රාජගිරියේදී තරුණයෙකු රිය අනතුරට ලක්කිරීම සම්බන්ධයෙන් චම්පිකට අධි චෝදනා භාරදෙයි

අපරික්ෂාකාරී ලෙස රිය පදවා අනතුරක් සිදුකිරීම සහ අනතුරක් වළක්වා ගැනීමට කටයුතු නොකිරීම ඇතුළු චෝදනා එල්ල වී සිටින හිටපු අමාත්‍ය පාඨලී චම්පික රණවකට එරෙහිව අද (04) කොළඹ මහාධිකරණය හමුවේ අධිචෝදනා කියවා භාරදී තිබෙනවා.

2016 වසරේ සන්දීප් සම්පත් නැමැති තරුණයකු රාජගිරිය ප්‍රදේශයේ දී බරපතල රිය අනතුරකට ලක්කොට ඒ පිළිබඳව ‘තොරතුරු වසන් කිරීම’ සම්බන්ධයෙන් කොළඹ අපරාධ කොට්ඨාසය විසින් මෙම විමර්ශනය ආරම්භ කරනු ලැබ තිබේ. සිද්ධිය වූ අවස්ථාවේදී අදාළ වාහනය පැදවූයේ හිටපු අමාත්‍ය පාඨලී චම්පික රණවක බවට චෝදනා එල්ල විය.

මෙම නඩුව අද කොළඹ මහාධිකරණ විනිසුරු නාමල් වලල්ලේ මහතා ඉදිරියේ කැඳවනු ලැබූ විට එම අධිචෝදනා කියවා භාරදුන්නා.

2016 වසරේදී රාජගිරියේ සිදු වූ රිය අනතුර සම්බන්ධයෙන් වෙනත් රියදුරු යොදවා අධිකරණය නොමග යැවීම, නොසැලකිලිමත්ව රිය පදවා අනතුරක් සිදු කිරීම, අනතුරතක් සිදු කර පලා යාම ආදී චෝදනා කීපයක් යටතේ මීට මාස කිහිපයකට පෙර චම්පික රණවක මහතා අත්අඩංගුවට ගෙන රක්ෂිත බන්ධනාගාරගත කිරීමෙන් පසු මේ වනවිට ඇපමත මුදාහැර සිටී.

The post රාජගිරියේදී තරුණයෙකු රිය අනතුරට ලක්කිරීම සම්බන්ධයෙන් චම්පිකට අධි චෝදනා භාරදෙයි appeared first on ColomboXnews.