනෙකුට රුපියල් මිලියන 03ක මුදල් ත්‍යාග පිරිනමන ලද අතර, ඉන් අනතුරුව චිත‍්‍ර වැඩමුළුවක්ද පවත්වන ලදී. මහාචාර්ය සුසිරිපාල මාලිම්බොඩ මහතාගේ ප‍්‍රධානත්වයෙන් යුත් විනිශ්චය මණ්ඩලය විසින් පවත්වන ලද මෙම වැඩමුළුව සඳහා, නවතම තරගාවලියේ ජයග‍්‍රාහකයින් 100කට ආසන්න පිරිසක් සහභාගී විය. වැඩමුළුවට සහභාගීවන්නන්ට ඔවුන්ගේ කලාව වැඩිදියුණු කළ හැකි ශිල්පීය ක‍්‍රම පිළිබඳව අගනා අවබෝධයක් ලබාදීම නිසා එම දිනය වඩාත් මතකයේ රැඳුණු බව බැංකුව පවසයි.

2022 සැප්තැම්බර් 01 සිට ඔක්තෝබර් 31 දක්වා පවත්වන ලද තෙවැනි ‘අරුණළු සිත්තම්’ චිත‍්‍ර  තරගය කාණ්ඩ පහක් යටතේ වයස අවුරුදු 04 සිට 16 දක්වා ළමුන් සඳහා විවෘත විය. කොමර්ෂල් බැංකුවේ ජනප‍්‍රිය ළමා ඉතුරුම් ගිණුමක් වන ‘අරුණළු’ සන්නාමය යටතේ පවත්වන ලද මෙම තරගය සඳහා, www.arunalusiththam.lk යන වෙබ් අඩවිය වෙත පිවිසීමෙන් පසුව තම චිත‍්‍ර නිර්මාණ අප්ලෝඞ් කරන ලෙස ළමා චිත‍්‍ර ශිල්පීන්ට ආරාධනා කරන ලදී.

බැංකුව පෙර පාසල් කාණ්ඩයේ විශිෂ්ට කුසලතා ඇති තරගකරුවන් 25 දෙනෙකුට රුපියල් 10,000 බැගින් මුදල් ත්‍යාග සහ සහතිකපත් පිරිනැමීය. මෙම කාණ්ඩයේ තවත් සහභාගීවන්නන් 50 දෙනෙකු කුසලතා සහතිකද ලබා ගත්හ. තවද ප‍්‍ර‍්‍රාථමික, පශ්චාත් ප‍්‍රාථමික, කණිෂ්ඨ සහ ජ්‍යෙෂ්ඨ යන කාණ්ඩවල ප‍්‍රථම ස්ථානය දිනාගත් චිත‍්‍ර නිර්මාණ සඳහා රුපියල් 100,000 බැගින් මුදල් ත්‍යාග ප‍්‍රදානය කරන ලද අතර, එම කාණ්ඩයන්හි දෙවැනි සහ තෙවැනි ස්ථාන සඳහා පිළිවෙලින් රුපියල් 75,000 සහ රුපියල් 50,000 බැගින් මුදල් ත්‍යාග පිළිවෙලින් හිමිවිය. මීට අමතරව එම කාණ්ඩවල විශිෂ්ට කුසලතා සම්මාන හිමිවූ තරගකරුවන් 25 දෙනෙකුට රුපියල් 10,000 බැගින් මුදල් ත්‍යාග පිරිනමන ලදී. එසේම තවත් තරගකරුවන් 200 දෙනෙකුට කුසලතා සහතිකද පිරිනමන ලදී. කොමර්ෂල් බැංකුවේ කළමණාකාර අධ්‍යක්‍ෂ සහ ප‍්‍රධාන විධායක නිලධාරී සනත් මනතුංග සහ ප‍්‍රධාන මෙහෙයුම් නිලධාරී එස්. ප‍්‍රභාගර් යන මහත්වරුන් සහ ආයතනික කළමණාකාරිත්වයේ නියෝජිතයින් ‘වෝටර්ස් එජ්’ හෝටලයේ පැවැති මෙම උත්සවයට එක්ව සිටියහ.

සේයාරුවෙන් දැක්වෙන්නේ කොමර්ෂල් බැංකුවේ කළමණාකාර අධ්‍යක්‍ෂ හා ප‍්‍රධාන විධායක නිලධාරී සනත් මනතුංග මහතා (වමේ) උත්සව සභාව අමතන අයුරු සහ (දකුණේ) ‘අරුණළු සිත්තම්’ චිත‍්‍ර තරගයේ ජයග‍්‍රාහකයින්, බැංකුවේ ආයතනික කළමණාකාරිත්වයේ ජ්‍යෙෂ්ඨ නිලධාරීන් සහ විනිශ්චය මණ්ඩලයේ සාමාජිකයන්ද සහභාගී වූ අයුරුයි.

The post කොමර්ෂල් බැංකුවේ තුන්වැනි ‘අරුණළු සිත්තම්’ සම්මාන උත්සවයේදී, රුපියල් මිලියන 3ක ත්‍යාග ළමා චිත‍්‍ර ශිල්පීන්ට පිරිනමයි appeared first on Adaderana Biz Sinhala | Sri Lanka Business News.