කෘෂිකර්ම ඇමති අමරවීරට ජනතා විරෝධය… ඇමති පස්ස දොරින් පැන යයි!

අම්බලන්තොට ප්‍රාදේශීය ලේකම් කාර්යාලයේ උත්සවයකට පැමිණි මහින්ද අමරවීරට එල්ල වූ ජනතා විරෝධය නිසා පසුපස දොරින් පිටවී යෑමට ඔහුට සිදුවිය.

ආහාර භෝග නිශ්පාදන ජාතික සංග්‍රාමය හම්බන්තොට දිස්ත්‍රික් වැඩසටහන ඇමති මහින්ද අමරවීරගේ ප්‍රධානත්වයෙන් අද අම්බලන්තොට ප්‍රාදේශීය ලේකම් කාර්යාලයේ දී පැවැත්විනි.

උත්සවය පැවැත්වෙන අවස්ථාවේ දී ගොවි ජන සම්මේලනයට අයත් විශාල පරිසක් ප්‍රධාන ප්‍රවේශය අසලට පැමිණ උද්ඝෝෂණයක නිරත වූහ.

පොහොර සහ ඉන්ධන ලබා දී ගොවි ජනතාවගේ ගැටලුවලට වහාම විසඳුම දෙන ලෙස ඉල්ලා ප්‍රාදේශීය ලේකම් කාර්යාලයේ ප්‍රධාන දොරටුව අවහිර කරමින්  උද්ඝෝෂණයේ නිරත වූ පිරිස ඉන් ඉවත් කිරිමට පොලිසිය දැඩි  උත්සාහයක නිරත වුව ද එම උත්සාහය ව්‍යර්ථ විය.

සුළු පරිසකගේ සහභාගීත්වයෙන් ආරම්භ වූ උද්ඝෝෂණයට විනාඩි කීපයක් ගතවනවිට විශාල පිරිසක් එක් විය.

මේ සමගම රැස්වීම් ශාලව මෙන්ම අවට ද එකම ගාලගෝට්ටියක් බවට පත් වී තිබේ.

උද්ඝෝෂකයින්  උද්ඝෝෂණය පැවැත්වෙන අතරතුර  සිය කතාව සිදුකළ ඇමති මහින්ද අමරවීර උද්ඝෝෂකයින් සිටින පැත්තට නොගොස් පිටුපස දොරින් පිටව ගොස් තිබිණි.

මේ සම්බන්ධව මාධ්‍යයට අදහස් දැක්වූ මහින්ද අමරවීර ඇමතිවරයා කීවේ තමන් පලා නොගිය බවය. ප්‍රධාන ගේට්ටුව අසල  සිටි පිරිස අතරින් කණ්ඩායමකට තමන් සමග සාකච්ඡාවකට ඇරයුම් කළ ද ඒ අය එය පිළිගත්තේ නැති බවත්, එතැන සිටි පිරිස තමා හොඳින්ම දන්නා බවත් කී ඇමතිවරයා  එතැන සිටියේ ගොවීන් නොව එක්තරා දේශපාලන පක්ෂයක  ක්‍රියාකාරී සාමාජිකයින් බව කීවේය.

The post කෘෂිකර්ම ඇමති අමරවීරට ජනතා විරෝධය… ඇමති පස්ස දොරින් පැන යයි! appeared first on ColomboXnews.