වර්තමානයේදී ශ්‍රී ලංකාව තුළ කොවිඩ් වෛරසය පැතිර යන සීග්‍රතාවය අනුව මෙම වසර අවසානය වනවිට මෙරට සමස්ත කොවිඩ් මරණ ප්‍රමාණය 18,000 ඉක්මවා යනු ඇති බවට ලෝක සෞඛ්‍ය සංවිධානයේ ශ්‍රී ලංකා කාර්යාලය සිදුකළ අධ්‍යයනයකින් හෙලිදරව් වී තිබෙනවා. ඒ අනුව ඉදිරි මාස හතර හමාරක කාලය තුළ අවම වශයෙන් පුද්ගලයන් 12,500 ක් වෛරසයට බිලිවීමේ අනතුරක් මතුව තිබේ.
විශේෂඥ වෛද්‍යවරුන්, වෛරස පිළිබඳ මහාචාර්යවරුන් ඇතුලු 30 දෙනෙකුගෙන් සමන්විත විශේෂඥ කණ්ඩායමක් විසින් සකස් කළ වාර්තාවකින් මේ බව හෙලි වී තිබෙනවා. අදාල වාර්තාව ඊයේ දිනයේදී සෞඛ්‍ය අමාත්‍යංශය වෙත බාරදී ඇති බවයි වාර්තා වන්නේ.
මෙම මරණ ප්‍රමාණය වළක්වා ගැනීම සඳහා අනුගමනය කළයුතු නිර්දේශ රැසක් අදාල වාර්තාව හරහා සෞඛ්‍ය අමාත්‍යංශය වෙත ලබා දී තිබෙනවා. සංචරණ සීමා දැඩි කිරීම සම්බන්ධයෙන් වාර්තාවෙන් දැඩිව අවධාරණය කර තිබෙන අතර පළාත් සංචරණ සීමා වෙනුවට දිස්ත්‍රික් සංචරණ සීමා ක්‍රියාත්මක කිරීම වැදගත් බවද පෙන්වා දී තිබෙනවා. මීට අමතරව කෙටි කාලයකට හෝ රටපුරා ඇඳිරි නීතිය ක්‍රියාත්මක කිරීම, සියලු උත්සව ඇතුළු මහජන ඒකරාශී වීම් සති තුනකට තහනම් කිරීම, සෞඛ්‍ය සේවකයන් ආරක්ෂා කර ගැනීම, ඵලදායී සන්නිවේදන වැඩසටහන් හරහා ජනතාව දැනුවත් කිරීම, ආසාදිතයන් හා මරණ ප්‍රමාණය පිළිබඳව නිවැරදි දත්ත ප්‍රකාශයට පත් කිරීම, වයස අවුරුදු 60 ඉක්මවූ සියලු පුද්ගලයන්ට එන්න්තකරණය කඩිනමින් අවසන් කිරීම යන නිර්දේශ අදාල වාර්තාවට ඇතුළත් වේ.
මෙම වාර්තාව සකස් කිරීම සඳහා පාලිත අබේකෝන්, නිහාල් අබේසිංහ, රජිව් ද සිල්වා, ලක්කුමාරි ප්‍රනාන්දු, පද්මා ගුණරත්න, ආනන්ද විජේවික්‍රම යන විශේෂඥ වෛද්‍යවරුන් සහ අසිත ද සිල්වා, සරෝජ් ජයසිංහ, ඉන්දික කරුණාතිලක, නීලිකා මලවිගේ, කාමිනි මෙන්ඩිස්, මලීක් පීරිස්, මංජු වීරසිංහ යන මහාචාර්යවරුන් ඇතුළු පිරිසක් සිය දායකත්වය ලබා දී තිබෙනවා.
The post ජනවාරි වනවිට මෙරට කොවිඩ් මරණ ප්‍රමාණය 18000 ක් වනු ඇත – ලෝක සෞඛ්‍ය සංවිධානය අනතුරු අඟවයි appeared first on ColomboXnews.
Source From Colomboxnews
Author: Kamal Dhammika
#SriLanka #News #lka