තමන්ගේ ආයෝජකයෙක් බව පවසමින් ඇමති අරුන්දික ආගමන විගමන පාලකට බලපෑම් කර රට ඇතුළට ගත් හොර පාස්පෝට් චීනා චීන රජයේ වරෙන්තු පිට සිටි නමගිය අපරාධකරුවෙක්

ගිනි රාජ්‍යයේ ව්‍යාජ ගුවන් ගමන් බලපත්‍රයකින් මේ රටට ඇතුළුවීමට තැත් කර ආගමන විගමන දෙපාර්තමේන්තුවට  හසුවී පිටිවහල් කිරීමට සැරසී සිටිය දී තම නිවාස ව්‍යාපෘතියක ආයෝජකයෙක් බව කියමින් අරුන්දික ප්‍රනාන්දු විසින් ලියුම් ලියා නිදහස් කරගෙන රට ඇතුළට ගැනීමට තැත් කළ හොර පාස්පෝට් සහිත චීන ජාතිකයා  චීන රජයේ වරෙන්තු කරුවෙක් බව නීතිපතිවරයා අද (29) අභියාචනාධිකරණයට දැනුම් දුන්නේය.

අරුන්දික ප්‍රනාන්දු රාජ්‍ය අමාත්‍යවරයා ආගමන විගමන පාලක වරයාට බලපෑම් කරමින් ලිඛිත දැනුම් දීමෙන් පසු  මෙම හොර පාස්පෝට් චීනා නිදහස් කළ ද පසුව මහජන ආරක්ෂාව පිළිබඳ ඇමති ටිරාන් අලස්ගේ උපදෙස් මත ඔහුව අත්අඩංගුවට ගෙන රටින් පිටුවහල් කිරීමට අවශ්‍ය කටයුතු ආගමන විගමන දෙපාරත්මේන්තුව විසින් සූදානම් කළේය.

ඒ අවස්ථාවේ දී  අත් අඩංගුවට පත් පුද්ගලයා චීනයට පිටුවහල් කිරීම වැළැක්වීමේ  නියෝගයක් නිකුත් කරන ලෙසත් තමන් පැමිණි ඩුබායි රාජ්‍යයට පිටුවහල් කරන ලෙසත් ඉල්ලා   අභියාචනාධිකරණය හමුවේ    රිට් පෙත්සමක් ගොනු කළේය.

එම පෙත්සම  අද විභාගයට ගත් අවස්ථාවේ දී  ව හෙළි දරවු වූයේ මෙම චීන ජාතිකයා චීන රජය තුළ අපරාධවලට සම්බන්ධ වී චීන රජයෙන් වරෙන්තු නික්තු කළ පුද්ගලයෙක් බවය.

මේ සම්බන්ධව  චීන ජාතිකයා විසින් ඉදිරිපත් කළ පෙත්සම ද ඉල්ලා අස් කර ගැනුණි.

මෙම චීන ජාතිකයා තවත් චීන ජාතිකයෙක් සහ ඊජිප්තු ජාතිකයෙක් සමග ගිනි රාජ්‍යයේ  ව්‍යාජ    ගුවන් ගමන් බලපත්‍රයක් උපයෝගී කර ගෙන ශ්‍රී ලංකාවට ඇතුළු වීමට තැත් කළේ පසුගිය 18 වැනිදා ය.  ඔවුන් එදින  රාත්‍රී 09.50ට      එමිරේට්ස් ගුවන් සේවයේ ඊ.කේ.- 648 දරන ගුවන් යානයෙන් ඩුබායි සිට කටුනායක ගුවන් තොටුපළ වෙත පැමිණ තිබුණි

උක්ත චීන ජාතිකයා  ඩුබායි සිට පැමිණ ශ්‍රී ලංකාවට ඇතුළුවීමට උත්සාහ කළ  ගුවන් ගමන් බලපත්‍රය ව්‍යාජ එකක් බව තහවුරු වීමත් ඔහු ලඟ ගුවන් ගමන් බලපත්‍ර දෙක්ක තිබීමත්  සමග කටුනායක  ආගමන විගමන නිලධාරීන්   ඔහුව අත්අඩංගුවට ගත්තේය. ඒ අවස්ථාවේ දී ඔහුත්, ඔහු සමග පැමිණි පුද්ගලයින් දෙදෙනාත් කලහකාරී ලෙස හැසිරෙන්නට වූහ.

ඔවුන් තිදෙනාම    අත්අඩංගුවට ගත් ආගමන විගමන නිලධාරීන් ඔවුන්     යළි හරවා යැවීම සඳහා රඳවා ගැනීමේ කුටියක් වෙතට යොමු කරන්නේ ඉන් අනතුරුවය.

මේ අවස්ථාවේ දී   දිගින් දිගටම බලවතුන්ගෙන් බලපෑම් සහිත දුරකථන ඇමතුම් ලැබී ඇති අතර අත්අඩංගුවට පත් පුද්ගලයින් මුලින් කලහකාරී ලෙස හැසිරුන ද  පසුව අත්අඩංගුවෙන් මිදීම සඳහා ආගමන නිලධාරීන්ට මුදල් අල්ලස් ලබා දීමට උත්සාහ කර තිබිණි.

රාජ්‍ය  අමාත්‍ය අරුන්දික ප්‍රනාන්දු වැඩේට මැදිහත් වන්නේ මෙතැනදී ය. ඔහු ආගමන විගමන පාලකකට ලියුමක් ලිව්වේය.   ඇමතිවරයා   කියා සිටියේ මෙම පුද්ගලයින් තම නිවාස ව්‍යාපෘතියක ආයෝජකයින් බැවින් ඔවුන් නිදහස් කර හරින ලෙසය.

ඇමතිවරයා කරන ලද ලිඛිත දැන්වීම පදනම් කරගෙන  ආගමන විගමන පාලක ජනරාල් හර්ෂ ඉලුප්පිටිය මෙම හොර පාස්පෝට් චීනා රට තුළට මුදා හරින ලෙස  ගුවන්තොටුපල නිලධාරීන්ට උපදෙස්  දුන්නේය.  චීනාත් චීනාගේ යාලුවන් දෙදෙනාත් කටුනායකින් රට තුළට ගියහ.

කතාව මධ්‍යය ඔස්සේ හොඳටම පත්තුවිනි.

අරුන්දික ප්‍රනාන්දු විසින් ලබා දෙන ලද ලිපියකට අනුව ආගමන විගමන දෙපාර්තමේන්තුව විසින් රටට ඇතුළු වීමට අවසරය ලබා දුන් චීන ජාතිකයා ආගමන විගමන දෙපාර්තමේන්තුවට යළි කැඳවා ප්‍රකාශයක් රටින් පිටුවහල් කරන ලෙස ආගමන විගමන පාලකවරයා වෙත  මහජන ආරක්ෂාව පිළිබඳ ඇමති ටිරාන් අලස් දැනුම් දෙන්නේ මේ අතරය.

ඒ අනුව පසුගිය 22 දා මෙම චීන ජාතිකයාව ආගමන විගමන දෙපාර්තමේන්තුවට කැඳවා දීර්ඝ ප්‍රකාශයක් සටහන් කර ගැනුණි. එම ප්‍රකාශ සහ මෙම චීන ජාතිකයා ගේ විදේශ ගමන් බලපත්‍ර පරීක්ෂා කිරීමෙන් පසුව ඔහු වහාම රටින් පිටුවහල් කිරීමට තීන්දු විය.

දැන් හෙළි වන්නේ මේ හොර පාස්පෝට් චීනා චීන රජයේ අපරාධකරුවෙක් බවය. අපරාධ චෝදනා මත වරෙන්තු නිකුත් වූ පුද්ගලයෙක් බවය.

හොර පාස්පෝට්වලින් පට්ට හොරුන් රට ඇතුළට ගැනීමට ලියුම් ලියන හිඟන ඇමතිවරුන් සිටින රටක ස්වරූපය යළි යළිත් පෙනෙමින් ඇත. වීඅයිපී ලොන්ජ් එක හරහා හොර බඩු පන්නන්නට හැදූ පාර්ලිමේන්තු මන්ත්‍රී “රත්තරන් සබ්‍රි “ ඒ සඳහා මෑතක පෙනුන හොඳම උදාහරණය.

The post තමන්ගේ ආයෝජකයෙක් බව පවසමින් ඇමති අරුන්දික ආගමන විගමන පාලකට බලපෑම් කර රට ඇතුළට ගත් හොර පාස්පෝට් චීනා චීන රජයේ වරෙන්තු පිට සිටි නමගිය අපරාධකරුවෙක් appeared first on ColomboXnews.