කෙන්යා ‘තේ‘ ගනුදෙනුව ගැන බ්‍රවුන්ස් ඉන්වෙස්ට්මන්ට්ස් සමාගමෙන් නිවේදනයක්

බ්‍රවුන්ස් ඉන්වෙස්ට්මන්ට්ස් පීඑල්සී විසින් පසුගිය දා ගිවිසුම්ගත වී තිබෙන සමාගම් අත්පත් කර ගැනීම සම්බන්ධයෙන් කොළඹ කොටස් වෙළෙඳපොළ වෙත නිල නිවේදනයක් නිකුත් කර ඇත.

එහි සඳහන් වන පරිදි බ්‍රවුන්ස් ඉන්වෙස්ට්මන්ට්ස් පීඑල්සී හි අනුබද්ධිත සමාගමක් වන B Commodities ME FZE UAE විසින් 2023 මැයි 03 දින ස්කොට්ලන්ත ලියාපදිංචියක් සහිත සමාගමක් වන James Finlay Limited සමඟ ගිවිසුමකට එළඹ තිබේ. ඒ James Finlay (Kenya) Limited 85% ක කොටස් හිමිකාරීත්වය අත්පත් කර ගැනීම වෙනුවෙනි.

James Finlay (Kenya) Limited තේ වැවිලි අංශය හෙක්ටයාර 11,000 ක ප්‍රමාණයකින් යුක්ත වන අතර වාර්ෂිකව තේ කිලෝග්‍රෑම් මිලියන 30 ක් නිෂ්පාදනය කරනු ලබයි.

බ්‍රවුන්ස් ඉන්වෙස්ට්මන්ට්ස් පීඑල්සී ශ්‍රී ලංකාවේ විශාලතම තේ නිෂ්පාදන සමාගම්වලින් එකක් වන අතර මතුරට ප්ලාන්ටේෂන්ස් ලිමිටඩ්, උඩුපුස්සැල්ලාව ප්ලාන්ටේෂන්ස් පීඑල්සී සහ හපුගස්තැන්න ප්ලාන්ටේෂන්ස් පීඑල්සී හරහා එය වතු 49 ක් කළමනාකරණය කරනු ලබන බව අදාළ නිවේදනයේ වැඩිදුරටත් සඳහන් වේ.

බ්‍රවුන්ස් ඉන්වෙස්ට්මන්ට්ස් සමාගමේ මෙම නිවේදනය නිකුත් කෙරෙන තෙක් අද (08) පෙරවරු 10.50 දක්වා එම සමාගමේ කොටස් ගනුදෙනු අත්හිටුවීමට කොළඹ කොටස් වෙළෙඳපොළ තීරණය කර තිබුණි.

The post කෙන්යා ‘තේ‘ ගනුදෙනුව ගැන බ්‍රවුන්ස් ඉන්වෙස්ට්මන්ට්ස් සමාගමෙන් නිවේදනයක් appeared first on Adaderana Biz Sinhala | Sri Lanka Business News.