ආනවිලුන්දාව ඩෝසර් කළේ ඇමති සොයුරෙක් කියලා අපි කියන්නෙ නෑ. ඔහුව පොලිසියට හොයාගන්නත් බෑ ! – සී.බී.

ආනවිලුන්දාව රැම්සා තෙත් බිම් ඩෝසර් කළ බවට කමිටු වාර්තාවෙන් හෙළිවී ඇති පුද්ගලයා තමන් හඳුන්වන්නේ හිටපු ප්‍රාදේශීය සභා සභාපතිවරයකු වශයෙන් මිස ඇමති සනත් නිශාන්ත මහතාගේ සොහොයුරෙකු වශයෙන් නොවන බවත් එම පුද්ගලයාගෙන් ප්‍රකාශයක් සටහන් කරගැනීම සඳහා පොලිසිය ඔහුව සොයන මුත් මෙතෙක් ඔහුව එම ප්‍රදේශයෙන් සොයා ගැනීමට නොහැකි වී ඇති බවත් වනජීවී අමාත්‍ය සී.බී. රත්නායක මහතා පවසයි. 

“වැරදිකරු නම් මං කිව්වෙ ඒකයි ඔහුගේ තරාතිරම අදාළ වෙන්නෙ නෑ, පරීක්ෂණ වාර්තාවෙ කියන්නේ අපි කමිටුවක් දැම්මා ඒ කමිටු වාර්තාවෙ තියෙනවා මේ වගේ උපදෙස් දෙන කෙනෙක් කියලා. ඒ නිසා ඔහුගේ කට උත්තරයක් ගැනීම සඳහා කටයුතු කරන්න සූදානම් වෙනකොට ඔහු ඒ පළාතෙ නැතිකම තමයි දැනට කියන්නෙ නියෝජ්‍ය පොලිස්පතිතුමා. 

අමාත්‍යවරයෙක්ගෙ සහෝදරයෙක් කියලා එකක් නෙවෙයි, හිටපු සභාපතිවරයෙක් කියන එක තමයි එතන තියෙන්නෙ. 

රැම්සා ගිවිසුම යටතේ තෙත් කලාපයක් බවට පරිවර්තනය කළා නම් පොඩි එකක්ද ලොකු එකක්ද කියලා නෑ, ඒකට කාටවත් අනවසරයෙන් ඇතුළු විය නොහැක. ඒ නිසාම තමයි අපි නීතිය ක්‍රියාත්මක කළේ” යනුවෙනුයි ඒ මහතා සඳහන් කළේ. 

අමාත්‍ය සී.බී. රත්නායක මහතා මේ බව පැවසුවේ ඊයේ (11) පැවති මාධ්‍ය හමුවක් අමතමිනි.

ජගත් සමන්ත යනු අමාත්‍ය සනත් නිශාන්තගේ සොහොයුරෙකු බව වනජීවී අමාත්‍යාංශය කිසිදු තැනක සඳහන් කර නොමැති බව එහිදී අමාත්‍යාංශ නිලධාරියෙකු මාධ්‍ය වෙත අවධාරණය කළ අතර ඔහු ඇමති සොයුරෙකු බව කියන්නේ සමාජය බවත් එම නිලධාරියා සඳහන් කළේය. ඇමති සී.බී. රත්නායක මහතා පැවසුවේ ද එම ජගත් සමන්ත යන පුද්ගලයාගේ උප්පැන්න සහතිකය තමන් නොබැලූ බවකි. 

(LNW)

The post ආනවිලුන්දාව ඩෝසර් කළේ ඇමති සොයුරෙක් කියලා අපි කියන්නෙ නෑ. ඔහුව පොලිසියට හොයාගන්නත් බෑ ! – සී.බී. appeared first on ColomboXnews.