මහින්දගේ රැස්වීම විමල්, වාසු, උදය මග හරී

මහින්ද රාජපක්ෂ අග්‍රාමාත්‍යවරයා අද (19) අරලියගහ මන්දිරයේදී කැඳවා තිබූ රැස්වීමට පොදුජන පෙරමුණේ සන්ධානගත පක්ෂ 10ක් සහභාගී වී නොමැති බව ආරංචි මාර්ග තහවුරු කරයි.

විමල් වීරවංශ,වාසුදේව නානයක්කාර අමාත්‍යවරුන් නායකත්වය දෙන පක්ෂ සහ තමන් නායකත්වය දෙන පිවිතුරු හෙළ උරුමය ඇතුළු පොදුජන පෙරමුණේ සන්ධානගත පක්ෂ 10ක් අග්‍රාමාත්‍යවරයා කැඳවා තිබූ රැස්වීමට සහභාගී නොවූ බව ගම්මන්පිල අමාත්‍යවරයා අවධාරණය කරයි.

පොදුජන පෙරමුණේ සිටින තවත් සන්ධානගත පක්ෂයක් වන ශ්‍රී ලංකා නිදහස් පක්ෂය මෙම රැස්වීමට සහභාගි වූ බවද ගම්මන්පිල අමාත්‍යවරයා තහවුරු කරයි.

ශ්‍රීලනීපයද, විමල් වීරවංශ, වාසුදේව නානයක්කාර, උදය ගම්මන්පිල යන අමාත්‍යවරුන් ඇතුළු පොදුජන පෙරමුණේ සන්ධාන ගත පක්ෂ 12ක එකතුවකින් සෑදී විකල්ප පිලේ සාමාජිකයෙකුද වේ.

මතභේදයට තුඩු දී ඇති පළාත් සභා මැතිවරණ කෙටුම් පත ,එළඹෙන මැයි දිනය පොදුජන පෙරමුණ යටතේ සියලු පක්ෂවල සහභාගීත්වයෙන් පැවැත් වීම යන කරුණු අග්‍රාමාත්‍යවරයාගේ ප්‍රධානත්වයෙන් පැවැත්වීමට සූදානම් කොට තිබූ රැස්වීමේදී සාකච්ඡා කොට එකඟතාවකට පැමිණීමට බලාපොරොත්තු වූ මූලික කරුණු අතර වේ.

මෙම සාකච්ඡා වර්ජනය කළ සන්ධාන ගත පක්ෂ මීට පෙර මෙම සාකච්ඡාවට සහභාගි වන බව දැනුම් දී තිබුණි.

මෙම සාකච්ඡාවෙන් අනතුරුව එළඹෙන මැයි දිනය පොදුජන පෙරමුණ සමඟ පවත්වනවාද ? නැද්ද ? යන්න පිළිබඳව තීරණයක් ගැනීමටද සන්ධාන ගත පක්ෂ සූදානමින් සිටින ලදී.

එළඹෙන මැයි දිනය තනිව පැවැත්වීමට මේ වන විටත් ශ්‍රීලනීපය තීරණය කොට ඇති අතර ශ්‍රීලනිපය සමග ඒකාබද්ධව මැයි දිනය මේ පැවැත්වීමට ඉහත සඳහන් අමාත්‍යවරුන් නායකත්වය දෙන පක්ෂ 12 කණ්ඩායමද සූදානමින් සිටි අතර ඒ සම්බන්ධයෙන් අවසන් තීන්දුව අග්‍රාමාත්‍යවරයා සමඟ පැවැත්වෙන සාකච්ඡාවෙන් පසුව ගැනීමටද සූදානමක් තිබුණි.

The post මහින්දගේ රැස්වීම විමල්, වාසු, උදය මග හරී appeared first on ColomboXnews.