‘එළඹෙන ඔක්තෝබර් මාසයේ ජනාධිපතිවරණය පැවැත්වෙනවා… නිර්පාක්ෂික අපේක්ෂකයා අපේ එජාප නායක රනිල් වික්‍රමසිංහ‘ – රවී කරුණානායක

එළැඹෙන ඔක්තෝබර් මාසයේ ජනාධිපතිවරණය පැවැත්වෙන අතර ඒ සඳහා නිර්පාක්ෂික අපේක්ෂකයා වශයෙන් එජාප නායක ජනාධිපති රනිල් වික්‍රමසිංහ මහතා ඉදිරිපත් වන බව හිටපු මුදල් අමාත්‍ය රවී කරුණානායක මහතා පැවසීය.

සියලු දෙනාටම වියදම් සීමාකර මූල්‍ය පාලනයක් ඇතිකර ගන්නා ලෙස රජය අවධාරණය කර ඇති පසුබිමේ ශ්‍රී ලංකා මහ බැංකුව ඒ කිසිත් නොතකා ඔවුන්ගේ වැටුප් වැඩිකර ගැනීමේ කිසිදු සාධාරණයක් නොමැති බවද ඒ මහතා අවධාරණය කළේය.

හිටපු මුදල් අමාත්‍ය රවී කරුණානායක මහතා මේ බව සඳහන් කර සිටියේ අද (25) කොළඹ පැවති මාධ්‍ය හමුවකදී අදහස් දක්වමින් ය.

එහිදී වැඩිදුරටත් අදහස් දැක්වූ හිටපු මුදල් අමාත්‍ය රවී කරුණානායක මහතා මෙසේද පැවසීය .

රට මීට මාස 22 කට පෙර තිබූ තත්ත්වය අනුව සළකා බැලීමේදී යම් ස්ථාවරත්වයකට පැමිණ තිබෙනවා. නමුත් තව සිදුකළ යුතු දේ බොහෝ තිබෙනවා . කඩාවැටුණු රට යම් කළමනාකරණයකට ලක්කර ගැනීමට එක පුද්ගලයෙන් ඉදිරිපත් වුනා. ඒ ජනාධිපති රනිල් වික්‍රමසිංහ මහතායි. ඔහු බාරගත් වගකීම ඉටුකරන්න සමත් වූ බව කවුරුත් පිළිගත යුතුයි.

එක එක අය විවිධ ප්‍රකාශ කරනවා. මාධ්‍ය ජාල විවිධ ලෙස ඒවා වාර්තා කරනවා. නමුත් ජනතාව පීඩාවට පත්නොවන ආකාරයට රට ගොඩගැනීම ගැනයි අවධානය යොමුකරන්න අවශ්‍ය. ඒක සියලු දෙනා එකතුව කළ යුතුයි. විහිලු කාරයන් විවිධ කතා කිව්වත්, ජනාධිපති රනිල් වික්‍රමසිංහ එළැඹෙන ඔක්තෝබර් මාසයේ පැවැත්වෙන ජනාධිපතිවරණය සඳහා නිර්පාක්ෂික අපේක්ෂකයා ලෙස ඉදිරිපත් වෙනවා. එතුමා ජයග්‍රහණය කරවීමට අපි සියලු දෙනා කැපවෙනවා.

ඒ වගේම තමයි ජනතාව දැනගන්න ඕන , රටේ පසුගිය සමයේ සිදුවූ කඩා වැටීමට රාජ්‍ය නිලධාරීන් ද වගකිවයුතු බව. ඒ නිසා ඔවුන් ජනතාව ගේ පැත්තෙන් සිතා තීන්දු තීරණ ගන්න අවශ්‍යයි.

ඒ වගේම බලන්න , ගෝඨාභය ශක්තිමත් කරන්න ගිය අය දැන් විපක්ශ නායක ශක්තිමත් කරන්න යනවා. එදා ෆීල්ඩ් මාර්ෂල් නැතුව මුකුත් කරන්න බෑ කියපු අය, දැන් එලව එලවා පහරදෙනවා …

මේ හමුවේ රටට ඔබින වැඩපිලිවලක් සහ එකට හිතන්න පුලුවන් කන්ඩායමක් එකතු කරගන්න අවශ්‍යයි. මේ මොහොතේ එවැන්නක් සිදුවෙමින් තිබෙනවා . ඒ හමුවේ විපක්ෂය මැතිවරණයක් නෑ කියමින් පොඩි ජොලියක් ගන්නවා . නමුත් ජනාධිපතිවරණය තියෙනවා වගේම එහි නිර්පාක්ෂික අපේක්ෂකයා ලෙස ජනාධිපති රනිල් වික්‍රමසිංහ ඉදිරිපත් කරනවා.

The post ‘එළඹෙන ඔක්තෝබර් මාසයේ ජනාධිපතිවරණය පැවැත්වෙනවා… නිර්පාක්ෂික අපේක්ෂකයා අපේ එජාප නායක රනිල් වික්‍රමසිංහ‘ – රවී කරුණානායක appeared first on ColomboXnews.