ලාංකික ශ්‍රමිකයන් ඊශ්‍රායලයට යොමු කිරීම අත්හිටුවූ බවත්, ඉදිරි දින කිහිපයේදී එම රටට යාමට සිටි අයට ඒ පිළිබඳව දැනුම් දුන් බව ත් කම්කරු, විදේශ රැකියා අමාත්‍ය මනුෂ නානායක්කාර පවසයි.
පවතින යුදමය වාතාවරණය හමුවේ ඊශ්‍රායලයේ සිටින ශ්‍රී ලාංකිකයන්ට යළි මෙරට පැමිණීමට අවශ්‍ය කරන පහසුකම් සලසා ඇති බව ද අමාත්‍යවරයා ඊයේ (ඔක්. 11) පැවසීය.
ඔවුන්ට ඊශ්‍රායලයේ තානාපති කාර්යාලය වෙත ඕනෑ ම අවස්ථාවක පැමිණීමට විවෘතව පවතින බව පැවැසූ ඇමතිවරයා එරට ගුවන්තොටුපොළ ආශ්‍රිතව ද ශ්‍රී ලාංකිකයන්ට ගැටලුවක් ඇති නොවන පරිදි වටපිටාව සකස් කර තිබෙන බව සඳහන් කළේ ය.
විදේශ කටයුතු අමාත්‍යාංශය, ශ්‍රී ලංකා විදේශ සේවා නියුක්ති කාර්යාංශය, ඊශ්‍රායලයේ තානාපති කාර්යාලය සහ එරට පීබා ආයතනය එක්ව මේ දිනවල සම්බන්ධීකරණ කටයුතු කරන බව ද හෙතෙම ප්‍රකාශ කළේ ය.
පවතින යුදමය වාතාවරණය හමුවේ ඊශ්‍රායලයේ සිටින ශ්‍රී ලාංකිකයන්ගේ ආරක්ෂාව තහවුරු කිරීම සඳහා ගත හැකි සියලු පියවර ගෙන ඇතැයි ද ඇමතිවරයා පැවසීය.
එසේ ම, ඊශ්‍රායලයේ ජනගහන සංක්‍රමණ අධිකාරියේ හා විදේශ කටයුතු අමාත්‍යාංශයේ අවසර ගැනීමෙන් පමණක් මින් ඉදිරියට ඊශ්‍රායලයේ රැකියා සඳහා ශ්‍රී ලාංකිකයන් යොමු කරන බව ශ්‍රී ලංකා විදේශ සේවා නියුක්ති කාර්යාංශය සඳහන් කළේ ය.
ඊශ්‍රායල – පලස්තීන ගැටුම් හේතුවෙන් නිර්මාණය වී ඇති අනාරක්ෂිත තත්ත්වය සැලකිල්ලට ගෙන මෙම තීරණය ගත් බව එම කාර්යාංශයේ නියෝජ්‍ය සාමාන්‍යාධිකාරි ගාමිණි සෙනරත් යාපා පැවසීය.
අතුරුදන්ව ඇතැයි පැවැසෙන ශ්‍රී ලාංකිකයන් දෙදෙනා පිළිබඳව තොරතුරු ලබා ගැනීමට කඩිනම් පියවර ගෙන ඇති බව පැවසූ නියෝජ්‍ය සාමාන්‍යාධිකාරිවරයා මොවුන් දෙදෙනා හැරුණු විට වෙනත් අයෙකු පිළිබඳ තොරතුරක් දැනගන්නට ලැබී නැති බව ප්‍රකාශ කළේ ය.
යුද ගැටුම් හේතුවෙන් වෙඩි වැදී ඇතැයි පැවැසෙන අනුලා නමැති කාන්තාවගේ මෘත දේහය හඳුනා ගැනීමට මේ දක්වා අවස්ථාව ලැබී නැති බවත්, ඇයට වෙඩි තැබූ බවට ඇසින් දුටු සාක්ෂියක් ඊශ්‍රායලයේ තානාපති කාර්යාලයේ ඇතැයි දැනුම් දී තිබෙන බව ත් හෙතෙම කීවේය.
මොවුන් පිළිබඳව තොරතුරක් ලබා දෙන ලෙසට තානාපති කාර්යාලය අවශ්‍ය ආයතනවලට ඉල්ලීම් කර තිබෙන බව පැවසූ නියෝජ්‍ය සාමාන්‍යාධිකාරි ගාමිණි සෙනරත් යාපා ශ්‍රී ලංකා විදේශ සේවා නියුක්ති කාර්යාංශයේ 1989 අංකයට කතාකොට සිදුකරන විමසීම් පිළිබඳව අනිවාර්යයෙන් ක්‍රියාමාර්ග ගන්නා බව සඳහන් කළේ ය.
මේ අතර, ඊශ්‍රායලයේ වෙසෙන ශ්‍රී ලාංකිකයන්ට අවශ්‍ය ඕනෑ ම විටක මෙරටට පැමිණීමට අවස්ථාව දී ඇතැයි ද නියෝජ්‍ය සාමාන්‍යාධිකාරිවරයා පැවසීය.
ඒ සඳහා ඊශ්‍රායලයේ තානාපති කාර්යාලය අවශ්‍ය ම පහසුකම් සපයා තිබෙන බව පැවසූ හෙතෙම වාණිජ ගුවන් යානා භාවිත කර ඔවුන්ට ලංකාවට පැමිණිය හැකි බව ද ප්‍රකාශ කළේ ය.
The post ලාංකික ශ්‍රමිකයන්ගේ ඊශ්‍රායල රැකියා ගමන් වහා ම නවත්වයි appeared first on ColomboXnews.
Source From Colomboxnews
Author: Kamal Dhammika
#SriLanka #News #lka