එක්සත් ජාතීන්ගේ ආහාර හා කෘෂිකර්ම සංවිධානය ජපාන අරමුදල් වලින් ලබාගත් පොහොර මෙට්‍රික් ටොන් 8,360 ක් කුඩා පරිමාණ වී ගොවීන් සඳහා ලබා දෙයි

ඉදිරි මහ කන්නයේ දී බෙදා හැරීම සඳහා එක්සත් ජාතීන්ගේ ආහාර හා කෘෂිකර්ම සංවිධානය (FAO) විසින් යූරියා පොහොර මෙට්‍රික් ටොන් 8,360 ක් මේ සතියේ කෘෂිකර්ම අමාත්‍යාංශය වෙත භාර දෙන ලදී. මේ සඳහා ජපන් රජයෙන් ලබාදුන් මුදල් ආධාර යොදාගන්නා ලදී. මෙම අත්‍යාවශ්‍ය පොහොර ශ්‍රී ලංකාවේ වියලි සහ අතරමැදි කලාප වල දිස්ත්‍රික්ක කිහිපයක කුඩා පරිමාණ වී ගොවීන් 228,000 කට අධික පිරිසක් වෙත බෙදාහරිනු ලබන අතර, නිෂ්පාදනය ඉහළ නැංවීම සහ දිවයිනේ කුඩා පරිමාණ වී ගොවීන්ගේ ජීවනෝපාය නංවාලීම මෙහි අරමුණය.

කුරුණෑගල, යාපනය, කිලිනොච්චිය, මුලතිව්, මන්නාරම, වවුනියාව, ත්‍රිකුණාමලය සහ මඩකලපුව යන දිස්ත්‍රික්ක වල හෙක්ටයාර් එකක් දක්වා වන කුඹුරු ඉඩම් වගාකරන වී ගොවීන් ඉලක්ක කරගෙන මෙම ආධාරය සිදු කරනු ලැබේ.
මෙම හදිසි ආධාර වැඩසටහන යටතේ හෙක්ටයාර 0.5 දක්වා කුඹුරු ඉඩම් වගා කරන ගොවීන් සඳහා යූරියා පොහොර කිලෝ ග්‍රෑම් 25ක්ද, කුඹුරු ඉඩම් හෙක්ටයාරය දක්වා වගා කරන ගොවීන් සඳහා යූරියා පොහොර කිලෝ ග්‍රෑම් 50ක්ද බැගින් කිසිදු අය කිරීමකින් තොරව ලබා දෙනු ඇත.

දිවයිනේ කෘෂිකාර්මික ඉලක්කයන් ඉදිරියට ගෙනයාමේ දී ලැබෙන මෙම සහයෝගයේ වැදගත්කම කෘෂිකර්ම අමාත්‍ය මහින්ද අමරවීර මහතා, මෙසේ අවධාරණය කරන ලදී, “මෙම යූරියා පොහොර ආධාරය ශ්‍රී ලංකාවේ ආර්ථික ස්ථාවරත්වය කරායන ගමන සඳහා රුකුලක් වනු ඇත. අපගේ ගොවීන්ගේ අවශ්‍යතා සපුරාලීමෙන් අපි වඩාත් සවිමත් සහ සමෘද්ධිමත් කෘෂිකාර්මික අංශය වර්ධනය සඳහා අනුබල දෙමින්, ශ්‍රී ලංකාවේ කුඩා පරිමාණ වී ගොවීන්ට ලබාදුන් මෙම වටිනා ආධාරය වෙනුවෙන් මම ජපාන රජයට සහ ජපාන ජනතාවට ස්තූතිවන්ත වෙමි“.

ජපාන තානාපති අතිගරු මිසුකෝෂි හිඩෙකි මහතා, ශ්‍රී ලංකාවේ කෘෂිකර්ම ක්‍ෂේත්‍රය සඳහා සහාය ලබාදීමට ජපාන රජයේ කැපවීම ප්‍රකාශ කරමින්, “ලෝක ආහාර හා කෘෂිකර්ම සංවිධානය සහ ශ්‍රී ලංකා රජය සමඟ මෙම සහයෝගීතා ප්‍රයත්නයේ කොටස්කරුවෙකු වීමට ලැබීම ගැන අපි සතුටු වන්නෙමු. තිරසර කටයුතු තුලින් කුඩා වී ගොවීන් සවිබල ගැන්වීමේ අපගේ ඒකාබද්ධ දැක්ම මෙම වැඩසටහන සමඟ හොඳින් ගැලපේ. ශ්‍රී ලංකාවේ ගොවි ප්‍රජාවගේ අභිවෘද්ධිය සඳහා මෙම ආධාර සැලකියයුතු දායකත්වයක් ලබාදෙනු ඇතැයි අපි විශ්වාස කරන්නෙමු“ යනුවෙන් පැවසීය.

එක්සත් ජාතීන්ගේ ආහාර හා කෘෂිකර්ම සංවිධානයේ ශ්‍රී ලංකාව සහ මාලදිවයින සඳහා වන නියෝජිත විම්ලේන්ද්‍ර ශරන් මහතා, තිරසර කෘෂිකර්මාන්තය සඳහා තම සංවිධානයේ කැපවීම සහ ශ්‍රී ලංකාවේ ගොවි ප්‍රජාවන්ට උපකාර කිරිමේ ඔවුන්ගේ දායකත්වය අවධාරණය කරමින් මෙසේ පැවසීය, “එක්සත් ජාතීන්ගේ ආහාර හා කෘෂිකර්ම සංවිධානය තිරසර කෘෂිකාර්මික කටයුතු ප්‍රවර්ධනය කිරීමේ සහ ගොවීන්ගේ ජීවනෝපාය නංවාලීමේ සිය මෙහෙවරෙහි නොසැලී කටයුතු කරයි. ජපාන රජය සහ ශ්‍රී ලංකාවේ කෘෂිකර්ම අමාත්‍යාංශය අතර ඇති මෙම සහයෝගීතාවය කුඩා පරිමාණ වී ගොවීන් මුහුණ දෙන අභියෝග වලදී ජාතීන් එක්ව කටයුතු කිරීමෙන් ලබාගත හැකි සාධනීය ප්‍රතිඵල මනාව පිළිබිඹු කරයි“.

එක්සත් ජාතීන්ගේ ආහාර හා කෘෂිකර්ම සංවිධානය, එහි ගෞරවනීය හවුල් කරුවන් සමඟ ශ්‍රී ලංකාවේ කෘෂිකර්ම අංශයට සහාය දැක්වීමට ඇති කැපවීම පිළිබඳව නැවත අවධාරණය කරන අතර, ආහාර සුරක්‍ෂිතතාවය ප්‍රවර්ධනය කිරීම සඳහා සහ රට තුළ ස්ථායී කෘෂි-ආහාර පද්ධතියක් ගොඩනැගීම සඳහා එකමුතුව සිටී.

The post එක්සත් ජාතීන්ගේ ආහාර හා කෘෂිකර්ම සංවිධානය ජපාන අරමුදල් වලින් ලබාගත් පොහොර මෙට්‍රික් ටොන් 8,360 ක් කුඩා පරිමාණ වී ගොවීන් සඳහා ලබා දෙයි appeared first on Adaderana Biz Sinhala | Sri Lanka Business News.