එක්ස්පෝලංකා තවත් ඇමරිකානු සමාගමක් මිල දී ගනී. ආයෝජනය ඩොලර් මිලියන 9 ක්

කොළඹ කොටස් වෙළෙඳපොළේ විශාලතම ලැයිස්තුගත සමාගම බවට පසුගිය දා පත් වූ එක්ස්පෝලංකා හෝල්ඩිංග්ස් පීඒල්සී විසින් IDEA Logistics LLC සහ ඒම සමූහයේ සමාගම් මිල දී ගෙන ඇති බව නිවේදනය කර සිටී.

Expolanka Holdings PLC හි පූර්ණ අනුබද්ධ සමාගම් දෙකක් වන EFL Global Logistics (Pte.) Ltd (Singapore) හා EFL Global LLC (USA) විසින් මෙලෙස IDEA Logistics LLC සමූහයේ 100% ක කොටස් හිමිකාරීත්වය අත්පත් කර ගෙන ඇත.

2021 අගෝස්තු 10 දින සිදුව ඇති මෙම ගනුදෙනුව සඳහා ආයෝජනය කර ඇති මුදල ආමරිකානු ඩොලර් මිලියන 9.7 කි.

එක්සත් ජනපදය මූලස්ථානය කරගත් මධ්‍යම ඇමරිකානු ‌ලොජිස්ටික් සමාගමක් වන IDEA Logistics LLC සිය ඇමරිකානු ගනුදෙනුකරුවන් හට Freight Forwarding, Warehousing හා Trucking services යනාදී සේවාවන් සලසනු ලබයි.

මේ සම්බන්ධයෙන් ඒක්ස්පෝලංකා හෝල්ඩිංග්ස් වැඩිදුරටත් පවසන්නේ මෙම අත්පත් කර ගැනීම වැදගත් උපාය මාර්ගික මුලපිරීමක් වන බවත්, එක්ස්පෝලංකා හට සිය මෙහෙයුම් මධ්‍යම ඇමරිකාව දක්වා ව්‍යාප්ත කිරීමට හැකි වනු ඇති බවත් ය.

මේ අතර 2021 මාර්තු 01 දින එක්ස්පෝලංකා හෝල්ඩිංග්ස් පීඑල්සී හි පූර්ණ හිමිකාරීත්වය දරන සමාගමක් වන ඇමරිකා එක්සත් ජනපදයේ EFL Global LLC විසින් එරට ලොජිස්ටික්ස් ව්‍යාපාරයේ නිරත සමාගම් 3 ක් මිල දී ගැනීමට කටයුතු කර තිබුණි. මේ සඳහා ආයෝජනය කළ මුළු මුදල ඇමරිකානු ඩොලර් මිලියන 2.2 කි. Seville Container Freight Station Inc., Seville Freight Systems Inc., සහ Seville Transfer Ltd යන සමාගම් තුනේ 100%ක කොටස් හිමිකාරීත්වය මේ අනුව EFL Global LLC විසින් අත්පත් කර ගෙන තිබේ. Seville යනු එක්සත් ජනපදයේ ජෝන් එෆ්. කෙනඩි ගුවන් තොටුපළ තුළ උපක්‍රමික වශයෙන් ඉහළ වැදගත්කමකින් යුතු බන්ධිත බහාලුම් නැව් බඩු මධ්‍යස්ථානයකින් (Bonded Container Freight Station) හා බන්ධිත ට්‍රක් (Bonded Trucking) සේවා සැපයුම් සමාගමකින් සමන්විත වූවකි. සමාගමේ කටයුතු තවදුරටත් පුළුල් වූයේ ඒයාකාරයෙනි.

මේ අතර ඊයේ දිනයේ දී ඒක්ස්පෝලංකා හෝල්ඩිංග්ස් කොටසක මිල රු. 150.00 සීමාව පසුකර ගියේය. ඒය පසුගිය මාස 03 තුල දී පමණක් 300%කින් වර්ධනය වී තිබීම විශේෂත්වයකි.

 

The post එක්ස්පෝලංකා තවත් ඇමරිකානු සමාගමක් මිල දී ගනී. ආයෝජනය ඩොලර් මිලියන 9 ක් appeared first on Adaderana Biz Sinhala | Sri Lanka Business News.