එංගලන්තයට ලකුණු 26ක ජයක්

පන්දුවාර 20 ලෝක කුසලාන ක්‍රිකට් තරගාවලියේ ශ්‍රී ලංකාවට අතිශයින් තීරණාත්මක එංගලන්ත කණ්ඩායම සමඟ තරගයේ කාසියේ වාසිය දිනා ගත්තේ ශ්‍රී ලංකා කණ්ඩායමේ නායක දසුන් ශානකයි. ඔහු පළමුව පන්දු යැවීම තෝරාගත්තා.එයට අගනා ප්‍රතිචාරයක් ලබා දෙමින් එංගලන්ත කණ්ඩායමේ පළමු කඩුල්ල මුළු ලකුණු සංඛ්‍යාවක් 13 ක් ව තිබියදී දවා ගන්නට වනිදු හසරංග සමත්වුණා.ඔහුගේ පන්දු හමුවේ දැවී ගියේ ලකුණු 9ක් ලබා සිටි ජේසන් රෝයි.

ඉන් අනතුරුව එංගලන්ත කණ්ඩායමේ දෙවැනි කඩුල්ල මුළු ලකුණු සංඛ්‍යාව 34 ක් ව තිබියදී බිඳ වැටුනා. දුෂ්මන්ත් චමීරගේ පන්දු හමුවේ ඩේවිඩ් මාලන් ලකුණු 6 කට දැවී ගියේ එංගලන්ත කණ්ඩායම යම් අසීරුතාවකට ඇද දමමින්.
මුළු ලකුණු සංඛ්‍යාව 35ක් වෙද්දි වනිදු හසරංග ගේ පන්දු හමුවේ ජොනී බෙයාස්ටෝව් ලකුණු නොලබා දැවී ගියේ තරගයේ වාසිය ශ්‍රී ලංකා පිල වෙත යොමු කරමින්.මේ වන විට එංගලන්ත කණ්ඩායම තරගයේ මුහුණ දී තිබුණේ පන්දුව ඕවර පහයි පන්දු දෙකකට පමණයි.කෙසේ වෙතත් ඉන්පසුව ස්ථාවර වූ ජෝෂ් බට්ලෙර් සහ ඔයින් මෝර්ගන් දෙදෙනා එංගලන්ත කණ්ඩායමේ ලකුණු සංඛ්‍යාව ක්‍රමයෙන් ඉහළ නංවන්නට වුණා.

සෙමින් නමුත් ස්ථාවරව අවස්ථාවක් ලැබෙන තෙක් මේ ක්‍රීඩකයින් දෙදෙනා ඉවසීම් සහගතව ක්‍රීඩා කළා.පන්දු ඕවර 13 ක් තුළ දෙදෙනා අතර ගොඩනැඟුණු ලකුණු 112 ක සම්බන්ධතාව බිඳ දමන්නට 18 වැනි පන්දුවාරයේදී පන්දුව අතට ගත් වනිදු හසරංග සමත් වුණා.ඒ ඔයින් මෝර්ගන් ලකුණු 40ට දවා ගනිමින්.ඉනිම අවසන් වන තුරු සිය අන්තය රැකගත් ජෝෂ් බට්ලෙර් පන්දු 65කට මුහුණ දෙමින් ලකුණු එක 101 ක් රැස්කර ගත්තේ මෙවර පන්දුවාර 20 ලෝක කුසලාන තරගාවලියේ පළමු ශතකය ද වාර්තා කර ගනිමින්.

ඔහුගේ ලකුණු සියයට හතරේ පහර හයක් සහ හයේ පහර හයක් අන්තර්ගතව තිබුණාපන්දු යැවීමේදී නැවතත් සිය යුතුකම් කොටස මැනවින් ඉටුකළ වනිදු හසරංග පන්දුවාර හතරක් තුළ එංගලන්තයට ලකුණු 21ක් පමණක් ලබා දෙමින් ඔවුන්ගේ කඩුලු 3ක් බිඳ දැමුවා.ඒ මෙවර පන්දුවාර ලෝක 20 ලෝක කුසලාන තරගාවලියේ වැඩිම කඩුලු ලාභියා වශයෙන් තමන් සතු කරගෙන ඇති ගෞරව නාමය තවත් ඉදිරියට ගෙන යමින්.ලකුණු 164ක ඉලක්කයක් හඹා යෑමේ ඉනිම ඇරඹූ ශ්‍රී ලංකා කණ්ඩායමේ පළමු කඩුල්ල බිඳ වැටුනේ මුළු ලකුණු සංඛ්‍යාව එකක්ව තිබිය දී.

නොතිබූ ලකුණකට පැතුම් නිස්සංක කැඳවූ කුසල් පෙරේරා ඔහු  දුවද්දී දැවී යාමකට හසු කළේ ජ්‍යෙෂ්ඨ ක්‍රීඩකයෙකු ලෙස ලෝක කුසලාන ක්‍රිකට් තරගාවලියේ ඔහුගේ දායකත්වය දැඩි ප්‍රශ්නාර්ථයකට ලක් කරමින්.මෙවර තරගාවලිය පුරා දැඩි ලෙස අසාර්ථක වූ කුසල් ජනිත් කඩුළු රැකීමෙන් හෝ ආරම්භක පිතිකරු ලෙස පන්දුවට පහරදීමෙන් මෙතෙක් කිසිදු කැපී පෙනෙන දක්ෂතා පෙන්වීමට නොහැකි වීම තේරීම් කමිටු සාමාජිකයින් තවදුරටත් තේරුම් නොගන්නේ මක් නිසාද යන්න ක්‍රීඩාලෝලීන්ට බරපතල ගැටලුවක්.

ඉන් පසු පිටියට පිවිසි චරිත් අසලංක එංගලන්ත පන්දු යවන්නන් තඹයකට මායිම් නොකරමින් පන්දු 16කදී වේගවත් ලකුණු 21ක් රැස් කළද ඔහු අදිල් රෂීඩ්ගේ පන්දු හමුවේ මොයින් අලී රැකගත් උඩපන්දුවක් හේතුවෙන් දැවී ගියා.ඒ වන විට ශ්‍රී ලංකා කන්ඩායමේ මුළු ලකුණු සංඛ්‍යාව දැක්වුණේ ලකුණු 24 ක් වශයෙන්.මුළු ලකුණු සංඛ්‍යාව 34ක් වෙද්දි ශ්‍රී ලංකා කණ්ඩායමේ තුන්වැනි කඩුල්ල ලෙස කුසල් ජනිත් පෙරේරා දැවී ගියේ පන්දු නවයකට මුහුණ දෙමින් ලකුණු 7ක් පමණක් රැස් කර සිටියදී.කුසල් ජනිත් හා සමානවම කණ්ඩායමේ රඳවා තබාගැනීම සම්බන්ධයෙන් ප්‍රශ්නාර්ථයක් මතු ව ඇති අවිශ්ක ප්‍රනාන්දු ලකුණු 13ක් ලබා සිටියදී දැවී ගියේ ක්‍රිස් ජෝර්ඩන්ගේ පන්දුවට කඩුල්ල මුවා කිරීමේ වරදට හසු වෙමින්.

අවිශ්ක මෙවර ලෝක කුසලාන තරගාවලිය තුළ පිත්තෙන් කිසිදු කැපී පෙනෙන දස්කමක් දැක්වීමට සමත් නොවීම විශේෂත්වයක්.ඉන් පසු පිටියට පිවිසි භානුක රාජපක්ෂ තරමක් වේගයෙන් පන්දුවට පහර දුන්න ද ලකුනු 26ක් ලබා සිටියදී ක්‍රිස් වෝක්ස් ගේ පන්දු හමුවේ ජේසන් රෝයි රැකගත් උඩපන්දුවක් හේතුවෙන් දැවී ගියා.ඔහුගේ ලකුණු 26 ඇතුළත හතරේ පහර දෙකක් සහ හයේ පහර දෙකක් ඇතුළත්ව තිබුණා.මේ වන විට ශ්‍රී ලංකා කණ්ඩායම මුළු ලකුණු සංඛ්‍යාව දැක්වුණේ කඩුලු පහකට ලකුනු 76ක් වශයෙන්.6 වැනි කඩුල්ලට ලකුණු 53 ක සම්බන්ධතාවක් ගොඩ නැගූ වනිදු හසරංග සහ දසුන් ශානක දෙදෙනා ශ්‍රී ලංකා කණ්ඩායම බලාපොරොත්ය යම් තරමකට ඉහළ නංවන්නට සමත් වුණා.

නමුත් එම බලාපොරොත්තු බිඳ වැටුණේ එංගලන්ත කණ්ඩායමේ විශිෂ්ට පන්දු යැවීම හමුවේ වනිදු හසරංග ලකුණු 34 කට දැවී යාමත් සමගයි.පන්දුවෙන් මෙන්ම පිත්තෙන් ද සිය උපරිම කාර්යභාරය ඉටු කළ වනිඳු ගේ ලකුණු 34 ඇතුළත හතරේ පහර 3ක් සහ හයේ පහර එකක් අන්තර්ගතව තිබුණා.දසුන් ශානක ලකුණු 26කට දැවී ගියේ පන්දු 25කට මූණ දෙමින්.  ඔහුගේ ලකුණු විසි 26 ඇතුළත හතරේ පහර දෙකක් සහ එක් 6 පහරක් අන්තර්ගතව තිබුණා.මේ දෙදෙනාගේ දැවී යාමෙන් අනතුරුව  අනෙක් ශ්‍රී ලංකා පිතිකරුවන්ට ස්ථාවර වීමට එංගලන්ත විශිෂ්ට පන්දු යැවීම සහ පන්දු රැකීම හමුවේ හැකියාවක් ලැබුනේ නැහැ.ඔවුන් හතර සීමාව ආසන්නයේදී අති විශිෂ්ට ගණයේ උඩපන්දු කිහිපයක්ම රැක ගත්තා.

මේ අනුව ශ්‍රී ලංකා ඉනිම පන්දු වාර 19ක් තුළදී ලකුණු 137 කට සීමා වුණා.ඒ එංගලන්ත කණ්ඩායමට ලකුණු 26 ක ජයග්‍රහණයක් හිමිකර දෙමින්.පන්දු යැවීමේදී අදිල් රෂීඩ්, මොයින් අලී සහ ක්‍රිස් ජෝර්ඩන් අතරේ කඩුලු 2 බැගින් බෙදී ගියා.

The post එංගලන්තයට ලකුණු 26ක ජයක් appeared first on ColomboXnews.