මෙම සමාරම්භක අවස්ථාව වෙළඳ අමාත්‍ය ආචාර්ය බන්දුල ගුණවර්ධන මහතාගේ සහ ශ්‍රී ලංකාවේ සහ මාලදිවයිනේ එක්සත් ජනපද තානාපතීනි, ගරු ඇලයිනා ටෙප්ලිට්ස් (Alaina Teplitz) මහත්මියගේ ප්‍රධානත්වයෙන් පැවැත්විණි. අන්තර්ජාතික සංවර්ධනය සඳහා වූ එක්සත් ජනපද නියෝජිතායනයේ ශ්‍රී ලංකා සහ මාලදිවයින කාර්යාලයේ අධ්‍යක්ෂ රීඩ් ඇෂ්ලිමන් (Reed Aeschliman) මහතා සහ ලංකා වාණිජ මණ්ඩලයේ සභාපති විෂ් ගෝවින්දසාමි යන මහත්වරු මෙම අවස්ථාව සඳහා සහභාගී වූහ. පුහුණු වැඩසටහනට සම්බන්ධ වීමට අපේක්ෂා කරන සංවර්ධන නිලධාරීන් අන්තර්ජාලය ඔස්සේ මෙම අවස්ථාවට එක් වූහ.
මෙම පුහුණු වැඩසටහන ක්‍රියාත්මක කිරීම සඳහා ශ්‍රී ලංකා අපනයන සංවර්ධන මණ්ඩලය සමඟ සම්බන්ධ වීම පිලිබඳ අන්තර්ජාතික සංවර්ධනය සඳහා වූ එක්සත් ජනපද නියෝජිතායනයේ පාර්ට්නර් (PARTNER) ව්‍යාපෘතිය සහ ලංකා වාණිජ මණ්ඩලය වෙත අමාත්‍යවරයා සිය ස්තූතිය පුද කළේය. එතුමා පවසා සිටියේ කුඩා හා මධ්‍ය පරිමාණ ව්‍යවසායකයින් අපනයන සඳහා අගය එකතු කිරීමට සම්බන්ධ වී, එමඟින් ජාත්‍යන්තර වෙළෙඳපොළට පිවිසීමට හැකි වන පරිදි ශක්තිමත් කිරීම සඳහා මෙම සංවර්ධන නිලධාරී පුහුණු වැඩ සටහන සැලකිය යුතු දායකත්වයක් ලබා දෙනු ඇති බවයි.
මෙම වැඩසටහන මඟින් අපනයන ක්‍රියාවලිය සහ වෙළඳපළ ප්‍රවේශ පිළිබඳ දිවයින පුරා විසිරී සිටින ශ්‍රී ලංකා අපනයන සංවර්ධන මණ්ඩලයට අනුයුක්ත 300 කට ආසන්න සංවර්ධන නිලධාරීන්ගේ දැනුම හා කුසලතා වැඩි දියුණු කිරීමට අපේක්ෂිතය. මෙම සංවර්ධන නිලධාරීන් කාන්තා ව්‍යවසායකයින් ඇතුළු කුඩා හා මධ්‍ය පරිමාණ ව්‍යවසායකයින් හට ඔවුන්ගේ අපනයන ඉලක්ක වර්ධනය කර ගැනීමට සහ අපනයන අවස්ථා සමඟ සම්බන්ධ වීමට මාර්ගෝපදේශනය සපයනු ඇත. පුහුණු සංවර්ධන නිලධාරීන් හරහා ශ්‍රී ලංකාවේ සහ විදේශයන්හි වෙළෙඳ රෙගුලාසි පිළිබඳ දේශීය ව්‍යවසායකයින්ගේ අවබෝධය වැඩි කිරීමට බලාපොරොත්තු වන අතර, ජාත්‍යන්තර වෙළෙඳපොළ තුළ තරගකාරී ව්‍යවසායකයින් බවට පත්වීමට කටයුතු කරනු ඇත.
ශ්‍රී ලංකාවේ සහ මාලදිවයිනේ එක්සත් ජනපද තානාපතිනී, ගරු ඇලයිනා ටෙප්ලිට්ස් (Alaina Teplitz) මහත්මිය, සිය අදහස් දක්වමින් එක්සත් ජනපදය සහ ශ්‍රී ලංකාව සමෘද්ධිය පිළිබඳ දැක්මක් පවත්වා ගෙන යන අතර දෙරට අතර පවතින අපනයන සම්බන්ධතාව එයට සාක්ෂි දරන බව පැවසීය. අපනයන අඛණ්ඩව වර්ධනය කරා ගෙන යාමට නම් සුළු හා මධ්‍ය පරිමාණ ව්‍යවසායකයින් අපනයනයට සූදානම් තරඟකරුවන් විය යුතු බවත් මෙම වැඩසටහන කුඩා හා මධ්‍ය පරිමාණ ව්‍යාපාර ගෝලීය වෙළෙඳපොළ දක්වා ව්‍යාප්ත කිරීමට උපකාරී වන බව එතුමිය ප්‍රකාශ කළාය.
පුහුණු වැඩසටහන ආරම්භ කිරීමට මත්තෙන් ත්‍රයිපාර්ශවිය අවබෝධතා ලියවිල්ලකට අත්සන් තැබූ අතර අපනයන සංවර්ධන මණ්ඩලයේ සභාපති සුරේෂ් ද මෙල්, ලංකා වාණිජ මණ්ඩලයේ ප්‍රධාන විධායක නිලධාරී සහ මහලේකම් මංජුල ද සිලවා සහ පාර්ට්නර් (PARTNER) ව්‍යාපෘති ප්‍රධානි මලිත් ගුණසේකර යන මහත්වරුන් ඒ සඳහා අත්සන් තබන ලදී.අපනයන සංවර්ධන මණ්ඩලය සහ පාර්ට්නර් (PARTNER) ව්‍යාපෘතිය වෙනුවෙන් ලංකා වාණිජ මණ්ඩලය විසින් පුහුණු විෂය මාලාව ක්‍රියාත්මක කරනු ලබන අතර වැඩසටහන දිස්ත්‍රික්ක 25 ම ආවරණය වන පරිදි දිවයින පුරා විසිරී සිටින ශ්‍රී ලංකා අපනයන සංවර්ධන මණ්ඩලය ට අනුයුක්ත සංවර්ධන නිලධාරීන් සඳහා සිංහල හා දෙමළ භාෂාවෙන් පැවැත්වේ.
The post අපනයන සංවර්ධන මණ්ඩලයට අනුයුක්ත සංවර්ධන නිලධාරීන් වෙනුවෙන් අපනයන කළමනාකරණ පුහුණු වැඩසටහනක් appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka