ඇමෙරිකාවේ විස්කොන්සින් හි තුන්වෙනි දින රාත්‍රියේ ගැටුම් අතර දෙදෙනෙකු මරුට

පොලිසිය විසින් කළු ජාතිකයෙකුට වෙඩි තැබීමෙන් අනතුරුව ඇමෙරිකා එක්සත් ජනපදයේ කෙනෝෂා නගරයේ තුන්වෙනි දින රාත්‍රියේත් හටගත් නොසන්සුන් වාතාවරණය අතරවාරයේ දෙදෙනෙකු මරුමුවට පත්ව තවත් පුද්ගලයෙකුට තුවාල සිදු වී තිබේ.

තිදෙනෙකුට වෙඩි තබා තිබෙන බව පොලිසිය පවසන නමුත් එයට සම්බන්ධ කවුරුන්ද යන්න පිළිබඳව වැඩි විස්තර හෙළි කොට නැත.

ඉන්ධන පිරවුම්හලක ආරක්ෂාවට යොදවා සිටි සන්නද්ධ කණ්ඩායමක් සහ, විරෝධතාකරුවන් අතර හටගත් ගැටුමක් ප්‍රචණ්ඩ ක්‍රියා දක්වා වර්ධනය වී ඇතැයි විශ්වාස කෙරෙන බව ප්‍රාදේශීය මාධ්‍ය වාර්තා කළේය.

ගොඩනැගිලි සහ මෝටර් රථවලට ගිනි තබමින් උද්ඝෝෂකයින් දින ගණනාවක් විරෝධතාවල නිරතව සිටින්නේ ජේකබ් බ්ලේක් (Jacob Blake) නැමති 29 හැවිරිදි කළු ජාතිකයා පොලිස් වෙඩි ප්‍රහාර ගණනාවකට ලක් වී රෝහල්ගත කරනු ලැබීමෙන් අනතුරුවය.

ජේකබ් බ්ලේක් කෙනෝෂා නගරයේදී සිය මෝටර් රථයට පිවිසීමට උත්සාහ කරන අවස්ථාවේ ඔහුගේ පිටුපසට වෙඩි ප්‍රහාර එල්ල වන ආකාරය අන්තර්ජාලයේ පළ වී ඇති වීඩියෝවක දක්නට ලැබේ. ඔහුට යළිත් වරක් ඇවිද යාමට හැකිවුවහොත් එය “ආශ්චර්යයක්” වනු ඇති බව ඔහුගේ නීතිවේදීහු පවසති.

වෙඩි තැබීමෙන් අනතුරුව හටගත් නොසන්සුන්කාරී තත්ත්වයත් සමග කෙනෝෂා නගරයේ රාත්‍රිය පුරා ඇඳිරි නීතිය පනවනු ලැබ තිබුන ද ඇතැම් උද්ඝෝෂකයෝ එය නොතකා වීදි බැස සිටියහ. ඇතැම් අවස්ථාවල එම උද්ඝෝෂණ ප්‍රචණ්ඩ ස්වභාවයක් ගත්තේය.

The post ඇමෙරිකාවේ විස්කොන්සින් හි තුන්වෙනි දින රාත්‍රියේ ගැටුම් අතර දෙදෙනෙකු මරුට appeared first on ColomboXnews.