hSenid Business Solutions කොටස් නිකුතුව වෙනුවෙන් පැවැත්වෙන ආයෝජක සමුළුවට සියල්ල සූදානම්

ශ්‍රී ලංකාවේ මානව ප්‍රාග්ධන කළමනාකරණ මෘදුකාංග සම්බන්ධ වෙළඳපොළ ප්‍රමුඛයා වන hSenid Business Solutions සමාගමේ මූලික මහජන කොටස් නිකුතුව (IPO) ළඟදීම පැවැත්වීමට සැලසුම් කර තිබේ. ඒ සඳහා වන ආයෝජක සමුළුව 2021 නොවැම්බර් 23 දින පැවැත්වෙන බව එම සමාගම නිවේදනයක් නිකුත් කරමින් කියා සිටී. Jetwing Colombo Seven හෝටලයේදී එදින පෙරවරු 10.30 සිට මෙම සමුළුව පැවැත්වීමට සැලසුම් කර ඇති අතර, එය hSenid Business Solutions සමාගම සහ එහි මූලික මහජන කොටස් නිකුතුව සම්බන්ධයෙන් වැඩිදුර තොරතුරු දැනගැනීමට උනන්දු වන ආයෝජකයන් ඇතුළු සියලුම දෙනාට ලැබෙන මහඟු අවස්ථාවක් වනු ඇත.

නැගී එන වෙළඳපොළවල මානව ප්‍රාග්ධන කළමනාකරණ මෘදුකාංග සම්බන්ධයෙන් දශක දෙකකට අධික පළපුරුද්දක් හිමි hSenid Business Solutions සමාගම, මෙම කාණ්ඩයේ සමාගම් අතරින් කොළඹ කොටස් හුවමාරුවේ ලියාපදිංචි වන ප්‍රථම සමාගමයි. මෙම මූලික කොටස් නිකුතුවේදී කොටසක් රු. 12.50 බැගින් වන නව සාමාන්‍ය ඡන්ද හිමි කොටස් 55,339,076 ක් නිකුත් කිරීමට සැලසුම් කර ඇති අතර, එමගින් එක්රැස් කරගැනීමට අපේක්ෂිත මුදල රු. මිලියන 692 කි. සමාගමේ අනාගත ක්‍රමෝපායික අත්පත් කරගැනීම් සඳහා මෙන්ම, වෙනත් රටවල් හා කලාප වෙත ව්‍යාපාර කටයුතු ව්‍යාප්ත කිරීම සහ තම නිෂ්පාදන තවදුරටත් වැඩිදියුණු කිරීම වැනි අරමුණු සඳහා මෙම මුදල් ආයෝජනය කිරීමට සමාගම අපේක්ෂා කරයි.

The post hSenid Business Solutions කොටස් නිකුතුව වෙනුවෙන් පැවැත්වෙන ආයෝජක සමුළුවට සියල්ල සූදානම් appeared first on Adaderana Biz Sinhala | Sri Lanka Business News.