එක්සත් ජාතික පක්ෂයේ නායක රනිල් වික්‍රමසිංහ මහතා පාර්ලිමේන්තු මන්ත්‍රීවරයෙකු ලෙස මීට සුළු මොහොතකට පෙර කථානායකවරයා ඉදිරියේ දිවුරුම් දුන්නේය. එජාප ජාතික ලයිස්තු මන්ත්‍රී ධූරය සඳහා රනිල් වික්‍රමසිංහ මහතා මෙලෙස පත්විය.
දීර්ඝ කාලයක සිට එක්සත් ජාතික පක්ෂයට හිමි ජාතික ලැයිස්තු මන්ත්‍රී ධුරය සඳහා පුද්ගලයෙකු නම් නොකිරීමට එම පක්ෂය පියවර ගෙන තිබුණි. කෙසේවෙතත් පැවති සාකච්ඡා වට කිහිපයකින් අනතුරුව පක්ෂනායක රනිල් වික්‍රමසිංහ මහතාගේ නම ඒ සඳහා යෝජනා කිරීමට පසුගියදා පැවති කෘත්‍යාධිකාරී මණ්ඩල රැස්වීමේදී තීරණය කෙරුණි.
රනිල් වික්‍රමසිංහ මහතා අද පාර්ලිමේන්තුවේ දිවුරුම් දීමෙන් පසු අද දිනයේ ම පාර්ලිමේන්තුව ඇමතීය.
ඔහු කියා සිටියේ අද වන විට රට දැවැන්ත ආර්ථික අර්බුදයකට පත්ව ඇති බවත් ඉන් ගොඩ ඒමට ඇති එකම මාර්ගය ජාත්‍යන්තර මූල්‍ය අරමුදල සමග ගණුදෙනු කිරීම බවත්ය.
අතීතය ගැන කතා කිරීමෙන් රට පත්ව ඇති තත්ත්වයෙන් ගොඩගත නොහැකි බවද පැවසූ ඔහු ජාත්‍යන්තර මූල්‍ය අරමුදල සමග ගනුදෙනු කිරීමට රජය අකමැති නම් විකල්පය කුමක්දැයි හෙළි කරන්න ඉල්ලා සිටියේය.
වත්මන් ආර්ථික අර්බුදයට හේතුව පවතින කොරෝනා වසංගත තත්ත්වය බවත් එය පාලනය සඳහා පත් කර ඇති කාර්ය සාධක බලකාය සම්පූර්ණයෙන්ම අසාර්ථක බව ඔහු තවදුරටත් කියා සිටියේය.
දෙපාර්තමේන්තු ප‍්‍රධානියෙක් වන හමුදාපතිවරයාට කොරෝනා මර්ධය කිරීමේ ප‍්‍රධානත්වය දැරිය නොහැකි බවත් ඔහු පැවසීය.
ඔහු යෝජනා කලේ කොරෝනා පාලනය ව්‍යවස්ථානුකූලව කැබිනට් මණ්ඩලය විසින් අග්‍රාමාත්‍යවරයා සහ ඇමැතිවරුන් විසින් භාරගෙන සිදුකළ යුතු බවයි.
The post රනිල් එජාප මන්ත්‍රී ධූරයේ දිවුරුම් දෙයි (වීඩියෝ) appeared first on ColomboXnews.
Source From Colomboxnews
Author: Kamal Dhammika
#SriLanka #News #lka