දකුණේ සහ බස්නාහිර මිනී මැරුම් වැඩි වී ඇත්තේ ඒ පළාත්වල ඉහළම පොලිස් නිලධාරීන්ගේ අකාර්යක්ෂමතාවය නිසා – පොලිස්පති

දකුණු පළාතේ හා බස්නාහිර පළාතේ මිනීමැරුම් හා අපරාධ වැඩිවීමට විශේෂයෙන්ම බලපා ඇත්තේ එම පළාත් දෙකෙහි සේවයකරන  ජ්‍යෙෂ්ඨතම පොලිස් නිලධාරීන්ගේ හා පොලිස් ස්ථානාධිපතිවරුන්ගේ අකාර්යක්ෂතාවය බව පොලිස්පතිවරයා ප්‍රකාශ කර ඇත.

පොලිස්පතිවරයා මේ බව ප්‍රකාශ කර ඇත්තේ මහජන ආරක්ෂක අමාත්‍ය ටිරාන් අලස් විසින් පොලිස් ප්‍රධානීන් කැඳවා ඊයේ (21) පවත්වන ලද විශේෂ සාකච්ඡාවක් අතරය.

ඒ අනුව එවැනි නුසුදුසු නිලධාරීන් වහාම එම තනතුරුවලින්  ඉවත්කර සුදුසු නිලධාරීන් පත්කරන  ලෙසත්     බස්නාහිර පළාත සහ දකුණු පළාත තුළ සිදුවන මිනීමැරුම් සම්බන්ධයෙන් වහාම දැඩි ක්‍රියාමාර්ග ගන්නා ලෙසත් පොලිස් ප්‍රධානීන්ට නියෝග කර ඇත.

එම සාකච්ජාව සඳහා මහජන ආරක්ෂක අමාත්‍යංශයේ ලේකම් වියානි ගුණතිලක, පොලිස්පති ඩී.සී.වික්‍රමරත්න, ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, දකුණු පළාත් බාර ජ්‍යෙෂ්ඨ නියෝජ්‍ය පොලිස්පති එස්.සී මැදවත්ත, විශේෂ කාර්ය බලකායේ අණදෙන නිලධාරි නියෝජ්‍ය පොලිස්පති වරුණ ජයසුන්දර සහභාගී වී තිබිණ.

මිනීමරුවන් සම්බන්ධයෙන් නිතිය තදින් ක්‍රියාකරන ලෙස එහිදී පොලිස්පතිවරයාට නියෝගකර ඇති අමාත්‍යවරයා, එවැනි මෙහෙයුම්වලදී අනිසි බලපෑම් සිදුකිරීමට කිසිවකුට හෝ ඉඩ නොතබන බව ද අවධාරණය කර ඇත.

ජනාධිපතිවරයාගෙන් ඒ සම්බන්ධයෙන් සහතිකයක් ලැබී ඇතැයි ද  ඇමතිවරයා ප්‍රකාශ කර තිබේ.

The post දකුණේ සහ බස්නාහිර මිනී මැරුම් වැඩි වී ඇත්තේ ඒ පළාත්වල ඉහළම පොලිස් නිලධාරීන්ගේ අකාර්යක්ෂමතාවය නිසා – පොලිස්පති appeared first on ColomboXnews.