කළුතර පාසල් සිසුවියගේ මරණයට සම්බන්ධ ප්‍රධාන සැකකරු අත්අඩංගුවට..!

කළුතර බාලිකා විදුහලේ 11 වසරේ ඉගෙනුම ලබන 16 හැවිරිදි පාසල් සිසුවියක වන ටිහාරා නිර්මානි නිශ්සංක සිල්වා යන දැරිය පස්මහල් ගොඩනැගිල්ලකින් ඇදවටී මියයාම සම්බන්දයෙන් සොයමින් සිටී ප්‍රධාන සැකකරු අත්අඩංගුවට ගැනීමට කළුතර දකුණ පොලිසිය සමත්ව තිබේ.

අදාළ සැකකරු ගාල්ල ප්‍රදේශයේ සැඟව සිටින බවට කළුතර මුලස්ථාන පොලිස් පරීක්ෂක රුවන් විජේසිංහ මහතාට ලද තොරතුරක් මත අපරාධ අංශ ස්ථානාධිපති පොලිස් පරීක්ෂක ධම්මික සිල්වා මහතාගේ ප්‍රධානත්වයෙන් අපරාධ අංශ නිලධාරීන් පිරිසක් හික්කඩුව ප්‍රදේශයේදී මෙම වැටලීම සිදුකර තිබෙනවා.

මෙසේ අත්අඩංගුවට පත්ව ඇත්තේ, කළුතර ඉසුරු උයනේ පදිංචි 29 හැවිරිදි දනුෂ්ක ගයාන් සහබන්දු නැමැති පුද්ගලයෙකි.

මුලික පොලිස් විමර්ශනවලදී අනාවරණය වී ඇත්තේ මෙම සැකකරු දැනට කාන්තාවන් දෙදෙනෙක් විවාහ කරගෙන ඇති අයෙක් බවයි.

මේ වන විට සැකකරු දෙවන වරට විවාහ කරගෙන ඇති කාන්තාවගෙන් පොලීසිය ප්‍රකාශයක් සටහන් කරගෙන තිබෙනවා.

සිද්ධියට සැකපිට මියගිය සිසුවිය සහ තරුණයා සමඟ නවාතැන් පොලට පැමිණි අනෙක් තරුණ යුවල පොලිස් අත්අඩංගුවට ගෙන ඇති බවයි වාර්තා වන්නේ.

තාවකාලික නවාතැන්පොළක පස් මහල් ගොඩනැගිල්ලක “තුන්වන මහලින් ඇදවැටුණු” පාසල් සිසුවියකගේ මළ සිරුරක් පෙරේදා (මැයි 6) රාත්‍රී සොයාගෙන ඇතැයි කළුතර දකුණ පොලිසිය පැවසීය.

තරුණියකගේ නිරුවත් මළ සිරුරක් දුම්රිය මාර්ගය අසල වැටී තිබෙන බවට ලද තොරතුරක් මත පරීක්ෂණ ආරම්භ කළ පොලිසිය පස් මහල් ගොඩනැගිල්ල පිටුපස දුම්රිය මාර්ගයට ආසන්නයේ උඩුබැලි අතට වැටී තිබූ මළ සිරුර සොයාගෙන ඇත.

සිද්ධිය සම්බන්ධයෙන් කළුතර දකුණ පොලිසිය වැඩිදුර විමර්ශන සිදු කරයි.

The post කළුතර පාසල් සිසුවියගේ මරණයට සම්බන්ධ ප්‍රධාන සැකකරු අත්අඩංගුවට..! appeared first on ColomboXnews.