මස්කෙළිය පොලිස් වසමේ රෝස් ෆීල්ඩ් ප්‍රදේශයේ පාසල් භුමියක තිබූ කොන්ක්‍රීට් සිලින්ඩරයක් ඇඟ මතට පෙරළීමෙන් පිරිමි දරුවෙකු මිය යාමේ සිද්ධිය සම්බන්ධයෙන් පුද්ගලයන් 5 දෙනෙකු අත්අඩංගුවට ගත් බව පොලිසිය පවසයි. ඊයේ (අප්‍රේල් 4) මෙම අනතුර සිදුව තිබේ.
පොලිසිය සඳහන් කළේ, නොසැලිකිලිමත් ක්‍රියාවක් නිසා මරණයක් සිදුවීම සම්බන්ධයෙන් කොන්ක්‍රීට් සිලින්ඩර් රැගෙන ආ පුද්ගලයන් 5 දෙනෙකු අත්අඩංගුවට ගත් බව ය.
මිය ගොස් ඇත්තේ, වයස අවුරුදු 11ක් වූ තම්ඹතැන්න කොටස, ගාඩ්මොර් වත්ත ප්‍රදේශයේ පදිංචි පාසල් සිසුවෙකි.
මෙම අත්අඩංගුවට ගත් පුද්ගලයන් නිවාසවල වැසිකිළි වළවල්වලට බහාලන ලබන උස අඩි 3 විෂ්කම්භය 3ක කොන්ක්‍රීට් සිලින්ඩර් 5ක් ලොරි රථයකින් රැගෙනවිත් පෙරළී යාමට හැකි වන අයුරින් පාසල් භුමියේ වැසිකිළිය අසල තබා ගොස් ඇති බව පොලිසිය පැවසීය.
පොලිසිය සඳහන් කළේ, මිය ගිය දරුවා තවත් දරුවන් කිහිප දෙනෙකු සමග වැසිකිළි ගොස් ඇති බව ත් ඒ අතරතුර මිය ගිය දරුවා වැසිකිළිය අසල තිබුණු කොන්ක්‍රීට් සිලින්ඩරයක් උඩ නැග ඇති බව ය.
අවස්ථාවේ කොන්ක්‍රීට් සිලින්ඩරය පෙරළී ඒ මත සිටි දරුවාගේ හිස අසල තිබුණු වැසිකිළි බිත්තියේ වැදී තිබේ. අනතුරුව සිලින්ඩරය දරුවාගේ ඇඟ මතට ද පෙරළී ඇති බව පොලිසිය සඳහන් කළේ ය.
මිය ගිය දරුවාගේ මෘත ශරීරය දික්ඔය රෝහලේ මෘත ශරීරාගාරයේ තැන්පත් කර තිබේ.
මේ පිළිබඳව මස්කෙළිය පොලිසිය වැඩිදුර විමර්ශන සිදු කරයි.
The post කොන්ක්‍රීට් සිලින්ඩරයක් ඇඟ මතට පෙරළී පාසැල් දරුවෙක් මිය යාමේ සිදුවීමට 5 දෙනෙක් අත්අඩංගුවට appeared first on ColomboXnews.
Source From Colomboxnews
Author: Kamal Dhammika
#SriLanka #News #lka