වකුගඩු රෝගීන්ට කෙරෙන අත්‍යවශ්‍ය ප්‍රතිකාරයක් වන රුධිර කාන්දුකරණය (ඩයලයිසිස්) සඳහා අවශ්‍ය ඩයලයිසර් ඇතුළු උපකරණ හිඟවීම හේතුවෙන් රට පුරා ප්‍රධාන රෝහල්වලින් එම ප්‍රතිකාරය ලබාදීම අකර්මණ්‍ය වීමේ අවදානමක් මතුව ඇතැයි සෞඛ්‍ය ක්ෂේත්‍රයේ ආරංචි මාර්ග හෙළි කරයි.
මේ තත්ත්වය තුළ ප්‍රධාන රෝහල් කිහිපයක අධිජීවිත අවදානම් සහිත රෝගීන් පමණක් රුධිර කාන්දුකරණ ප්‍රතිකාරඒකකයට යොමු කෙරෙන බව ද එම ආරංචි මාර්ග සඳහන් කළේ ය.
මේ හේතුවෙන් රජයේ රෝහල්වලින් එම ප්‍රතිකාරය ලබා ගත් ඇතැම් රෝගීන් පෞද්ගලික අංශය වෙත නැඹුරු වී ඇති අතර මේ හේතුවෙන් පෞද්ගලික රෝහල්වල ද රුධිර කාන්දුකරණය සඳහා යම් තදබදයක් නිර්මාණය වී ඇති බව පැවසේ.
පෞද්ගලික අංශයෙන් එක් වරකදී රුධිර කාන්දුකරණය ප්‍රතිකාරය ලබා ගැනීම සඳහා රුපියල් එකොළොස් දහසකට වැඩි මුදලක් වැය කිරීමට වකුගඩු රෝගීන්ට සිදුව ඇත.
මේ පිළිබඳව අප කළ විමසීමකදී වෛද්‍ය සංගම් පෙන්වා දුන්නේ සෞඛ්‍ය අමාත්‍යාංශයේ වෛද්‍ය සැපයුම් අංශයේ පවා රුධිර කාන්දුකරණය (ඩයලයිසිස්) සඳහා අවශ්‍ය ඩයලයිසර් ඇතුළු උපකරණවල තොග හිඟ වී ඇති බව ය.
පසුගිය කාලයේදී ඇතැම් මූලික රෝහල්වල රුධිර කාන්දුකරණ යන්ත්‍ර සවි කොට රුධිර කාන්දුකරණය සඳහා පහසුකම් සලසා තිබුණ ද මේ වන විට ඒ සඳහා අවශ්‍ය ඩයලයිසර් හිඟ වීම නිසා ඒවා ද අඩාල වී ඇති බව එම සංගම් කීය.
ඇතැම් රෝහල්වල ඇති ප්‍රතිපාදන හා පෞද්ගලික ආධාර මත රෝගීන්ගේ ජීවිත සුරක්ෂිත කිරීමට රුධිර කාන්දුකරණය කරන තැනට සෞඛ්‍ය ක්‍ෂේත්‍රය පත්වී ඇති බව ද ඔවුහු පෙන්වා දෙති.
මේ අතර, එම යන්ත්‍ර නඩත්තු කිරීම සඳහා සේවකයන්ගේ ද හිඟයක් පවතින බව වාර්තා වේ. මේ හේතුවෙන් ඒවායේ නඩත්තු කටයුතු නිසියාකාරයෙන් සිදු නොවන බවට ද චෝදනා එල්ල වේ.
රුධිර කාන්දුකරණය සඳහා රෝහල්වල ස්ථාපනය කර ඇති යන්ත්‍ර සියල්ලක් ම පාහේ සක්‍රිය තත්ත්වයේ නොපවතින බව සෞඛ්‍ය අමාත්‍ය කෙහෙළිය රඹුක්වැල්ල මේ පිළිබඳව කළ විමසීමකදී පැවසීය.
ඒවා නඩත්තු කරන කාර්ය මණ්ඩලවල හිඟයක් නැතත් එම යන්ත්‍ර නඩත්තු කිරීම සඳහා ප්‍රමාණවත් තරම් මුදල් ප්‍රතිපාදන නොමැති බව ඔහු කීය.
එක් වසරකදී එම යන්ත්‍ර නඩත්තු කිරීමට මිලියන 4ක පමණ මුදලක් වැය වන බව ද හෙතෙම පෙන්වා දුන්නේ ය.
මෙතරම් කාලයක් එම යන්ත්‍ර නඩත්තු කටයුතු මුදල් ගෙවන පොරොන්දුවෙන් දැනහැඳුනුම්කම් මත කර ගත්ත ද තවදුරටත් එසේ කළ නොහැකි තැනට පත්ව ඇතැයි ද ඇමතිවරයා සඳහන් කළේ ය.
ඒවා නඩත්තු කිරීමට අදාළ මුදල් ලබා ගැනීම සම්බන්ධයෙන් මහා භාණ්ඩාගාරය සමග ඊයේ (ජූනි 7) සාකච්ඡාවක් පැවති බව ත් එයට අවශ්‍ය මුදල් අද (ජූනි 8) දිනයේදී නිදහස් කිරීමට ඔවුන් එකඟ වූ බව ත් ඔහු කීය.
The post වකුගඩු රෝගීන් අවධානමේ – රට පුරා රෝහල්වල ප්‍රතිකාර ඇණ හිටින ලකුණු appeared first on ColomboXnews.
Source From Colomboxnews
Author: Kamal Dhammika
#SriLanka #News #lka