ඉන්ධන මිල වැඩි කිරීම නීත්‍යානුකූල නැහැ – හර්ෂ

මුදල් අමාත්‍යවරයා සහ මුදල් ලේකම්වරයා රටේ නොසිටින අවස්ථාවේ ඉන්ධන මිල ඉහළ දැමීම නීත්‍යානුකූල නොවන දෙයක් බව සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පවසයි.

ඉන්ධන මිල සංශෝධනය සඳහා මේ අවස්ථාවෙ දී විදේශගතව සිටින මුදල් අමාත්‍යවරයාගේ සහ මුදල් අමාත්‍යාංශ ලේකම්වරයාගේ අනුමැතිය දුරකතන මාර්ගයෙන් ලබා ගෙන ඇති බව අමාත්‍ය කංචන විජේසේකර මහතා පැවසූ අවස්ථාවේ දී ඊට ප්‍රතිචාර දක්වමින් ආචාර්ය හර්ෂ ද සිල්වා මහතා අද (21) දින පාර්ලිමේන්තුවේ දී මේ බව පැවසීය.

අමාත්‍ය කංචන විජේසේකර –

මෙම මිල වැඩි කිරීමට පෙර අතිගරු ජනාධිපතිතුමා ගෙන් ඒ පිළිබඳවබ අනුමැතිය ලබා ගෙන, අතිගරු ජනාධිපතිතුමාගේ උපදෙස් මත, මේ වෙලාවේ විදේශගත වෙලා ඉන්න මුදල් අමාත්‍යවරයට රාත්‍රියේම මේ පිළිබඳව දැනුවත් කරලා එතුමාගේ අනුමැතියත් ලබා ගෙන, මුදල් අමාත්‍යාංශයේ ලේකම්වරයාත් දැනුවත් කරලා ඒ සියලු දේම ඛණිජ සම්පත් අමාත්‍යාංශයේ ලේකම්තුමිය ඒ වගේම ඛණිජ තෙල් සංස්ථාවේ සභාපතිතුමා මම ඇතුළු අපි තිදෙනා ඉදිරියේ තමයි ඒ කටයුත්ත වෙනුවෙන් අනුමැතිය ලබා ගත්තේ. ඒ සියළුම සාක්ෂි තියෙනවා. දුරකතන සාකච්ඡාත් තියෙනවා. කෙටි පණිවිඩත් තියෙනවා. ජනාධිපතිතුමාගෙනුත් අරගෙන තියෙන්නේ. මුදල් ඇමතිතුමාගෙනුත් ලබා ගෙන තියෙන්නේ. කිසිම ගැටලුවක් නැහැ.

පා.ම. ආචාර්ය හර්ෂ ද සිල්වා –

සමහර අයගේ ජීවිත නැති වෙලා තියනවා තෙල් මිල වැඩි කිරීම නිසා. දුරකතනයෙන් මේක කරන්න බැහැ. දුරකතනය, SMS පණිවිඩ හරහා මේ නීති සම්පාදනය කරන්න මෙතන හැකියාවක් නැහැ. එතකොට ඒක එක්කෝ මේ රටේ ඇමතිවරයා නැත්තම් වැඩ බලන ඇමතිවරයෙක් ඉන්න ඕන. එහෙම නැත්තන් නියෝජ්‍ය ඇමතිවරයෙක් ඉන්න ඕන. එහෙම කෙනෙක් නැහැ. මෙතුමා කියනවා phone එකෙන් ගත්තලු. එහෙම සම්ප්‍රදායක්, එහෙම නීතියක් මේ රටේ නැහැ. මොකද තෙල් මිල වැඩි කිරීම මම හිතන්නේ නීත්‍යානුකූල නැහැ. අපට දැනෙන විදිහට මේක නීත්‍යානුකූල නොවන මිල වැඩි කිරීමක්.

අමාත්‍ය කංචන විජේසේකර –

අපි ඒක ප්‍රතික්ෂේ්ප කරනවා. ඔබ තුමා මේ අවස්ථාවේ මුදල් ඇමතිවරයා නැහැ කියලා කියනවනම් ජනාධිපතිතුමාට තමයි ඒ වගකීම තියෙන්නේ. ජනාධිපතිතුමා ඒ සඳහා අනුමැතිය ලබා දීලා තියනවා. ඒ වගේම මුදල් ඇමතිවරයට ඒ පිළිඉඳව දැනුවත් කරන්න කියලා තියනවා. මුදල් අමාත්‍යවරයා ඒ වෙලාවෙම මුදල් අමාත්‍යාංෂයේ ලේකම්වරයාට සන්නිවේදනය කළේ ඒ සඳහා අවශ්‍ය ලිපි ටික සකස් කරන්න කියන එක. ඒ නිසා සියලුම අවසරයන් අරගෙන තමයි මේ මිල වැඩි කිරීම කරලා තියෙන්නේ. ඔබතුමාලට ඒ ගැන සැකයක් තියනවා නම් අධිකරණයේ ඒ ගැන අභියෝගයකට ලක් කරන්න.

The post ඉන්ධන මිල වැඩි කිරීම නීත්‍යානුකූල නැහැ – හර්ෂ appeared first on Adaderana Biz Sinhala | Sri Lanka Business News.