පිටකොටුව මැනිං වෙළෙඳපොළ ඉඩමත් විකිණීමට …?

පිටකොටුව මැනිං වෙළෙඳපොළ පිහිටි ඉඩම විකිණීමේ සැලසුමක් පිළිබඳව කරුණු අනාවරණය වෙමින් තිබේ.

කොරෝනා වසංගතයට මුවාවී එම භූමිය කඩිනමින් හිස් කිරීමට ආණ්ඩුව කටයුතු කරමින් සිටී. මෙම සැලසුමේ පළමු අදියර වූයේ මැනිං වෙළෙඳපොළ තුළ සීඝ්‍රයෙන් කොරෝනා වසංගතය පැතිරෙන බවට ප්‍රවෘත්තියක් නිර්මාණය කිරීමයි. නාටාමිවරුන් 67ක් කොරෝනා ආසාදිතයින් බව ප්‍රකාශ කිරීම ඒ අනුව සිදුකෙරිණි. මේ පිළිබඳව අප කළ විමසුමකදී මැනිං මාර්කැට්ටුවේ වෙළෙන්ඳන් කීපදෙනෙක්ම පැවසුවේ එය බොරු ප්‍රවෘත්තියක් බවයි. එම ආසාදිත වූ නාටාමිවරුන් මැනිං වෙළඳපොළේ නොව පිටකොටුවේ වෙනත් ස්ථානවල කටයුතු කරන අය බව වෙළෙන්ඳන් පවසා සිටී.

මේ බව රටට හෙළිදරව් කිරීම සඳහා මාධ්‍ය සාකච්ඡාවක් මැනිං වෙළඳපොළේ වෙළෙන්ඳන් සූදානම් කර තිබුණද එය හදිසියේ අවලංගු කර ඇත.

එසේම මේ කොරෝනා පැතිරීම පෙන්වා පෑලියගොඩ තාවකාලික ස්ථානයකට කඩිමුඩියේ මැනිං වෙළෙඳපොළ ගෙනයාමට අමාත්‍ය මහින්දානන්ද අළුත්ගමගේ උත්සාහ කළද වෙළෙන්ඳන්ගේ විරෝධය හමුවේ එය ව්‍යර්ථ වී තිබේ.

හැකි ඉක්මනින් මැනිං වෙළෙඳපොළ ඉවත්කර එම ඉඩම නිදහස් කර ගැනීම ආණ්ඩුවේ ඉහළම තැනක අභිප්‍රාය වී ඇති අතර ඒ සඳහා පවතින කොරෝනා වසංගතය උපරිම ලෙස යොදාගැනීමට තීරණය කර ඇත.

කොළඹ නගර මධ්‍යයේ පිහිටි මෙම ඉඩම් ගනුදෙනුව සඳහා මිග් යානා ගනුදෙනුවටද සම්බන්ධ හිටපු තානාපතිවරයකු මැදිහත් වී ඇතැයි ආරංචි මාර්ග සඳහන් කරයි.

The post පිටකොටුව මැනිං වෙළෙඳපොළ ඉඩමත් විකිණීමට …? appeared first on ColomboXnews.