හිටපු මහ බැංකු අධිපති ආචාර්ය ඉන්ද්‍රජිත් කුමාරස්වාමි මහතා ත්, හිටපු මහ බැංකු ජ්‍යෙෂ්ඨ නියෝජ්‍ය අධිපති ආචාර්ය නන්දලාල් වීරසිංහ මහතා ත් සිටින මෙම ඡායාරූපය එදින මහ බැංකු පරිශ්‍රයේ පැවති මාධ්‍ය හමුවක් අතරතුර ගනු ලැබූවකි.
නව රජය බලයට පැමිණීමත් සමඟම පළමුව ආචාර්ය කුමාරස්වාමි ගේ සේවය අනවශ්‍ය බව සැලකූ අතර ඊට කෙටි කලකට පසු ආචාර්ය වීරසිංහට ද මහ බැංකු සේවයෙන් විශ්‍රාම යන තැනට වැඩ සිදුවිය.
කෙසේවෙතත් අද වන විට ආණ්ඩුව අන්තිම පිදුරු ගහේත් එල්ලීමට සූදානම් වනවාක් මෙන් මේ දෙපළගේ සේවය නැවත වරක් ලබා ගැනීමට තරම් කීකරු වීම රටේ ජනතාවට යම් තරමකින් හෝ සැනසුම් සුසුමක් හෙලීමට කාරණාවක් වනු ඇත.
ආචාර්ය නන්දලාල් වීරසිංහ ඊයේ (07) දිනයේ දී ශ්‍රී ලංකා මහ බැංකුවේ අභිනව අධිපතිවරයා වශයෙන් පත්වීම් ලැබූ අතර අද (08) දිනයේ දී ඔහු සිය රාජකාරි ආරම්භ කිරීමට නියමිතය.
මේ අතර පසුගිය දා ජනාධිපතිවරයා විසින් පත් කරනු ලැබූ බහුපාර්ශ්වික කටයුතු සහ ණය තිරසරභාවය පිළිබඳ ජනාධිපති උපදේශක කණ්ඩායමේ සාමාජිකයෙකු වශයෙන් ශ්‍රී ලංකා මහබැංකුවේ හිටපු අධිපති, ආචාර්ය ඉන්ද්‍රජිත් කුමාරස්වාමි මහතා මේ වන විට කටයුතු කරනු ලබයි.
සත්‍ය වශයෙන්ම මොවුන් දෙදෙනා ගේ මූලිකත්වයෙන් එදා කරගෙන ආ වැඩපිළිවෙල ඉදිරියට කරගෙන යාමට ඔවුන්‌ගෙන් පසුව එම තනතුරුවලට පැමිණියවුන් කටයුතු කළා නම්, අද මෙවැනි ආරිථික අර්බුදයකට මුහුණ දීමට ශ්‍රී ලංකාවට කිසිසේත්ම සිදුනොවනු ඇති බව ප්‍රත්‍යක්ෂය.
කෙසේවෙතත් මෙවැනි අසීරු යුගයක දී ඔවුන් දෙදෙනා මෙම තනතුරු භාර ගැනීම පිළිබඳව ආචාර්ය වීරසිංහට ත් ආචාර්ය කුමාරස්වාමිට ත් ස්තුතිවන්ත විය යුතු වේ.
ඩුබායි රාජ්‍යයේ නිර්මාතෘ ෂෙියක් මොහාමඩ් වරක් මෙසේ කියා ඇත.
මගේ සීයා ගමන් කළේ ඔටුවෙකු පිටයි.
මගේ පියා ගමන් කළේ ද ඔටුවෙකු පිට මත වූ අතර වර්තමානයේ දී මම මර්සිඩීස් රථයක ගමන් කරමි.
මගේ පුත්‍රයා සේම මුණුපුරාද පදවනු ඇත්තේ ලෑන්ඩ් රෝවර් රථයි.
නමුත් අනාගතයේ දී මගේ මුණුපුරාගේ පුත්‍රයා ගමන් බිමන් යෑම වෙනුවෙන් ඔටුවෙකු යොදාගනු ඇත.
ඒ මන්ද යත්,
අසීරු යුගයන් ශක්තිමත් මිනිසුන් නිර්මාණය කරනු ඇති අතර ශක්තිමත් මිනිසුන් පහසු යුගයන් උදා කරන්නෝය.
පහසු යුගයන් දුර්වල මිනිසුන් බිහි කරනු ඇති අතර දුර්වල මිනිසුන් අසීරු යුගයන් නිර්මාණය කරනු ඇත.
ඔබ විසින් ගොඩනැගිය යුත්තේ අභියෝගයන්ට මුහුණ දිය හැකි ශක්තිමත් මිනිසුන් මිස පරපෝෂිතයන් නොවේ.
– සංස්කාරක සටහනකි.
The post අසීරු යුගයන් ශක්තිමත් මිනිසුන් නිර්මාණය කරනු ඇත appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka