“ගෝඨාභයගේ තායිලන්ත වියදම මිලියන සිය ගණනක් ඉක්මවයි: සති දෙකකින් යළි ශ්‍රී ලංකාවට” – රොයිටර්ස්

හිටපු ජනාධිපති ගෝඨාභය රාජපක්ෂ තව සති දෙකකින් පමණ නැවත ශ්‍රී ලංකාවට පැමිණෙනු ඇතැයි රොයිටර්ස් පුවත් සේවය වාර්තා කරයි.

මූලාශ්‍ර දෙකක් උපුටා දක්වමින් එම පුවත් සේවය මේ බව වාර්තා කර තිබේ.

රොයිටර්ස් පුවත් සේවය වාර්තා කළේ, ඔහුගේ ආරක්ෂාව සුරක්ෂිත කිරීම සඳහා වන විධිවිධාන මත එය රඳා පවතින බව ය.

රාජපක්ෂ මහතාගේ නැවත පැමිණීම ඔහු තායිලන්තයේ රැඳී සිටීමේ වියදම් සමග අර්ධ වශයෙන් සම්බන්ධතාවක් පවතින බව එක් මූලාශ්‍රයක් ප්‍රකාශ කර ඇත.

ගෝඨාභය රාජපක්ෂ මහතා ජූලි 13 වන දා මෙරටින් පිටව ගිය අතර ඉන් දිනකට පසුව ජනාධිපති ධූරයෙන් සිය ඉල්ලා අස්විය.

පළමුව මාලදිවයිනට ගිය හිටපු ජනාධිපතිවරයා ජූලි 14 වන දා සිංගප්පුරුවට ගියේ ය. පසුව ඔහු එහි සිට තායිලන්තය බලා පිටව ගියේ ය.

රුසියාවේ හිටපු තානාපති උදයංග වීරතුංග මීට දින කිහිපයකට පෙර ප්‍රකාශ කළේ, හිටපු ජනාධිපති ගෝඨාභය රාජපක්ෂ අගෝස්තු 24 වන දා නැවත ශ්‍රී ලංකාවට පැමිණීමට නියමිත බව ය.

නමුත් ඔහුගේ ආරක්ෂාව සහ අනෙකුත් කරුණු සම්බන්ධයෙන් ශ්‍රී ලංකා පොදුජන පෙරමුණ සහ රජය අතර සාකච්ඡා දිගට ම පවතින බැවින් පැමිණීම කල් දමා ඇති බව ආරංචි මාර්ග පැවසූ බව රොයිටර්ස් පුවත් සේවය වාර්තා කර තිබේ.

“ඔහුට අනිවාර්යයෙන් ම නැවත පැමිණීමට අවශ්‍යයි. නමුත් ආරක්ෂාව ප්‍රධාන ප්‍රශ්නය වන අතර බුද්ධි අංශ උපදෙස් දී ඇත්තේ ඔහු ආපසු පැමිණීම ප්‍රමාද කරන ලෙස යි,” ශ්‍රී ලංකා රජයේ නිලධාරියෙක් උපුටා දක්වමින් රොයිටර්ස් වාර්තා කළේ ය.

දෙවන මූලාශ්‍රය සඳහන් කර ඇත්තේ, ඔහු තායිලන්තයේ රැඳී සිටීමේ අධික පිරිවැය හැකි ඉක්මනින් ආපසු පැමිණීම සාධකයක් බව ය.

“පෞද්ගලික ජෙට් යානයක්, සුඛෝපභෝගී නවාතැන් පහසුකම් සහ පැය 24 පුරා ම ආරක්ෂාව සඳහා වන පිරිවැය ඇතුළත් බැවින් වියදම දැන් රුපියල් මිලියන සිය ගණනක් දක්වා දිව ගොස් තියෙන්නේ,” එම මූලාශ්‍රය මූලාශ්‍රය සඳහන් කර ඇත. “වියදම දරා ගැනීමට නොහැකි වෙමින් තියෙන්නේ.”

රාජපක්ෂ පවුලට සමීප තවත් ආරංචි මාර්ගයකට අනුව, එම වියදම් බොහෝ දුරට ඔහුගේ ආධාරකරුවන් කිහිප දෙනෙකු විසින් දරනු ලබන බව රොයිටර්ස් පුවත් සේවය වැඩිදුරට ත් වාර්තා කර ඇත.

The post “ගෝඨාභයගේ තායිලන්ත වියදම මිලියන සිය ගණනක් ඉක්මවයි: සති දෙකකින් යළි ශ්‍රී ලංකාවට” – රොයිටර්ස් appeared first on ColomboXnews.