මීළඟ පාර්ලිමේන්තු රැස්වීමේදී ආණ්ඩු පක්ෂයේ අසුන් ගන්නවා – ඩයනා ගමගේ

මීළඟ පාර්ලිමේන්තු රැස්වීමේදී තමා ආණ්ඩු පක්ෂයේ අසුන් ගන්නා බවත් තවදුරටත් සමගි ජනබලවේගය පක්ෂයේ රැදී සිටීමට බලාපොරොත්තුවක් නොමැති බවත් සමගි ජනබලවේගය පක්ෂයේ ජාතික ලැයිස්තු පාර්ලිමේන්තු මන්ත්‍රිනී ඩයනා ගමගේ මහත්මිය ප්‍රකාශයක් කරමින් පවසා සිටියාය.

20 වැනි ආණ්ඩුක්‍රම ව්‍යවස්ථා සංශෝධනයට සහය දැක්වීම සඳහා තමා ශත පහක මුදලක් කිසිඳු අයෙකුගෙන් ලබා නොගෙන ඇති අතර එලෙස මුදල් ලබා ගත් බවට සනාථ කළහොත් තම මන්ත්‍රී ධුරයෙන් ද ඉල්ලා අස්වීමට සුදානම් බව ඩයනා ගමගේ මහත්මිය පවසයි.එහෙත් තමාව කිසි විටෙකත් එම පක්ෂයෙන් ඉවත්කළ නොහැකි බවත් තමාට ලැබුන ජාතික ලැයිස්තු මන්ත්‍රී ධුරය පක්ෂය නිසා ලැබුණු ධුරයක් බවයි ඇය පවසන්නේ.

ළඟදීම දේශපාලන තීන්දුවක් ගන්නා බවත් ඒ වෙනුවෙන් ආණ්ඩුව දෙන ඕනෑම තනතුරක් ලබා ගැනීමට සුදානම් බවත් ඩයනා ගමගේ මහත්මිය පවසයි. තම රට ගැන සිතා 20 වැනි ආණ්ඩුක්‍රම ව්‍යවස්ථා සංශෝධනයට සහය දැක්වූ බව පැවසු ගමගේ මහත්මිය රජයට සහය ලබා දෙන බව කලින් දවසේ තම සැමියා සමග එක්ව පක්ෂ නායක සජිත් ප්‍රේමදාස මහතාව දැනුවත් කල බව අවධාරණය කළාය. එසේම ගෝඨාභය රාජපක්ෂ මහතා පිළිබඳව මුලින්ම පැහැදීමක් ඇති වුණේ ඒ මහතා ආරක්ෂක ලේකම් ධුරය දැරූ කාලය තුළදීය. එහෙත් තමා ගත් තීන්දුව ආපස්සට ගැනීමට සුදානම් නැතැයි ඇය අවධාරණය කළාය.

තමා සහ තම සැමියා තනතුරු දරණ සමගි ජනබලවේගය පක්ෂය සජිත් ප්‍රේමදාස මහතාට දුන්නේ හදවතින්ම බවත් ඒ සඳහා කිසිදු අවස්ථාවක මුදල් ලබානොගත් බවත් ඇය පැවසිය.එසේම තමාට බ්‍රිතාන්‍යයේ ද්විත්ව පුරවැසිභාවය ඇති බවට ප්‍රකාශ කෙරුවත් එවැනි දෙයක් නොමැති බව පැහැදිලි කළ ගමගේ මන්ත්‍රීවරිය තම පවුලේ කිහිපදෙනෙක්ම අදටත් පදිංචිව සිටින්නේ බ්‍රිතාන්‍යයේ බව ප්‍රකාශ කළාය.මේ වනවිට තම සැමියාට අයත් ව්‍යාපාර කිහිපයක් බ්‍රිතාන්‍ය තුළ මෙන්ම තවත් රටවල් කිහිපයක ලියාපදිංචි කර ඇති බව ඇය පැවසිය.

20 වැනි ආණ්ඩුක්‍රම ව්‍යවස්ථා සංශෝධනය සම්මත කර ගැනීමට රජයට සහය දැක්වුවත් අද වනතුරු ජනාධිපති ගෝඨාභය රාජපක්ෂ මහතා හෝ අග්‍රාමාත්‍ය මහින්ද රාජපක්ෂ මහතා හෝ බැසිල් රාජපක්ෂ මහතා තමාට සුබ පැතුවේ නැති බව පාර්ලිමේන්තු මන්ත්‍රිනී ඩයනා ගමගේ මහත්මිය වැඩිදුරටත් පැවසීය.

The post මීළඟ පාර්ලිමේන්තු රැස්වීමේදී ආණ්ඩු පක්ෂයේ අසුන් ගන්නවා – ඩයනා ගමගේ appeared first on ColomboXnews.