රිදීමාලියද්ද ප්‍රාදේශීය ලේකම් කොට්ඨාසයේ දෙහිගම, ඇකිරියන්කුඹුරේ අක්කර 62,500ක ඉදිකිරීමට යෝජිත උක් කර්මාන්ත ශාලාවට හා උක් වගා ව්‍යාපෘතියට එරෙහිව ඊයේ (පෙබ. 7) එහි රැස්ව සිටි ජනතාව පළවා හැර වගාබිම් ඩෝසර් කිරීමට අදාළ සිංගප්පූරු ආයෝජකයාගේ දේශීය නියෝජිතයා සහ මහවැලි අධිකාරිය කටයුතු කළේ යැයි ඌව-වෙල්ලස්ස ජන අයිතීන් සුරැකීමේ පෙරමුණේ කැඳවුම්කරු සමන්ත විද්‍යාරත්න චෝදනා කළේ ය.
එම ප්‍රදේශයේ ගොවි ජනතාව වගාකර තිබූ කජු, බඩඉරිඟු, රට කජු හා කෙසෙල් වගාවන් ඩෝසර් කරමින් පැල් රැකීමට අටවා තිබූ පැල් කඩා දැමීමට ද එහිදී ඩෝසර්කරුවන් කටයුතු කළේ යැයි ඔහු කී ය.
පොලිස් නිලධාරීන් 50ක් ඇතුළුව තුන්සියයකට අධික පිරිසක් එහි පැමිණ ගොවි ජනතාව පලවා හළ බව ත්, පසුව තවත් දහසකට ආසන්න පිරිසක්ද ඩෝසර් යන්ත්‍ර විශාල සංඛ්‍යාවක් ද ගෙනැවිත් ඉඩම් ඩෝසර් කිරීමට පටන් ගත්තේ පොලිස් ආරක්‍ෂාව මධ්‍යයේ යැයි සමන්ත විද්‍යාරත්න පැවසීය.
ඔප්පු නොමැති වූත් පරම්පරා ගණනාවක් තිස්සේ ගොවි ජනතාව වගා කළ බිම් මෙසේ බහු ජාතික සමාගම් රජයේ අනුග්‍රහය ඇතිව කොල්ලකන බව කී විද්‍යාරත්න ඉදිරියේ මේ ප්‍රදේශයේ ගොවි ජනතාව බහුජාතික සමාගම්වල කුලීකරුවන් බවට පත්වනු ඇතැයි ද කීය.
ඊට එරෙහිව දිවිහිමියෙන් සටන් කරන බවත්, ගොවිබිම්වලට අද දවසේ ප්‍රදේශයේ ගොවි ජනතාව සමඟ එක්වන බවත් හෙතෙම කියා සිටියේ ය.
The post ‘ජනතාව එළවා දමා වෙල්ලස්ස හදවතේ අක්කර 62500ක් ඩෝසර් කරනවා‘ – බහුජාතික සමාගම් වලට එරෙහිව සමන්ත හඬ අවදි කරයි (වීඩියෝ) appeared first on ColomboXnews.
Source From Colomboxnews
Author: Kamal Dhammika
#SriLanka #News #lka