“ආණ්ඩුව ගැන කළකිරුණු කිසිවෙක් නොමැති ගෙදරකින් හැකිනම් වතුරු වීදුරුවක් ගෙනත් දෙන්න“ – මුරුත්තෙට්ටුවේ ආනන්ද හිමි

ආණ්ඩුව කෙරෙහි ගොඩනැගී ඇති ජනතා අප්‍රසාදය අවම කිරීමට නම් මුදල් අමාත්‍යධුරය අග්‍රාමාත්‍යවරයාට භාර දිය යුතු බව පූජ්‍ය මුරුත්තෙට්ටුවේ ආනන්ද හිමියෝ පවසති.

කොළඹදී මාධ්‍ය වෙත අදහස් දක්වමින් උන්වහන්සේ ඒ බව සඳහන් කළහ.

ආණ්ඩුව ගෙන යා යුත්තේ මහින්ද රාජපක්ෂ අගමැතිවරයාගේ කළමනාකාරීත්වය හා අධීක්ෂණය මත බවත්, බැසිල් රාජපක්ෂ මහතා මුදල් ඇමති තනතුරින් ඉවත් කර සංවර්ධන කටයුතුවලට අදාල ඇමති ධුරයක් ලබාදිය යුතු බවයි උන්වහන්සේ පෙන්වා දෙන්නේ.

ආණ්ඩුව තවදුරටත් ජනතාවිරෝධී ලෙස කටයුතු කරන්නේ නම්, එදා පා ගමන් ගොස්, ආණ්ඩුව පිහිටවූ ආකාරයෙන්ම පාරට බැස ආණ්ඩුව ගෙදර යැවීමට කටයුතු කරන බවත් උන්වහන්සේ අවධාරණය කරනවා.

මේ වනවිට රටේ සියලු ජනතාවට ආණ්ඩු විරෝධයක් ඇති බවත්, සියලු‌ දෙනා ආණ්ඩුව පිළිබඳව දැඩි කළකිරීමෙන් පසුවන බවත් මුරුත්තෙට්ටුවේ හිමි සඳහන් කරනවා. කිසා ගෝතමියකට නොමළ ගෙයකින් අබ මිටක් ගෙනෙන්නැයි කිවූ අයුරින්ම හැකිනම් ආණ්ඩුව ගැන කළකිරුණු කිසිවෙක් නොමැති ගෙදරකින් හැකිනම් වතුරු වීදුරුවක් ගෙනෙන්නැයි ආණ්ඩුවට අභියෝග කරන බවද ආනන්ද හිමියන් ප්‍රකාශ කරනවා.

“ජනතාව ආණ්ඩුවක් පත්කර ගත්තේ පෝලිම්වල ඉන්නවත්, කරුවලේ ඉන්නවත්, පයින් ඇවිදින්නවත් නෙමෙයි. මේ රට දියුණු කරලා ලස්සන ශ්‍රී ලංකාවක් ගොඩ නගන්නට තමයි ජනතාවගේ අපේක්ෂාව තිබුණේ. නමුත් අද 69 ලක්ෂයක් බලය දුන්නට, 69 ලක්ෂයට ඇහුම්කන් නෙමෙයි දෙන්නේ. එක පුද්ගලයෙකු ට අද අහුම්කන් දීලා ඒ පුද්ගලයාගේ වැඩ කරගෙන යන්නේ. ඒ නිසා මේ ජනතා අප්‍රසාදය වැඩි වෙලා තිබෙනවා. අද මිනිස්සුගේ තිබෙන අප්‍රසාදය කලකිරීම පුළුවන් තරම් අඩුකරන්න බැසිල් රාජපක්ෂ මුදල් ඇමතිවරයාට වෙන සංවර්ධන කටයුත්තක් භාරදීලා, මුදල් අමත්‍යාංශයේ කටයුතු ටික අග්‍රාමාත්‍යවරයාට භාර දීලා, අග්‍රාමාත්‍යවරයාට මේ රට ගෙනියන්නට අවස්ථාවක් ලබාදෙන්න. ගෝඨභය රාජපක්ෂ මහතා ජනාධිපතිකම හොබවන්නට කියෙන එක තමයි අපේ එකම ඉල්ලීම. මේ පෝලින් යුඟය තවදුරටත් ගමන් කළොත් මම හිතනවා අපේ ජනතාවට කබලෙන් ළිපට වැටෙන්නට සිදුවෙයි.”

The post “ආණ්ඩුව ගැන කළකිරුණු කිසිවෙක් නොමැති ගෙදරකින් හැකිනම් වතුරු වීදුරුවක් ගෙනත් දෙන්න“ – මුරුත්තෙට්ටුවේ ආනන්ද හිමි appeared first on ColomboXnews.