කොටස් වෙළෙඳපොළ වාර්තා යළි අලුත් වෙයි. අද පිරිවැටුම රු. බිලියන 16 ඉක්මවයි

අද (27) දින කොළඹ කොටස් වෙළෙඳපොළ මිල දර්ශකයන් හි ගනුදෙනු ආරම්භයේ පටන් ඉහළ උච්ඡාවචනයන් නිරීක්ෂණය කළ හැකිවිය. බොහෝ ආයෝජකයින් බලාපොරොත්තු වූ පරිදි ගනුදෙනු ආරම්භ වී මිනිත්තු කිහිපයක් ඇතුළත සියලු කොටස් මිල දර්ශකය ඒකක 9,000 සීමවා පසු කර ගිය ද වැඩි කාලයක් ඒම මට්ටමේ රැඳී සිටීමට ඊට අවකාශ නොලැබිණි. දිනයේ ගනුදෙනු කාලපරිච්ඡේදය තුළ දී ඒකක 9,000 සීමාව ඉක්මවා සියලු කොටස් මිල දර්ශකය ඉහළ ගිය දෙවන දිනය අදයි. මීට පෙර මෙම වසරේ ජනවාරි 29 දින ඉතිහාසයේ පළමු වරට සියලු කොටස් මිල දර්ශකය ඒකක 9,000 සීමාව පසු කර ගොස් තිබුණි.

කෙසේවෙතත් දිනයේ ගනුදෙනු අවසානයේ දී පෙර දිනයට සාපේක්ෂව ඒකක 10.62 කින් සියලු කොටස් මිල දර්ශකය ඉහළ ගොස් ඒකක 8,931.33 ක් ලෙසින් දැක්වුණු අතර ඒය මෙතෙක් ඉතිහාසයේ ගනුදෙනු දිනයක් අවසානයේ දී සටහන් වූ ඉහළම සියලු කොටස් මිල දර්ශකය අගය වනු ඇත.

මේ අතර රු. බිලියන 16.48 ද දැවැන්ත ගනුදෙනු පිරිවැටුමක් අද දින වාර්තා වීම ද විශේෂත්වයකි. මේ අනුව 2021 වසරේ අද දිනය දක්වා රු. බිලියන 634.54 ක වාර්ෂික වෙළෙඳපොළ පිරිවැටුමක් වාර්තා වී තිබෙන අතර ඒය ‌මෙතෙක් ඉතිහාසයේ ‌කොටස් වෙළෙඳපොළෙන් වාර්තා වූ ඉහළම වාර්ෂික වෙළෙඳපොළ පිරිවැටුම් වටිනාකමයි.

අද දිනයේ ගනුදෙනු අවසානයත් සමඟ සමස්ත වෙළෙඳපොළ ප්‍රාග්ධනීකරණය රු. බිලියන 3,979.92 ක් ලෙසින් සටහන් වන අතර ඒය මෙතෙක් ශ්‍රී ලංකා ඉතිහාසයේ කොටස් වෙළෙඳපොළ වාර්තා කර ඇති ඉහළම ප්‍රාග්ධනීකරණය වටිනාකම වේ. අද වන වෙළෙඳපොළ ප්‍රාග්ධනීකරණය අතින් අංක 01 ඒක්ස්පෝලංකා හෝල්ඩිංග්ස් වෙත හිමිව ඇත්තේ රු. බිලියන 291 කට හිමිකම් කියමිනි. ඒසේම දෙවන ස්ථානයේ පසුවන LOLC හෝල්ඩිංග්ස් හි වෙළෙඳපොළ ප්‍රාග්ධනීකරණය රු. බිලියන 271 ඉක්මවා තිබේ. මේ පිළිබඳ සටහනක් පහතින් දැක්වේ.

සියලු කොටස් මිල දර්ශකය ‌වෙනුවෙන් අද දිනයේ දී ඉහළම දායකත්වය ලබා දුන් සමාගම් පහතින් දැක්වේ.

The post කොටස් වෙළෙඳපොළ වාර්තා යළි අලුත් වෙයි. අද පිරිවැටුම රු. බිලියන 16 ඉක්මවයි appeared first on Adaderana Biz Sinhala | Sri Lanka Business News.