අපේ ජනබල පක්ෂයට ලැබුණු මන්ත්‍රී ධුරය පිළිබඳ තරගය අවසන් කරමින් අතුරලියේ රතන හිමිට මන්ත්‍රී අසුන පූජා කිරීමට බොදුබල සේනා සංවිධානයේ මහ ලේකම් ගලගොඩඅත්තේ ඥානසාර හිමි තීරණය කර ඇත්තේ රුපියල් කෝටි තුනක ලන්සුවකට බව මේ වනවිට තොරතුරු අනාවරණයවේ.
රට, ජාතිය වෙනුවෙන් මෙම කෝටි 03 පූජා කිරීමට ඉදිරිපත් වී ඇත්තේ ‘රත්න සහල්’ ව්‍යාපාරයේ අධිපතිවරයායි. ඒ අනුව ‘රතන’ වෙනුවෙන් ‘රත්න’ පෙරට පැමිණ තිබේ. ඒ අනුව මන්ත්‍රී ධුරය වෙනුවට රුපියල් කෝටි 03 ක පූජාව භාර ගැනීමට ඥානසාර හිමි තීරණය කර තිබේ.
රතන හාමුදුරුවෝ වෙනුවෙන් රත්න සහල් මෝල් අධිපතිවරයා මෙම මුදල ලබා දී තිබෙන්නේ ණය මුදලක් ලෙස බවටත්, රුපියල් කොටි 03 ක මුදල රතන හිමියන්ට අයත් කහතුඩුව ප්‍රදේශයේ පිහිටි ඉඩමක් විකුණා ලබා ගන්නා මුදලින් පියවීමට නියමිත බවටත් රාවයක් පවතී. මන්ත්‍රී ධුරය වෙනුවෙන් ඥානසාර හාමුදුරුවෝ රුපියල් කෝටි 05 ක් පමණ ඉල්ලා ඇති නමුත් රත්න හාල් මෝල් අධිපතිවරයා එය ප්‍රතික්ෂේප කර ඇති අතර කෝටි 03 ක් පමණක් ලබා දී තිබෙනවා.
ඒ අනුව එම මුදලින් ඥානසාර හාමුදුරුවෝ මේ දිනවල, රට ජාතිය ආගම බේරා ගැනීම සඳහා බොදුබල සේනාවට ඇති ඉතා විශාල අඩුපාඩුවක් සම්පූර්ණ කිරීමේ වෑයමක නිරත වෙමින් සිටී. ජාතිය, ආගම බේරා ගැනීමේ ගමන වේගවත් කිරීම සඳහා ගලගොඩඅත්තේ ඥාණසාර හිමියන් අධි සුඛෝපභෝගී Land Cruiser v8 වර්ගයේ ජීප් රථයක් සඳහා මිල ගණන් කැඳවා තිබේ. උන්වහන්සේ විදෙස්ගත සිය හිතවතුන්ටද කතා කරමින් V8 මෝටර් රථ හා ඒ සමාන සැප පහසුකම් සහිත නවීන මෝටර් රථ පිළිබඳව තොරතුරු විමසමින් සිටී.
පාර්ලිමේන්තු අසුන පූජා කිරීමේ ආනිසංසයෙන් ලැබූ රුපියල් කෝටි 03 ක මුදල සිය සුඛ විහරණය සඳහා භාවිතා කරනවා වෙනුවට පූජාවෙන් පූජාව උතුම් පූජාව කියා එයද පූජා කර රටට ජාතියට සේවය කිරීම සඳහා V8 රථයක් කෙසේ හෝ මිලදී ගැනීම උන්වහන්සේගේ අධිෂ්ඨානයයි. අපේ ජනබල පක්ෂයට ලැබුණු මන්ත්‍රී ධුරය භාවිතා කර පාර්ලිමේන්තුවට ගොස් ලැබෙන පර්මිට් එක හරහා වෙනත් සුඛෝපභෝගී රථයක් ලබා ගැනීමේ හැකියාව තිබූ නමුත් රට, ජාතිය, ආගම බේරා ගැනීමේ සටන එතරම් පහත් තත්වයකට දැමීමට ඥානසාර හිමි සූදානම් නොමැත.
මේ සම්බන්ධයෙන් තොරතුරු ලබාදිය හැකි, මිල ගණන් ලබාදිය හැකි ඕනෑම පුද්ගලයෙකුට බොදුබල සේනා සංවිධානයේ නියෝජිතයෙකු අමතා තොරතුරු ලබාදිය හැකි අතර මෙම සද්කාර්යයට, මහත්ඵල මහානිසංස පිංකමට වචනයකින් හෝ සම්බන්ධ වන පුද්ගලයන්ට, ඥානසාර හාමුදුරුවෝ එම රථයෙන් ගමන් කරන වාරයක් වාරයක් පාසා පින් ලැබෙනු ඇත.
The post කොඩියේ මන්ත්‍රීධුරයේ ලන්සුවෙන් ඥානසාර හිමිට V8 රථයක් appeared first on ColomboXnews.
Source From Colomboxnews
Author: Kamal Dhammika
#SriLanka #News #lka