ප්‍රමිති සම්පාදනය සම්බන්ධයෙන් පිහිටුවා ඇති ජාතික ආයතනය විදිහට ප්‍රමිති ආයතනයේ වත්මන් කාර්යභාර්ය සම්බන්ධයෙන් ඔබේ අදහස කුමක්ද?
ආර්ථිකයේ සෑම අංශයකම ප්‍රමිතිකරණය හා තත්ත්වය වැඩිදියුණු කිරීම් තුළින් ශ්‍රී ලාංකීය ජන ජීවිතයේ ගුණාත්මක භාවය ඉහල නංවාලීම සඳහා නායකත්වය සැපයීමේ මෙහෙවර පෙරදැරි කරගෙන ශ්‍රී ලංකා ප්‍රමිති ආයතනය ඉතාමත් සැලකිලිමත්ව සහ කැපවීමෙන් තම වගකීම ජාතිය වෙනුවෙන් ඉටු කරනු ලබනවා. මේ කාර්යය අද වන විට ආයතනයක් විදිහට අපිට ඉතාමත් සාර්ථක ආකාරයෙන් ඉටු කිරීමට හැකියාව ලැබී තිබෙනවා. ජාතික ප්‍රමිති ආයතනය විදිහට අපි මේ වන විට ප්‍රමිති 4000ක් පමණ සම්පාදනය කිරීමට සමත්වෙලා තිබෙනවා. ඉදිරි වසර 5ක කාලය තුළ ප්‍රමිති 10,000 ක් දක්වා වැඩිකිරීමට බලාපොරොත්තු වෙනවා.
ප්‍රමිති ආයතනයේ විශේෂත්වය සහ සිදුකරන සේවා සම්බන්ධයෙන් විස්තර කලොත්?
ජාතික ප්‍රමිතීන් සැකසීමේ ප්‍රමුඛතමයා වන ශ්‍රී ලංකා ප්‍රමිති ආයතනය (SLSI), ලාංකීය ආර්ථිකයේ වර්ධනයට සහ සමස්ත පාරිභෝගික ජනතාවගේ ජීවන තත්ත්වය උසස් කිරීම සඳහා සුවිශේෂ කාර්යයක් සිදුකරන ආයතනයක්. මෙයින් පාරිභෝගිකයන්ට තම පරිභෝජන භාණ්ඩ සම්බන්ධයෙන් විශ්වාසක් වගේම, කර්මාන්තකරුවන් හට සිය ව්‍යාපාරික ස්ථාවරත්වය සහ ව්‍යාපාර වර්ධනය කර ගැනීම සඳහා විශාල පිටුබලයක් ලබා දෙනවා. අප ආයතනයෙන් සිදුකරණ සේවා සම්බන්ධයෙන් කතා කළොත්, ජාතික ප්‍රමිති සකස්කිරීම සහ නිකුත්කිරීම, කර්මාන්ත වානිජ කටයුතු ප්‍රමිතිකරණය සහ එහි ගුණාත්මක තත්ත්වය වර්ධනය කිරීම, නිෂ්පාදන සහ වෙළෙඳ භාණ්ඩ සඳහා ජාතික තත්ත්ව සහතික ලකුණ (SLS සහතිකය) ලබාදීම, පරීක්ෂණාගාර සේවා ඉතා කාර්යක්‍ෂමව පවත්වාගෙන යනවා. පද්ධති සහතිකකරන සේවාව යටතේ පද්ධති සහතික කිරීම් වර්ග 14ක් පමණ ස්ථාපිත කර තිබෙනවා. ආනයන සහ අපනයන පරීක්ෂණ සේවාව යටතේ ලංකාවට පැමිණෙන භාණ්ඩ වල තත්ත්වය පරීක්ෂා කරනු ලබනවා. පුහුණු පාඨමාලා යටතේ කර්මාන්ත, සේවා සහ අධ්‍යාපන ක්ෂේත්‍රවල අයට අදාළ සේවාවන්වල තත්ත්වය සහ සේවා ගුණාත්මක බව වර්ධනය කිරීමට අවශ්‍ය පුහුණුව ලබාදීම අරමුණු කරගෙන තත්ත්ව කළමනාකරණය සඳහා වන පාඨමාලා, රැසක් පවත්වනවා.
ප්‍රමිති සකස්කිරීම සිදුවන්නේ කොහොමද?
ප්‍රමිතියක් සකස් කිරීම නැත්නම් සකස් කිරීම සිදුවන්නේ විද්‍යාත්මක, තාක්ෂණික සහ අත්දැකීම් යන සාධක වල සංකලණයකින් සහ එහි ප්‍රතිඵල පදනම්වයි. මෙම ප්‍රමිති තාක්ෂණික කමිටු විසින් සකස් කරන අතර, අදාළ ක්ෂ්ත්‍රයේ අත්දැකීම් සහිත විශේෂඥ දැනුමකින් යුත් ප්‍රවීණයන්ගෙන් සමන්විත ආංශික කමිටු මඟින් මෙම ප්‍රමිති සම්පාදනය සිදුකරනවා. ඉන් පසුව මෙම ප්‍රමිති මහජන අදහස් විමසුමට යොමුකිරීමයි සිදුවෙන්නේ. මෙහිදී මහජන යෝජනා හෝ පැමිණිලි යොමු වී නම්, ඒ සම්බන්ධයෙන් නැවත පරීක්ෂා කිරීම ආංශික කමිටුව මඟින් සිදුකරන අතර, එය සංශෝධනයට ලක්විය යුතු නම් එම කාර්යයන් කිරීමෙන් පසුව තාක්ෂණික කමිටු වලට යොමු කරනවා. එම කමිටුවල නිර්දේශය මත මෙම ප්‍රමිති, ප්‍රමිති ආයතන මහා මණ්ඩලය වෙත අනුමැතිය සඳහා යොමුකිරීමයි සිදුවෙන්නේ. මේ අනුමැතියත් සමඟයි ප්‍රමිතියක් නිකුත් කිරීම සිදුවෙන්නේ. ප්‍රමිති සකස් කිරීමේදී ප්‍රධාන වශයෙන් මානව ආරක්ෂාව, සෞඛ්‍ය සහ පාරිසරික ආරක්ෂාව කියන අංශ සම්බන්ධයෙන් අපි විශේෂ අවධානයක් යොමු කරනවා.
ජාත්‍යන්තර ප්‍රමිතීන් හා සැසඳීමේදී අපි සිටින්නේ කුමන ස්ථානයකද?
ජාතික තලයේ ප්‍රමිති ප්‍රකාශයට පත් කිරීම සහ කර්මාන්ත හා වාණිජ ක්ෂේත්ර තුල ප්‍රමිතිකරණය හා තත්ත්ව වැඩි දියුණු කිරීම මූලික අරමුණු ඇතිවයි ශ්‍රී ලංකා ප්‍රමිති ආයතනය ක්‍රියාත්මක වන්නේ. ජාතික ප්‍රමිති ආයතනය, ප්‍රමිතිකරණය සඳහා ජාත්‍යන්තර ආයතනයේ (International Organization for Standardization -ISO) නිත්‍ය සාමාජිකත්වය දරමින් ශ්‍රී ලංකාව නියෝජනය කරන එකම ආයතනය වෙනවා. මෙම නිසා ශ්‍රී ලංකා ප්‍රමිති, ජාත්‍යන්තර ප්‍රමිති හා සමාන්තරව පවත්වාගෙන යන අතර ප්‍රමිතියට අනුකූල නිෂ්පාදනයකට හෝ වෙළෙඳ භාණ්ඩයකට ජාත්‍යන්තර වෙළෙඳපොලේ තරඟ කිරීමට පහසුවනවා.
ප්‍රමිතිකරණය මඟින් ආවරණය වන ක්ෂේත්ර සම්බන්ධයෙන් පැහැදිළිකිරීමක් කළොත්?
ප්‍රමිති කාර්යයන් වලදී පාරිභාෂිත ප්‍රමිතින් (Terminology Standards), පරීක්ෂණ ප්‍රමිතීන් (Testing
standards), නිෂ්පාදන ප්‍රමිතීන් (Production standards), ක්‍රියාවලි ප්‍රමිතීන් (Process standards), සේවා ප්‍රමිතීන් (Service standards), තොරතුරු තාක්ෂණ ක්ෂේත්‍රයට අදාළ අතුරු මුහුණත් ප්‍රමිතීන් (Interface standards), දත්ත ප්‍රමිතීන් (Data standards) යනාදී විෂය ක්ෂේත්ර රැසක් ආවරණය කරනවා.
ආනයනන භාණ්ඩ ප්‍රමිති පරීක්ෂා කිරීමේදී ප්‍රමිති ආයතනයේ භූමිකාව සම්බන්ධයෙන් පැහැදිළි කිරීමක් කළොත් ?
ශ්‍රී ලංකාවට ආනයනය කරන නියාමනයට අදාළ භාණ්ඩ ශ්‍රී ලංකා ප්‍රමිතියකට අනුකූලදැයි යන්න පරීක්ෂා කර එම භාණ්ඩ නිදහස් කිරිම සඳහා වන නිර්දේශය ශ්‍රී ලංකා රේගුව වෙත ලබාදීම තමයි මෙම සේවාව යටතේ ශ්‍රී ලංකා ප්‍රමිති ආයතනය මඟින් සිදුකරන්නේ. මෙහිදී නීති හෝ රෙගුලාසි පැනවීම හෝ ක්‍රියාත්මක කිරීමේ බලතල ප්‍රමිති ආයතනයට ඇතතේ නැහැ. අපි කරන්නේ ආනයන අපනයන පාලක දෙපාර්තමේන්තුව මඟින් ගැසට් කරන ලද භාණ්ඩ නියාමනය සඳහා පහසුකම් සැපයීම පමණයි. මේ යටතේ අද වෙනකොට භාණ්ඩ 134ක නියාමන කාර්ය අපේ ආයතනය මඟින් සිදුකරනවා. අප විසින් රට තුළට පැමිණෙන මෙම භාණ්ඩ නියාමනය කිරීම මඟින් තත්ත්වයෙන් උසස් භාණ්ඩ රට තුළට ගෙන ඒමට අවශ්‍ය පරිසරය නිර්මාණය වන අතර පාරිභෝගිකයින්ට ගෙවන මුදලට ඉහළ ප්‍රමිතියෙන් යුතු සෞඛ්‍ය ආරක්‍ෂිත නිෂ්පාදනයක් පරිභෝජනය කිරීමේ අවස්ථාව හිමි වේ.
ප්‍රමිති ආයතනය මඟින් ඉදිරියේදී ක්‍රියාත්මක කිරීමට ඇලසුම් කර ඇති කාර්යයන් මොනවාද?
2022 වර්ෂය සඳහා අපට බිලියනයකට ආසන්න ආදායමක් ලබා ගැනීමට හැකි වූ අතර මිලියන 170 ක පමණ ශුද්ධ ලාභයක් වාර්ථා කිරීමට හැකිවුනා. මෙමඟින් අප භාණ්ඩාගාරයට කිසිදු බරපැණක් නොදී ආයතනයේ කටයුතු පවත්වාගෙන යාමට හැකිවිය. ඉදිරි වර්ෂයන්හි මෙම ආදායම හා ලාභය වැඩිකර ගැනීමට බලාපොරොත්තු වන අතර අප විසින් ලබාදෙන සේවයන්හි ගුණාත්මකභාවය තව වැඩිදියුණු කිරීමට බලාපොරොත්තු වේ. අපගේ විශේෂඥ සේවාවන් වන තත්ත්ව කළමණාකරන ආශ්‍රිත පුහුණු පාඨමාලාවන් හා පරීක්ෂණාගාර සේවාවන් මාලදිවයින, බංගලාදේශය හා මැදපෙරදිග රටවල් වලට ලබාදීම මඟින් විදේශ විනිමය ඉපයීමටද කටයුතු සකස්කරමින් සිටී.
The post “අපේ අරමුණ ආර්ථිකයේ සෑම අංශයකම ප්‍රමිතිකරණය හා තත්වය වැඩිදියුණු කිරීම තුළින් ගුණාත්මක භාවය ඉහළ නංවාලිමයි” – SLSI සභාපති අසංග රණසිංහ appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka