සුසිල් ආණ්ඩුව ඇතුළේ සිටිමින් ආණ්ඩුවටම නෙළයි ’’අපි පත් කරලා තියෙන්නෙ සිග්නල් කණු වෙන්න නොවෙයි’’ – පොහොට්ටුවේ පිපිරීම පාර්ලිමේන්තුවේදී එළියට (වීඩියෝ)

නව ව්‍යවස්ථාව සකස් කරන ආකාරය සම්බන්ධයෙන් සිය දැඩි අප්‍රසාදය ප්‍රසිද්ධියේ පළකර සිටීමට රාජ්‍ය අමාත්‍ය සුසිල් ප්‍රේමජයන්ත මහතා කටයුතු කළේය.

ඊයේ (22) දිනයේ පාර්ලිමේන්තුවේදී අදහස් දක්වමින් අමාත්‍යවරයා පෙන්වා දුන්නේ 1972 ජනරජ ව්‍යවස්ථාව මෙන්ම ඉකුත් යහපාලන ආණ්ඩු සමයේ නව ව්‍යවස්ථාවක් සකස් කිරීම පාර්ලිමේන්තු තේරීම් කාරකසභා හරහා සිදුකළද මෙවර ඒ කිසිවක් දැකගන්නට නොමැති බවය.

ඔහු මෙසේ පැවසුවේ පොදු ව්‍යාපාර පිළිබඳ පාර්ලිමේන්තු කාරක සභාවේ(කෝප්) වාර්තා පිළිබඳ සභාව  කල්තබන අවස්ථාවේ විවාදයේදීය.

තමා මෙතැනට පැමිණ ඇත්තේ මොන්ටිසෝරි ගිහින් නොවන බවත් එහෙම අයද සිටිය හැකි බවත් ඔහු පැවසුවේය. තමා මෙහි පැමිණ ඇත්තේ නීති හැදීමට බවද රාජ්‍ය ඇමතිවරයා කීවේය.

පාර්ලිමේන්තුව පවතින්නේ නීති සකස් කිරීමට බවත්, වෙන කොහේවත් සකස් කර එවන නීති සිග්නල් කණු මෙන් අත ඔසවා සම්මත කිරීමට තමන් කටයුතු නොකරන බවත් එහිදී සුසිල් ප්‍රේමජයන්ත අමාත්‍යවරයා සඳහන් කළේය.

විෂය දන්නා තමන් කතා කිරීමට විනාඩි 5ක් වෙන් කර ඇති බවත්, විෂය නොදන්නා අයට පල්හෑලි කතා කිරීමට විනාඩි 15ක් වෙන් කර ඇති බවත් ඒ මහතා කියා සිටියේය.

The post සුසිල් ආණ්ඩුව ඇතුළේ සිටිමින් ආණ්ඩුවටම නෙළයි ’’අපි පත් කරලා තියෙන්නෙ සිග්නල් කණු වෙන්න නොවෙයි’’ – පොහොට්ටුවේ පිපිරීම පාර්ලිමේන්තුවේදී එළියට (වීඩියෝ) appeared first on ColomboXnews.