ගෝල්ෆේස් අරගලකරුවන්ට පහරදුන් පොහොට්ටු ආධාරකරුවන් බේරේ වැවට තල්ලු කළ අය සොයයි

මැයි 09 වනදා ගෝල්ෆේස් අරගලකරුවන්ට පහරදීමට පැමිණි පොහොට්ටුවේ මන්ත්‍රීවරුන් ඇතුළු පිරිසක් බේරේ වැවට  තල්ලු කළ කණ්ඩායම සොයා පොලීසිය විසින් මෙහෙයුමක්  ආරම්භ කරනු ලැබ ඇත.

කොළඹ ගාලු මුවදොර අරගල කරුවන්ට කණ්ඩායමක් පහර දීමෙන් අනතුරුව ප්‍රචණ්ඩවූ පිරිසක්   විසින් ඉකුත් මැයි මස නව වෙනිදා  පුද්ගලයෝ 20 කට  වැඩි සංඛ්‍යාවක් බේරේ වැවට  මෙලෙස  ඇද දමා විවිධ හිරිහැරයට පත්කරනු ලැබූහ.

බේරේ වැවට ඇද දැමූ පිරිස අතර කාන්තාවෝ කිහිප දෙනෙක්ද වූහ.

ප්‍රාදේශීය සභා මන්ත්‍රීවරයකුගේ මුදල් කොල්ලකා ඔහු බේරේ  වැවට තල්ලු කළ බව කියන පුද්ගලයෙක්  කොළඹ වෑකන්ද ප්‍රදේශයේදී  පසුගියදා අත්අඩංගුවට ගනු ලැබීය.

කොළඹ අපරාධ කොට්ඨාසය විසින් අත්අඩංගුවට ගනු ලැබ සිටින මේ පුද්ගලයා  දෙමටගොඩ ප්‍රදේශයේ පදිංචි  වයස අවුරුදු 34ක අයෙකි.

මන්ත්‍රීවරයා බස් රථයකින් ගමන් කරමින් සිටියදී සැකකරු ඇතුළු පිරිසක් ඔහු බිමට බස්සවා ඔහුගේ මුදල් පසුම්බිය කොල්ලකා අනතුරුව බේරේ වැවට තල්ලු කර ඇතැයි පොලිසිය පවසයි.

පුද්ගලයන් බේරේ වැවට තල්ලු කළ සෙසු පුද්ගලයන් සොයා ගැනීමටද පොලිසිය  දිගින් දිගටම පරීක්ෂණ පවත්වාගෙන යයි

අත්අඩංගුවට ගනු ලැබූ පුද්ගලයාගෙන්ද ඒ සම්බන්ධයෙන් වැඩිදුරටත් ප්‍රශ්න කරන බව පොලිස් ආරංචි මාර්ගවලින් පැවසේ.

The post ගෝල්ෆේස් අරගලකරුවන්ට පහරදුන් පොහොට්ටු ආධාරකරුවන් බේරේ වැවට තල්ලු කළ අය සොයයි appeared first on ColomboXnews.