සුලු මානසික ගැටලු ජීවිත ව්‍යසනයකින් කෙළවර වෙන්නට ඉඩ නොතබන්න

ඔවුන් කැඳවාගෙන පැමිණියේ ඔවුන් දෙදෙනාගේ මව්පියන් විසිනි.

තරුණ යුවතිපතීන් ගෙන් සැමියාට බිරිඳගෙන් දික්කසාද වීමට අවශ්‍ය විය. විවාහ වී නොබෝ කලකින්ම එසේ වීම මව්පියන් බලවත් සේ පීඩා කරවීය. යුවතිපතීන්ට ප්‍රථමයෙන් මව්පියෝ සිව්දෙනම පැමිණියා නොව එක්වරම උපදේශන කාමරයට කඩා වැදුනාහ.

හතර දෙනාම එකවර කතා  කරන්නට වූහ.

” මැඩම් මේ දෙන්නා බැඳලා මාස හතරයි. කිසිම අඩුවක් නෑ. හැමදේම තියනවා. මගේ පුතා තමයි වෙන්වෙන්න ඕන කියන්නෙ”

” මගේ දුව නරක කෙනෙක් නෙවෙයි. වරදක් තියනව නම් හදාගන්න පුළුවන්නෙ”

” නෑයන්ට මුහුණ දෙන්නෙ කොහොමද?”

කතා වල සාරාංශය එය විය. ඔවුන් කාමරයෙන් පිටතට යැවූ මම තරුණ යුවළ කාමරයට කැඳවීමි.

අපූරු පෙනුමැති තරුණ යුවළ සිත පහන් කරවිය.

දෙදෙනාම රැකියා කරති. සැමියා Work from home නිරත වෙද්දී බිරිය සේවා මුර සහිත උසස් රාජකාරියක නිරත වෙයි.

රාජකාරි හමාර කර නිවසට පැමිණෙන බිරිඳ ” අද කවුද ගෙදරට ආවේ ” යනුවෙන් විමසන්නීය. බොහෝ විට නිවසට යහළුවෙක් නෑයෙක් කවුරු හෝ පැමිණි බව සැමියා පවසයි. සමහර දිනෙක කිසිවෙකු පැමිණියේ නැති බව කීවත් බිරිඳ පිළිනොගනී. පසුව සැමියාට පැමිණි කෙනා මතක් වෙයි.

බිරිඳ මෙසේ කියන්නේ කෙසේද යන්න සැමියාට මහත් ගැටළුවකි.

ගෙදර මොන දේ කළත් ඒවා බිරිඳ තිබ්බ තරම්ම හොඳට හොයන්න බැරි වෙන්නම නැවත සකස් කර තිබ්බත් බිරිඳ එය සොයාගන්නා ආකාරය ඔහුට පුදුමය දැනවීය.

කවුරුන් හෝ පැමිණ ගිය පසු සැමියා නිවස තිබූ තත්වයෙන්ම ඒ අයුරින්ම සකසයි. විශේෂයෙන් මිතුරන් පැමිණ ගියවිට එසේ කරයි.

එහෙත් බිරිඳ කවුරුන් හෝ පැමිණි බව  දැනගනී. මෙය සැමියාට විටෙක කරදරයක් විය.

” කොහොමද මෙයා මං කරන දේවල් දැනගන්නෙ” ඔහුගේ සිත විමසන්නට විය. නරකම සිදුවීම වූයේ ඔවුන් මා හමුවීමට සතියකට කලිනි. එදින නිවසට කිසිවෙකු පැමිණියේ නැති බව සහතිකය.

බිරිඳ විමසද්දී සැමියා,  “නැත” යන උත්තරය දිගටම දුන්නේ කිසිවෙක්ම නිවසට නොපැමිණි බැවිණි. බිරිඳ එය පිළිගත්තේ නැත.

එදා රාත්‍රිය අමිහිරි විය. සැමියා කෝප විය. ඔහු බිරිඳට තරයේ දොස් නැගීය.

” මාව සැක කරනවා, මට එපා වෙලා තියෙන්නෙ” සැමියා ගෝරනාඩු කළේය.

දෙදෙනාම බඩගින්නේ නින්දට ගියහ. සැමියාට නින්ද යාගෙන එනවිටම යමක් මතක් විය.

සපත්තු මහන්නකු මිදුළට කැඳවා තම සපත්තුවේ අඩුපාඩුවක් හදාගත් අයුරු සිහිවිය.

සැමියා ඒ මොහොතේම බිරිඳව අවදිකර තමාට අමතකව ගිය නිවසට පැමිණි පුද්ගලයා ගැන පැවසීය.

” මං දන්නවා”  කියූ බිරිඳ අනිත් පැත්ත හැරී නිදාගත්තාය.

සැමියා පසුදා උදෑසන බිරිඳ එය දැනගත් ආකරය විමසීය. බිරිඳ එය පැවසීම ප්‍රතික්ෂේප කළාය.

“මේ වගේ භයානක ගෑනියෙක් එක්ක ඉන්න බෑ… මට දික්ක්සාද වෙන්න ඕන”  යනුවෙන් පවසමින් සැමියා මව්පියන්ගේ නිවසට ගොස් නතර වී ඇත.

දෙදෙන තනිව කතාකරන විට බිරිඳගෙන් මම මේ ගැන විමසුවෙමි.

” එයා මං තියල තියන ඒවා වෙනස් විදියකට හදල තියල තියනව. හවස එනකොට මං දකිනව. එතකොට මං අහනව. වෙන දෙයක් නොවෙයි”

“වෙනස් විදියකට කිව්වෙ?”

” ඒ කිව්වෙ සෝෆා එක උඩ තියන කොට්‍ට ඕඩර් එක මාරුකරලා, ඒවා උඩයට මාරු කරලා තියනව. භාජන පාවිච්චි කරල ආපහු තියන විදියෙන් තමා දැනගන්නෙ”

” එතකොට මේ අන්තිම සිද්ධිය දැනගත්තෙ කොහොමද? කවුරුත් ගෙට ඇවිත් නෑනෙ”

” ඔව් කවුරුත් ගෙට ඇවිත් නෑ. එයා ඒ උනාට තේ හදල තියනව. එයා තේ බොන්නෙ නෑ”

” ඔයා කොහොමද දැන ගත්තෙ තේ හැදුවා කියලා?”

” මං හැමදේම පිළිවෙලකට තියන්නෙ. මං සීනි බෝතලේ හැන්ද තියන්නෙ වම් පැත්තට ඇල කරලා. ඒත් මං එනකොට ඒක දකුණු පැත්තට ඇල කරලා තිබ්බෙ”

සැමියා තේ සෑදූ බව පිළිගත්තේය.

පසුව දෙදෙනාට අවශ්‍ය  උපදේශනය ලබා දුනිමි.

බිරිඳට වෛද්‍ය ප්‍රතිකාර ගන්නට උපදෙස් දුනිමි.

ඇය OCD ( Obsessive Compulsive Disorder)  හෙවත් ග්‍රස්ථිය  නම් සුළු මානසික තත්වයක සිටියාය.

ඔවුන් දික්කසාද වූයේ නැත. සතුටින් වෙසෙති.

පවුල් ජීවිතයේ ඉතාම සුළු සිද්ධීන්වලට මහා වැදගත්කමක් දී  එය එකම සතුට කරගැනීමට යෑමත්, අනවශ්‍ය කලබලයකට පත්ව විවාහය හැරදමා යෑමත් යන කාරණා දෙක  දෙසම සන්සුන්ව ඉවසීමෙන් විසඳා ගැනීම විවාහ දිවියේ සතුටට සහ ප්‍රිතීයට හේතු වේවි!!

ජ්‍යෙෂ්ඨ මනෝ උපදේශිකා = එෂාමා කාරියකරවන

The post සුලු මානසික ගැටලු ජීවිත ව්‍යසනයකින් කෙළවර වෙන්නට ඉඩ නොතබන්න appeared first on ColomboXnews.