සභාපති අස්වෙයි: අස්වැසුම සල්ලි හිර වෙයි

ශුභසාධන ප්‍රතිලාභ මණ්ඩලයේ සභාපති ධුරය දැරූ බී. විජයරත්න ඉල්ලා අස්වීමේ ලිපිය භාර දී තිබෙන බැවින් අස්වැසුම වැඩසටහනට අදාළ දීමනා මුදල් ප්‍රතිලාභීන්ගේ බැංකු ගිණුම් වෙත බැර කිරීමට ඊයේ (අගෝ. 15) දිනයේ නොහැකි වී තිබේ.ෙ ශුභසාධන ප්‍රතිලාභ මණ්ඩලය දීමනා මුදල් බැංකු ගිණුම් වෙත බැර කිරීමට ඊයේ දිනය යොදාගෙන තිබුණු අතර සභාපති ධුරය හිස්ව පවතින බැවින් එම කාර්ය කලින් සැලසුම් කළ පරිදි සිදුකිරීමට නොහැකි වී ඇත.

මේ පිළිබඳව කළ විමසීමකදී බී. විජයරත්න සඳහන් කළේ ශුභසාධන ප්‍රතිලාභ මණ්ඩලයේ සියලු සාමාජිකයන්ගේ එකඟතාව අනුව බැංකු ගිණුම් වෙත මුදල් බැර කිරීමට සියලු කටයුතු යොදා තිබුණු බව ත්, තමාට ඉල්ලා අස්වීමට සිදුවූ බැවින් ප්‍රතිලාභීන්ට ඊයේ දිනයේදී අස්වැසුම මුදල් ලබා ගැනීමට තිබූ අවස්ථාව මගහැරී ගිය බව ත් ය. තමාගේ ඉල්ලා අස්වීම පිටුපස මාධ්‍යයට පැවසිය නොහැකි කරුණු තිබෙන බව පැවසූ හිටපු සභාපතිවරයා කෙසේ වෙතත් ඉල්ලා අස්වීමේ ලිපියෙහි ස්ව කැමැත්තෙන් ඉල්ලා අස්වූයේ යැයි සඳහන් කළ බව කීවේ ය.

අස්වැසුම වැඩසටහනට අදාළව මතුවූ යම් ගැටලුකාරී තත්ත්වයක් හේතුවෙන් පෙරේදා දිනයේදී ඉල්ලා අස්වීමේ ලිපිය භාර දී නිවසට ගිය බව ද හෙතෙම පැවසීය.

අඩු ආදායම්ලාභීන්ට අස්වැසුම ප්‍රතිලාභය ලබා දීම සඳහා පසුගිය මාස කිහිපය තුළ තමා වෙහෙසී රාජකාරිය සිදුකළ බව ත්, එහි අවසන් වැඩ කොටස සිදුකිරීමට නොහැකිවීම ගැන කනගාටු වන බව ත් ඔහු කීවේ ය.

මේ අතර, වෙනත් රාජ්‍ය ආයතනයක ප්‍රධාන තනතුරක් ලබා දෙන බවට තමාට දැනුම් තිබෙන බව ද බී. විජයරත්න සඳහන් කළේ ය.

අස්වැසුම ශුභසාධන ප්‍රතිලාභී වැඩසටහන යටතේ අභියාචනා සහ විරෝධතා සමාලෝචන ක්‍රියාවලිය අවසන් කර ගත යුතු බවට එළැඹ තිබූ එකඟතාවන්ට පිටින් තීන්දු තීරණ ගැනීම හේතුවෙන් නිලධාරීන් හා දේශපාලනඥයන් අතර ගැටුම්කාරී තත්ත්වයක් නිර්මාණය වී තිබෙන බවට පසුගිය දිනවල චෝදනා එල්ල විය.

අස්වැසුම වැඩසටහනට අදාළව විරෝධතා ඉදිරිපත්ව ඇති ප්‍රතිලාභීන්ගේ ගෙවීම් තාවකාලිකව අත්හිටුවන බවට සමාජ ප්‍රතිලාභ මණ්ඩලය මීට පෙර ප්‍රකාශ කර තිබූ නමුත් විරෝධතා සමාලෝචන ක්‍රියාවලිය අවසන් වන තෙක් ප්‍රතිලාභ ගෙවීමට අමාත්‍ය මණ්ඩල එකඟතාව ලැබී තිබිණි.

ශුභසාධන ප්‍රතිලාභ මණ්ඩලයේ නව සභාපති ධුරයට ජයන්ත විජේරත්නගේ නම නිර්දේශ කරන බව ජනාධිපති රනිල් වික්‍රමසිංහ ආණ්ඩුක්‍රම ව්‍යවස්ථාදායක සභාවට දන්වා තිබේ.

ශුභසාධන ප්‍රතිලාභ මණ්ඩලයේ හිටපු සභාපති බී. විජයරත්න එම ධුරයෙන් ඉල්ලා අස්වීමෙන් ඇති වූ පුරප්පාඩුව මත මෙම දැනුම් දීම සිදුකර ඇත. ජයන්ත විජේරත්න ශ්‍රී ලංකා පරිපාලන සේවය හිටපු විශේෂ ශ්‍රේණියේ නිලධාරියෙකි.

The post සභාපති අස්වෙයි: අස්වැසුම සල්ලි හිර වෙයි appeared first on ColomboXnews.