කොටස් වෙළෙඳපොළේ දරුණු පසුබැස්මක්

කොළඹ කොටස් වෙළෙඳපොළ මිල දර්ශකයන් හි විශාල කඩා වැටීමක් අද (05) දිනයේ වාර්තා විය. පෙර දිනය හා සැසඳීමේ දී අද දින ගනුදෙනු අවසානයේ දී සියලු කොටස් මිල දර්ශක අගය ඒකක 198.37 කින් හෙවත් 2.42% කින් පහළ ගිය අතර S&P SL20 දර්ශකය ඒ්කක 76.93 ක් හෙවත් 2.47%ක පහළ යාමක් වාර්තා කළේය.

මේ අනුව දිනය අවසානයේ සී සියලු කොටස් මිල දර්ශකය ඒකක 8,011.94 ක් හා S&P SL20 දර්ශකය ඒකක 3,033.04 ක් ලෙසින් සටහන්ව තිබුණි.

කොළඹ කොටස් වෙළෙඳපොළ නිල වෙබ් අඩවියට අනුව පසුගිය දින‌ කිහිපයේ දී කැපී පෙනෙන මිල ඉහළයාම් වාර්තා කළ LOLC, ඒක්ස්පෝලංකා, බ්‍රවුන්ස් ඉන්වෙස්ට්මන්ට්ස්, වැලිබල් වන් සහ රෝයල් සෙරමික් යන සමාගම්වල කොටස් මිල පහළ යාම්, සියලු කොටස් මිල දර්ශකයේ පහළ යාමට වැඩි වශයෙන් හේතු වී තිබේ.

මේ අතර අද දිනයේ දී සියලු කොටස් මිල දර්ශකයට ධනාත්මක දායකත්වයක් ලබා දී ඇති සමාගම් ගණන 24 ක් පමණක් වන අතර සමාගම් 187 කම කොටස් මිල පහළ යාම ඊට සෘණාත්මක අයුරින් බලපා ඇත.

යළිත් වරක් රට තුළ කොවිඩ්-19 අධි අවදානම් තත්ත්වයක් වර්ධනය වෙමින් පැවතීම හමුවේ ආයෝජකයින් තුළ යම් අවිනිශ්චිතතාවයක් ඇතිවී තිබීම මෙලෙස කොටස් වෙළෙඳපොළ කඩාවැටීමට ආසන්නතම හේතුව බව වෙළෙඳපොළ විශ්ලේෂකයින්ගේ අදහසයි. කෙසේ වෙතත් මීට පෙර අවස්ථා කිහිපයකදීම මෙවැනි කොවිඩ් රැලි හමුවේ වෙළෙඳපොළ කඩා වැටීම් වාර්තා වුවද මෙය තාවකාලික තත්ත්වයක් වනු ඇති බවට ඔවුන් වැඩිදුරටත් පෙන්වා දේ.

අද දින සමස්ත ගනුදෙනු පිරිවැටුම රුපියල් බිලියන 5.06 ක් වේ.

The post කොටස් වෙළෙඳපොළේ දරුණු පසුබැස්මක් appeared first on Adaderana Biz Sinhala | Sri Lanka Business News.