ඩයනාගේ ද්විත්ව පුරවැසි බවේ නඩුව අභියාචනාධිකරණයේ බෙදුණු තීන්දුවකින් නිෂ්ප්‍රභ වෙයි!

රාජ්‍ය ඇමැති ඩයනා ගමගේ මහත්මියගේ පාර්ලිමේන්තු මන්ත්‍රී  ධුරය බල රහිත කිරීමේ නියෝගයක් නිකුත් කරන ලෙස ඉල්ලා ගොනුකළ පෙත්සම අභියාචනාධිකරණය ගාස්තුවට යටත්ව නිෂ්ප්‍රභ කර තිබේ. 

ත්‍රිපුද්ගල අභියාචනාධිකරණ විනිසුරු මඬුල්ලේ බහුතර විනිසුරුවරුන්ගේ එකඟත්වය මත අදාළ පෙත්සම නිෂ්ප්‍රභ කරන බව අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න මහතා පැවසීය.

ඩයනා ගමගේ මහත්මිය බ්‍රිතාන්‍ය පුරවැසිභාවයක් හිමි තැනැත්තියක් බැවින් ඇයට මෙරට ආණ්ඩුක්‍රම ව්‍යවස්ථාව යටතේ පාර්ලිමේන්තුවට තේරී පත්වීමට, අසුන් ගැනීමට සහ ඡන්දය ප්‍රකාශ කිරීමට සුදුසුකමක් නොමැති බවට තීන්දු කරන ලෙස ඉල්ලා සමාජ ක්‍රියාකාරිකයෙකු වන ඕෂල හේරත් මහතා විසින් එම පෙත්සම ඉදිරිපත් කර තිබුණි.

කෙසේ වෙතත්, විනිසුරු මඬුල්ලේ දෙකට එකක් ලෙස මෙම තීන්දුව ප්‍රකාශයට පත්කර ඇති බව පෙත්සම්කාර ඕෂල හේරත් මහතා ප්‍රකාශ කළේය.

The post ඩයනාගේ ද්විත්ව පුරවැසි බවේ නඩුව අභියාචනාධිකරණයේ බෙදුණු තීන්දුවකින් නිෂ්ප්‍රභ වෙයි! appeared first on ColomboXnews.