පරිපාලන ලේකම්ගේ ලිපියට එරෙහිව සජබ ගොනු කළ පෙත්සම් දෙක ම ඉල්ලා අස්කර ගනී

පළාත් පාලන මැතිවරණයට අපේක්ෂකයන්ගෙන් ඇප මුදල් භාර නොගන්නා ලෙසට නියෝග කරමින් රාජ්‍ය පරිපාලන අමාත්‍යංශයේ ලේකම් නීල් හපුහින්න දිස්ත්‍රික් ලේකම්වරුන් වෙත යැවූ ලිපිය අභියෝගයට ලක්කරමින් ශ්‍රේෂ්ඨාධිකරණය හමුවේ ගොනුකර තිබූ නඩු දෙකක් ඊයේ (මාර්තු 14) පෙත්සම්කරුවන් විසින් ඉල්ලා අස්කර ගනු ලැබිණි.

මෙසේ ඉල්ලා අස්කර ගනු ලැබුවේ සමගි ජන බලවේගයේ ප්‍රධාන ලේකම් රංජිත් මද්දුම බණ්ඩාර සහ සමගි ජන බලවේගයේ කොළඹ පුරපති අපේක්ෂක මුජිබර් රහුමාන් වෙනුවෙන් ගොනු කර තිබූ නඩු දෙකකි.

එවැනි තීරණයක් මගින් තම මූලික අයිතිවාසිකම් කඩ වී ඇති බව පවසමින් සමගි ජන බලවේගයේ මුජිබර් රහුමාන් මූලික අයිතිවාසිකම් පෙත්සමක් ගොනු කළ අතර, පළාත් පාලන මැතිවරණ අපේක්ෂකයන්ගෙන් ඇප මුදල් භාර නොගැනීමේ තීරණය බල රහිත කරන ලෙස ඉල්ලා සමගි ජන බලවේගයේ ප්‍රධාන ලේකම් රංජිත් මද්දුම බණ්ඩාර විසින් රිට් අයැදුම්පතක් ගොනු කර තිබිණි.

මෙම නඩුවල වගඋත්තරකරුවන් ලෙස රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යංශයේ ලේකම්, මැතිවරණ කොමසාරිස් ජනරාල්, මැතිවරණ කොමිසමේ සභාපති, නීතිපති සහ අමාත්‍ය මණ්ඩලය ඇතුළු 81 දෙනෙකු නම් කර තිබිණි.

රාජ්‍ය පරිපාලන අමාත්‍යංශයේ ලේකම් නීල් හපුහින්න පළාත් පාලන මැතිවරණය සඳහා අපේක්ෂකයන්ගෙන් ඇප මුදල් භාර නොගන්නා ලෙසට නියෝග කරමින් දිස්ත්‍රික් ලේකම්වරුන් වෙත ජනවාරි 10 වන දින ලිපියක් නිකුත් කළේ ය.

ජනවාරි 9 වන දින අමාත්‍ය මණ්ඩලය විසින් ගනු ලැබූ තීරණයට අනුව දිස්ත්‍රික් ලේකම්වරුන් වෙත මෙම නියෝගය නිකුත් කළ බව ඔහු පැවසීය.

සමගි ජන බලවේගයේ ප්‍රධාන ලේකම් රංජිත් මද්දුම බණ්ඩාර සිය පෙත්සමෙහි සඳහන් කළේ, නියමිත පරිදි ඉදිරිපත් කෙරෙන පළාත් පාලන මැතිවරණ අපේක්ෂකයන්ගෙන් නාමයෝජනා පත්‍ර සහ ඇප මුදල් භාර ගැනීමට වගඋත්තරකරුවන් 1946 අංක 53 (සංශෝධිත) පළාත් පාලන ආයතන මැතිවරණ ආඥා පනතේ 28, 29 සහ 30 වගන්තිවලට අනුව බැඳී සිටින බව ය.

දිවයිනේ සියලු ම පළාත් පාලන ආයතනවලට තරග කිරීමට සුදුසුකම් ලැබීම සඳහා සමගි ජන බලවේගය මුදල් තැන්පත් කිරීමට කටයුතු කරමින් සිටින බවත් ප්‍රාදේශීය ලේකම්වරුන් අමාත්‍ය මණ්ඩල නියෝගයට අනුව කටයුතු කරන්නේ නම් තම කටයුතු සඳහා එමඟින් බලපෑමක් ඇති වන බව ත් පෙත්සම්කරු සඳහන් කළේ ය.

පෙත්සම්කරුවන් වෙනුවෙන් පෙනී සිටි සම්පත් විජේවර්ධනගේ උපදෙස් මත ජනාධිපති නීතිඥ උපුල් ජයසූරිය සමඟ නීතිඥ නිසල ප්‍රනාන්දු ඊයේ (මාර්තු 14) අධිකරණයට දන්වා සිටියේ අදාළ පෙත්සම් ඉල්ලා අස්කර ගන්නා බව ය.

රාජ්‍ය පරිපාලන අමාත්‍යංශ ලේකම්වරයා විසින් නිකුත් කරන ලද ලිපිය ඉල්ලා අස්කර ගැනීම හේතුවෙන් මෙම පෙත්සම ඉල්ලා අස්කර ගත් බව සමගි ජන බලවේගයේ මහ ලේකම් රංජිත් මද්දුමබණ්ඩාර පැවසීය.

ලේකම්වරයා තමා අතින් සිදුවූ වර ද සකස් කර ගැනීමට පියවර ගත් හේතුවෙන් තවදුරටත් එය ඉදිරියට ගෙන යාමට අවශ්‍යතාවක් නොවූ බව ද හෙතෙම කීය.

The post පරිපාලන ලේකම්ගේ ලිපියට එරෙහිව සජබ ගොනු කළ පෙත්සම් දෙක ම ඉල්ලා අස්කර ගනී appeared first on ColomboXnews.