එන්නත් මාත්‍රා දෙකම ගත්තත් ඔබ ආරක්ෂා වියයුතු ඇයි ?

කොරෝනා වෛරසය ට එරෙහි එන්නත් මාත්‍රා දෙකම ලබාගෙන සති තුනකට පසුව ඉන්දියාවේ නවදිල්ලි නගරයේ වෙසෙන මාධ්‍යවේදියෙක් ට එක් දිනක් දැඩි උණ සමග උගුරේ වේදනාව සහ යම් යම් ශාරීරික අපහසුතා ඇතිවිණි.

අප්‍රේල් 22 වනදා සිදුකළ පරීක්ෂණයකදී පල්ලවා බාග්ලා නම් එම මාධ්‍යවේදියාට කොවිඩ් වෛරසය ආසාදනය වී ඇති බව තහවුරු විය.

ඔහුගේ පෙනහළු සම්බන්ධයෙන් සිදුකළ ස්කෑන් පරීක්ෂාවකදී ඒවා සුදු පැහැ ගැන්වෙමින් ඇති බව පැහැදිලි විය. ඒ, කොවිඩ් ආසාදනය වී ඇති බවට වූ පැහැදිලි සාක්ෂියකි. 

උණ ගතිය දිගටම පැවති බැවින් රෝග ලක්ෂණ පහල වී දින 8කට පසුව ඔහු රෝහල්ගත විය. ඒ “All India Institute of Medical Sciences” නම් රෝහලට ය.

එහිදී 58 හැවිරිදි වියේ පසුවන බාග්ලා ට වෛද්‍යවරු රුධිර පරීක්ෂාව සිදුකරමින් ස්ටෙරොයිඩ් ලබාදුන්නේය. ඔහු දියවැඩියා රෝගියෙක් බැවින් ඔහුගේ රුධිරයේ සීනි ප්‍රමාණය ඉහළ ගියේය. නමුත් වාසනාවට ඔහුගේ ඔක්සිජන් ප්‍රමාණය අඩු නොවිණි.

ඔහුගේ වයසේම වූ දියවැඩියා රෝගයෙන් පෙළෙන කොවිඩ් ආසාදිත පුද්ගලයෙක්ගේ පෙනහළු ස්කෑන් වාර්තාවක් ඔහු සුවය ලබා රෝහලෙන් පිටව යෑමට පෙර වෛද්‍යවරු ඔහුට පෙන්වා තිබේ.

අනතුරුව එම වාර්තා දෙක සංසන්දනය කරන ලදී.

“වෙනස පැහැදිලියි. මම එන්නත් ලබාගෙන නොසිටියානම් මට අසාධ්‍යවීමටත් ස්වසන ආධාරක සවිකිරීමටත් සිදුවීමට ඉඩතිබූ බව වෛද්‍යවරු පැවසුවා. නියම අවස්ථාවේ එන්නත් මාත්‍රා දෙකම ලබාගෙන සිටි නිසා මගේ ජීවිතය බේරුණා,” බාග්ලා පැවසීය. 

ඉන්දියාවේ මුළු ජනගහණය බිලියන 1.3කි. ඉන් එන්නත් මාත්‍රා දෙකම ලබාදී ඇත්තේ 3% පමණ ප්‍රමාණයකට ය. එහෙත් එසේ එන්නත් දෙකම ලබාගත් පිරිස අතුරින්ද ආසාදිතයින් මේ දිනවල හමුවෙමින් තිබේ. 

මෙවැනි ආකාරයට සෞඛ්‍ය අංශයේ වෛද්‍යවරු, හෙදියන්, රෝහල් සහ සායනික සේවකයින් – විවිධ අවස්ථාවල සම්පූර්ණ එන්නත් මාත්‍රා දෙකම ලබාගෙන සිටිය ද නැවත ආසාදිතයින් බවට පත්වී ඇති බවට සාක්ෂි හමුවේ. ඒ ඔවුන් නිරතුරුවම ආසාදිතයින්ට නිරාවරණය වන බැවිනි.

නමුත් බාග්ලා නැවතත් ආසාදනය වූයේ කෙසේදැයි යන්න වෛද්‍යවරුන්ට ප්‍රශ්නාර්ථයක් වී තිබේ. එබැවින් විද්‍යාඥයින් ඔහුගේ නාසයෙන් සහ උගුරෙන් ජෛව සාම්පල ගෙන ඇත්තේ ඔහුට ආසාදනය වී ඇති වෛරස් ප්‍රභේදය ගැන වැඩිදුර පරීක්ෂණ කිරීම සඳහා ය.
  
විද්‍යාඥයින්ගේ අරමුණ ඔවුන් ට ඇති ප්‍රශ්න සඳහා පිළිතුරු සොයාගැනීමය. ඉන් වැදගත්ම කරුණ වන්නේ වරින් වර වෙනස් වෙමින් වේගයෙන් පැතිර යන කොරෝනා වෛරස් ප්‍රභේදවලින් ආරක්ෂාවීම සඳහා දැනට භාවිතයේ ඇති එන්නත් ප්‍රමාණවත් ද යන්නය.
 
කොරෝනා වෛරස් එන්නත් අනිවාර්යෙන් ම ප්‍රතිඵලදායකය. නමුත් එමගින් නැවත වෛරසය ආසාදනය වීම වැළැක්විය නොහැකිය. එහෙත් එන්නත් මගින් බොහෝ දෙනෙකුගේ ජීවිත ආරක්ෂාකරයි, මරණ අඩුකරයි. නමුත් කොරෝනා වැනි සීඝ්‍ර ව්‍යාප්තියක් ඇති වසංගත තත්ත්වයක දී එන්නත් 100%ක් සාර්ථක නොවේ.   

එබැවින් එන්නත් මාත්‍රා සම්පූර්ණයෙන් ලබාගත් අය නැවත ආසාදිතයින් වීම බලාපොරොත්තු විය හැකි තත්ත්වයකි.

අප්‍රේල් 26 වනදා වනවිට, අමෙරිකාවේ ජනගහණයෙන් මිලියන 95කට එන්නත් මාත්‍රා දෙකම ලබාදී තිබුණි. ඉන් 9,045 දෙනෙක් නැවතත් ආසාදිතයින් බවට පත්වුණි. එරට රෝග පාලනය සහ වැලැක්වීම සඳහා වූ මධ්‍යස්ථාන ඒ බව සඳහන් කරයි.
 
ඉන් 835 දෙනෙක් රෝහල්ගත කළ අතර ආසාදිතයින් 132ක් මියගොස් තිබුණි. 

රෝහල්ගත කළ ආසාදිතයින්ගෙන් 3/1ක් පමණ සහ මියගිය අයගෙන් 15% රෝග ලක්ෂණ පෙන්වා නැත. එමෙන්ම සමහරු මියගොස් ඇත්තේ වෙනත් හේතු මතය.
 
නමුත් ඉන්දියාවේ තත්ත්වය අපැහැදිලිය. ඒ දත්ත දුර්වල බැවිනි.

එබැවින් සෞඛ්‍ය විශේෂඥයින් පවසන්නේ, යමෙක් සම්පූර්ණ මාත්‍රා දෙකම ලබාගෙන තිබුණ ද නැවතත් ආසාදිතයෙක් වීමට සහ වෛරසය අන් අයට බෝ කිරීමට හැකියාව ඇති බැවින් යහපත් සෞඛ්‍ය පුරුදු පවත්වා ගෙන යාම වැදගත් බවය.

මුහුණු ආවරණ පැළඳීම, එකිනෙකා අතර නියමිත දුර පවත්වාගෙන යාම, නිතර අත් සේදීම, වැනි යහපත් පුරුදු රෝගීවීම වළක්වා ගැනීමටත් රෝගය බෝ නොකර සිටීමටත් වැදගත් බව ඔවුන් පවසයි.

The post එන්නත් මාත්‍රා දෙකම ගත්තත් ඔබ ආරක්ෂා වියයුතු ඇයි ? appeared first on ColomboXnews.