‘දෙදෙනෙක් අතරේ ඇති වන මත ගැටුම් සම්බන්ධයෙන් අපි විනය ක්‍රියාමාර්ග ගන්නේ නැහැ’ – පොහොට්ටු ලේකම් කියපු අමුතු කතාව

මාර්ග සංවර්ධන කටයුත්තක් සම්බන්ධයෙන් රාජ්‍ය අමාත්‍ය සනත් නිශාන්ත මහතා, රාජ්‍ය අමාත්‍ය නිමල් ලන්සා මහතාට බැන තර්ජනය කරන හඬපටය සම්බන්ධයෙන් තමන් නොදැනුවත් බව ශ්‍රී ලංකා පොදු ජන පෙරමුණේ මහ ලේකම් පාර්ලිමේන්තු මන්ත්‍රී නීතිඥ සාගර කාරියවසම් මහතා පවසයි. ඔහු මේ බව සඳහන් කළේ, අදාළ සිදුවීම සම්බන්ධයෙන් පක්ෂයෙන් යම් විනය ක්‍රියාමාර්ගයක් ගන්නේ ද? යන්න පිළිබඳව කළ විමසීමකදී අදහස් දක්වමිනි.

රාජ්‍ය අමාත්‍ය සනත් නිශාන්ත මහතා, රාජ්‍ය අමාත්‍ය නිමල් ලන්සා මහතාට බැන තර්ජනය කරන හඬපටයක් අද (පෙබ. 18) ප්‍රධාන මාධ්‍ය සහ සමාජ මාධ්‍යවල පළ වුණු අතර ඒ පිළිබඳව සමාජයේ ද දැඩි අවධානය යොමු වී තිබිණි.

තම බල ප්‍රදේශයේ සිදු කරන මාර්ග සංවර්ධන කටයුත්තක් නවතා දමන ලෙස එහිදී සනත් නිශාන්ත මහතා නිමල් ලන්සා මහතාට ප්‍රකාශ කරන අයුරු එම හඬපටයේ සටහන් වී තිබිණි.

කෙසේ වෙතත්, එවැනි සිදුවීමක් සම්බන්ධයෙන් මේ වන තෙක් දෙපාර්ශවයෙන් ම පක්ෂය වෙත පැමිණිල්ලක් ලැබී නොමැති බව මහ ලේකම්වරයා පැවසීය. යම් හෙයකින් එවැනි පැමිණිල්ලක් ලැබුණහොත් ඊට මැදිහත් වන බව ඔහු පැවසීය.

ඔහු පෙන්වා දුන්නේ, දෙදෙනෙකු අතරේ ඇති වන මත ගැටුම් සම්බන්ධයෙන් පක්ෂය විනය ක්‍රියාමාර්ග නොගන්නා බව ය.

“අපි පක්ෂයක් හැටියට විනය ක්‍රියාමාර්ග ගන්නේ, අපේ සාමාජිකයෙක් කරන යම් කිසි කාරණයකින් අපේ පක්ෂයට හෝ මේ රටට, රටේ ජනතාවට හානියක් වෙනවා නම්. දෙදෙනෙක් අතරේ ඇති වන මත ගැටුම් සම්බන්ධයෙන් අපි විනය ක්‍රියාමාර්ග ගන්නේ නැහැ. ඉතින් මේ කියන හඬ පටයේ ඒ වගේ දෙයක් තියෙනවා ද නැද්ද කියලාවත් අපි දන්නෙත් නෑ. එහෙම පැමිණිල්ලක් අද වෙනකම් පක්ෂෙට අද වෙනකම් ලැබිලත් නැහැ. 

අපේ ගම්වලත් ඔය වගේ ප්‍රශ්න තියෙනවා. ඒවා පක්ෂයට හානි දායක ගැටුම් නොවෙයි. මම අපේ ගමේ පාරක් හදන්න හැදුවාම ගමේ තව කොටසක් කියනවා මන්ත්‍රීතුමා සල්ලි ඕකට දාන්න එපා, අපිට ඊට වඩා මේ අවස්ථාවේ වැදගත් මෙන්න මේ ඉස්කෝලේ හදන එක. ඉතින් එතකොට සමහර අය පාර ඕනේ කියනවා, සමහර අය ඉස්කෝලේ ඕනේ කියනවා. තවත් කට්ටියක් කියයි තවත් පාරක් ඕනේ කියලා. ඕක මේ දේශපාලනයේ හැම තිස්සෙම තියෙන මත ගැටුමක්. ඒක විනය කැඩීමක් දක්වා යන්න නම්, එතනින් එහාට යන්න ඕනේ. මේක මොකක් ද මේ සිදුවීම කොච්චර දුරට ගියා ද? කොහොම ද? කියලාවත් අපි දන්නේ නෑ. කොහෙන් හරි අපිට පැමිණිල්ලක් ආවොත් අපිට පුළුවන් ඒ සම්බන්ධයෙන් මැදිහත් වෙලා බලන්න.”

The post ‘දෙදෙනෙක් අතරේ ඇති වන මත ගැටුම් සම්බන්ධයෙන් අපි විනය ක්‍රියාමාර්ග ගන්නේ නැහැ’ – පොහොට්ටු ලේකම් කියපු අමුතු කතාව appeared first on ColomboXnews.