අලියාන්ස් ලංකා සමාගමේ ජීවිත රක්ෂණ සහ සාමාන්‍ය රක්ෂණ අංශවල ඉහළම දක්ෂතා පෙන්නුම් කරමින්, මෙරට රක්ෂණ ක්ෂේත්‍රය තුළ අලියාන්ස් ලංකා සමාගමට හිමි වී ඇති ස්ථානය තවදුරටත් තහවුරු කිරීම සඳහා දායක වූ විශිෂ්ටයන් ඇගයීමට ලක් කිරීම මෙම සම්මාන උළෙලෙහි මූලික අරමුණ විය.
උත්සවයේ ප්‍රධාන ආරාධිතයන් ලෙස Allianz SE හි කළමනාකරණ මණ්ඩලයේ සාමාජික රෙනාටේ වැග්නර්, Allianz Asia Pacific හි කලාපීය ප්‍රධාන විධායක නිලධාරිනී අනුෂා තවරාජා සහ එහි කලාපීය ප්‍රධාන මානව සම්පත් නිලධාරිනී මෙලනී ගිලි යන ශ්‍රේෂ්ඨවරියන්, අලියාන්ස් සමූහ ව්‍යාපාරයේ ගෝලීය හා කලාපීය මෙහෙයුම් නියෝජනය කරමින් මෙම අවස්ථාවට සහභාගී වූහ. මෙය අලියාන්ස් ලංකා සමාගමට අලියාන්ස් සමූහයේ කලාපීය ව්‍යාපාර කටයුතු තුළ ප්‍රමුඛ ස්ථානයක් හිමි වී ඇති බව මෙන්ම, මානව සම්පත් සංවර්ධනය වෙනුවෙන් ආයෝජනය කරමින් තම සාමාජික සාමාජිකාවන්ගේ දක්ෂතා ඇගයීම සඳහා අලියාන්ස් සමූහය විශාල උනන්දුවක් දක්වන බව නැවත වරක් තහවුරු කළ සාධකයක් විය.
අලියාන්ස් ඉන්ෂුවරන්ස් ලංකා සමාගමේ ප්‍රධාන විධායක නිලධාරි සහ මෙරට ප්‍රධාන කළමනාකරු ඇලන් ස්මී මහතා සහ අලියාන්ස් ලයිෆ් ඉන්ෂුවරන්ස් ලංකා සමාගමේ ප්‍රධාන විධායක නිලධාරී ජයලාල් හේවාවසම් මහතා ද සමාගමේ විශිෂ්ට සාමාජික සාමාජිකාවන් ඇගයීමට මෙම ප්‍රදානෝත්සවයට සහභාගී වූහ.
“අලියාන්ස් ලංකා සමාගම මෙතරම් දැවැන්ත සාර්ථකත්වයක් අත්කර ගැනීමට සමත් වී ඇත්තේ මේ සම්මානලාභී විශිෂ්ටයන්ගේ උනන්දුව හා කැපවීම නිසයි. පීඩනය අභියෝගයක් ලෙස භාරගනිමින්, එය වර්ධනය හා සාර්ථකත්වය කරා යාමට උත්තේජනයක් බවට පත්කර ගැනීමට ඔවුන් සමත් වී තිබෙනවා. ඔවුන් මේ ලැබූ ජයග්‍රහණ, සීමා මායිම් ඉක්මවා යමින් විශිෂ්ටත්වය ළඟා කර ගැනීම අප සැවොම දිරිගන්වන සුලුයි. ඒ වෙනුවෙන් ඔවුන්ට උණුසුම් සුබපැතුම් පිරිනමන අතරම, තමන් ලබාදුන් මේ ආදර්ශය ඔස්සේ පෙරට පැමිණීමට අන් අයද දිරිගන්වන මෙන් මා ඔවුන්ගෙන් ඉල්ලා සිටිනවා. අලියාන්ස් ලංකා සමාගම ක්ෂේත්‍රයේ කැපීපෙනෙන බලවේගයක් බවට පත්කරනු ලබන්නේ ඔවුන් විසිනුයි.” අලියාන්ස් ඉන්ෂුවරන්ස් ලංකා සමාගමේ ප්‍රධාන විධායක නිලධාරි සහ මෙරට ප්‍රධාන කළමනාකරු ඇලන් ස්මී මහතා පැවසී ය.
සම්මානවලට අමතරව ජයග්‍රාහකයන්ට මුදල් ත්‍යාග, විදේශ සංචාර, දේශීය සංචාර සහ සමරු ඵලක ඇතුළු ත්‍යාග රැසක්ද හිමි විය. සම්මාන උළෙලේ ප්‍රධානතම සම්මාන අතරින් එකක් වූ ‘Champion of Champions’ සම්මානය මෙවර දිනාගන්නා ලද්දේ ඩබ්ලිව්. නිහාල් ෂෙරිඩන් විසිනි. විශිෂ්ටයන් අතර ඉහළම දක්ෂතා පෙන්නුම් කරන අතිවිශිෂ්ටයන් වෙනුවෙන් මෙම සම්මානය පිරිනැමේ. සුවිශේෂී නායකත්ව කුසලතා පෙන්නුම් කරමින් සමාගමේ වර්ධනයට හා සාර්ථකත්වයට කැපීපෙනෙන දායකත්වයක් දක්වන සාමාජික සාමාජිකාවන් වෙනුවෙන් පිරිනමන “CEO’s Award’ මෙවර උදාර ගින්තොට වෙත හිමි විය. දූරදර්ශී ප්‍රවේශයක් ඔස්සේ රාජකාරිය වෙනුවෙන් කැපවෙමින් ඔහු අලියාන්ස් ලංකා සමාගමේ සාමාන්‍ය රක්ෂණ අංශයෙහි සාර්ථකත්වයේ නව මානයක් වෙත රැගෙන යාමට පුරෝගාමී මෙහෙවරක් ඉටුකර තිබේ.
“මෙම සම්මාන උළෙල අපගේ වාර්ෂික වැඩසටහන් අතර ඉතාමත් වැදගත් වැඩසටහනක්. අභියෝගවලට ශක්තිමත් ලෙස මුහුණ දෙමින්, සීමාවන් බිඳහෙළමින්, සාර්ථකත්වය අලුතින් අර්ථදැක්වීමට සමත් වූ විශිෂ්ටයන් පිරිසක් අද දිනයේදී ඇගයීමට ලක්වුණා. ගනුදෙනුකරුවන්ට විශිෂ්ටතම සේවාවක් ලබාදීමට කැපවීම පිළිබඳව ඔවුන් සැමදෙනාටම මගේ ස්තූතිය පිරිනැමීමට මා මෙය අවස්ථාවක් කරගන්නවා. ආරම්භයේ සිට මේ දක්වා මෙතරම් වර්ධනයක් අත්පත් කරගැනීමට හැකිවීම අප සැබැවින්ම දිරිගන්වන සුලුයි. මේ ජයග්‍රාහී ප්‍රවණතාව ඔස්සේ අපට අඛණ්ඩව දියුණුවෙන් දියුණුව කරා ගමන් කළ හැකි බවට සැකයක් නැහැ.” අලියාන්ස් ලයිෆ් ඉන්ෂුවරන්ස් ලංකා සමාගමේ ප්‍රධාන විධායක නිලධාරි ජයලාල් හේවාවසම් මහතා පැවසී ය.
අලියාන්ස් ලංකා සමාගමේ ජනප්‍රියතම වාර්ෂික වැඩසටහනක් වන අලියාන්ස් වාර්ෂික සම්මාන උළෙල, එම සමාගමේ සාමාජික සාමාජිකාවන්ගේ දක්ෂතා ඇගයීමට ලක්කිරීමට මෙන්ම, සමාගම සමග අත්වැල් බැඳගෙන සිටින සියලුම දෙනා දිරිගැන්වීමට ලැබෙන අගනා අවස්ථාවකි.
අලියාන්ස් ලංකා ලෙස පොදුවේ හඳුන්වනු ලබන අලියාන්ස් ඉන්ෂුවරන්ස් ලංකා සමාගම (Allianz Insurance Lanka Ltd.) සහ අලියාන්ස් ලයිෆ් ඉන්ෂුවරන්ස් ලංකා සමාගම (Allianz Life Insurance Lanka Ltd.), ජාත්‍යන්තර Allianz SE හි පූර්ණ අයිතිය යටතේ පවතින අනුබද්ධ සමාගම් ලෙස ක්‍රියාත්මක වේ. ප්‍රධාන වශයෙන් රක්ෂණ සහ වත්කම් කළමනාකරණ ක්ෂේත්‍ර වල ක්‍රියාත්මක වන ජාත්‍යන්තර සමූහ ව්‍යාපාරයක් වන Allianz SE හි ප්‍රධාන කාර්යාලය ජර්මනියේ මියුනික් නගරයේ පිහිටා ඇත. ජාත්‍යන්තර අලියාන්ස් සමූහ ව්‍යාපාරයේ ශක්තිය සහ, ශ්‍රී ලංකාව සම්බන්ධයෙන් අලියාන්ස් ලංකා සමාගම සතු දැනුම හා පළපුරුද්ද එක්තැන් වීම, අලියාන්ස් සමාගමට ශ්‍රී ලංකාව තුළ මෙබඳු සාර්ථකත්වයක් අත්පත් කරගැනීමට මහෝපකාරී වී තිබේ.
The post අලියාන්ස් වාර්ෂික සම්මාන උළෙලේදී විශිෂ්ටයෝ රැසක් ඇගයීමට ලක්වෙති appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka