බැසිල්ගේ ගෝලයා මධ්‍යම පරිසර අධිකාරියේ සභාපති, සිරිපාල අමරසිංහ ලෝක උරුම නකල්ස් රක්ෂිතය වනසමින් අනවසර හෝටලයක් ඉදි කරලා

• වැලිවිට සරණංකර හිමියන් ස්නානය කළ තැනත් සමතලා කරලා…
• කුඹුරු ගොඩකරමින් මීටර දෙසියක මාර්ගයක් හදලා…

මධ්‍යම පරිසර අධිකාරියේ සභාපති සිරිපාල අමරසිංහ සහ ඔහුගේ පුතු තරින්ද අමරසිංහ විසින්  ඓතිහාසික, සංස්කෘතික සහ කෘෂිකාර්මික වශයෙන්ද අතිශය වැදගත් පාරිසරික සංවේදි භූමිභාගයක සිදු කරගෙන යනු ලබන හෝටල් සංකීර්ණයක් ඉදි කිරීමක තොරතුරු මාතලේ රත්කිඳ ප්‍රදේශයෙන් වාර්තා වේ.

ලෝක උරුම නකල්ස් රක්ෂිතයට මායිම්ව පිහිටි මේ ප්‍රදේශය හරහා මොරගහකන්ද ජලාශයට ජලය සපයන ප්‍රධාන මූලාශ්‍රය දෙකෙන් එකක් වන තේලගමුව ඔය ගලා යන අතර, දීර්ඝ කාලීනව කෘෂිකාර්මික කටයුතුවලට ජලය සපයන කටුපොල්ලන්ද කටුකිතුලේ ඇළ පිහිටා තිබේ.

ඔයට මීටර් 100ක් පමණ නුදුරින් හෝටලයේ ඉදි කිරීම් සිදු වන අතර, එහි සිට සංචාරකයන්ටඔයට යෑමට ගල් ඇතිරූ පඩිපෙළ සහිත මාර්ගයක්ද සැකසෙමින් පවතී. මේ ප්‍රදේශය වැලිවිට සරණංකර සඟරජ හිමියන් දිය නෑ තොටක් ලෙස ඇටම්වල ගම්වැසියන් විශ්වාස කරන අතර, ඒ ආශ්‍රිතව ඔවුහු කිරි ඉතිරවීමේ මංගල්‍යයක්ද පවත්වයි.

සංචාරකයන් ගැවසෙන්න පටන් ගත් කල මේ සංස්කෘතික අගයන්ට හානි පැමිණිය හැකි බව ඔවුන්ගේ අදහසයි. ඒ අතර මේ මාර්ගයේ ඉදිකිරීම්වලදී ඔයේ ජල පෝෂක ප්‍රදේශයටද හානි වී ඇති බවද ඔවුහු පෙන්වා දෙති.

හෝටල් සංකීර්ණයට ළඟා වීම සඳහා අඩි 6ක් පළල, මීටර් 500ක දිගින් යුත් ප්‍රවේශ මාර්ගය නිම වෙමින් ඇත්තේ කටුකිතුලේ ඇළ හරහා බුලත්වැල්හේන මැදින් වන අතර මේ වන විට එහි මීටර් 200ක පමණ කොටසක වැඩ අවසන්ව පවතී. මේ ඉදිකිරීම් නිසා ඇළ ඉවුරුවල ස්වාභාවික ගල් පවා ඉවත් කරනු ලැබ ඇති අතර එමඟින් ඇළ ඛාදනය වීමක්ද රොන් මඩ ගලා යෑම නිසා තේලගමු ඔයේ ජල දූෂණයකද අවදානම පවතී.

කුඹුරු හිමියන්ට විවිධ උපකාර කර, කුඹුරු කරා හොඳ පිවිසුම් මඟක් සකසා දෙන බව ඒත්තු ගන්වා ඔවුන් ලවා පල්ලේගම ප්‍රාදේශීය ලේකම්වරයා වෙතින් ගත් අවසරයක් හැරෙන්නට ප්‍රදේශයේ භූ දර්ශනයට අනුව මධ්‍යම පරිසර අධිකාරියෙන්, වන සංරක්ෂණ අධිකාරියෙන්, කෘෂිකර්ම දෙපාර්තමේන්තුවෙන් කිසිදු නෛතික අවසරයක් මේ හෝටල් සංකීර්ණයේ හිමි කරුවන් ලබා ගෙන නැත.

The post බැසිල්ගේ ගෝලයා මධ්‍යම පරිසර අධිකාරියේ සභාපති, සිරිපාල අමරසිංහ ලෝක උරුම නකල්ස් රක්ෂිතය වනසමින් අනවසර හෝටලයක් ඉදි කරලා appeared first on ColomboXnews.