‘අත්අඩංගුවේ සිටියදී ගඟට පැන්නයි කියන මගේ පුතා පොලිසිය විසින් පහරදී මරා ගඟට දාලා‘ – සැකකරුගේ මව හඩමින් කියයි.

ගාල්ල, බද්දේගම පොලිසියේ අත් අඩංගුවේ සිටියදී ගිං ගඟට පැන පළායාමට තැත් කළ බවට පොලිසිය සඳහන් කරන සැකකරු පොලිසිය විසින් පහරදී මරා දමා පසුව ගඟට වීසි කර ඇතැයි සැකකරුගේ ඥාතීහු චෝදනා කරති. 

මෙම සැකකරු පසුගිය සඳුදා (20) දිනයේදී වැසිකිලි යාමට කැඳවාගෙන ගිය අවස්ථාවේදී ගිං ගඟට පැන අතුරුදන් වූ බව පොලිසිය සඳහන් කර තිබුණු අතර ඔහුගේ මළසිරුර ඊයේ (23) දහවල් ගිං ගඟේ පාවෙමින් තිබියදී හමුවී ඇත. 

“අපි කෑම උයාගෙන ආවා පොලිසියට. බත් එක අරගෙන කිව්වා, කසුන් නිදිය කිව්වා හොඳටම. නැගිට්ට වෙලාවක අපි කන්න දෙන්නම්ය කිව්වා, ඕගොල්ලො යන්න කිව්වා ගෙදර. මේගොල්ලො කරේ මොකද්ද, මේ ගොල්ලො තියාගෙන ගැහුවා, ගැහුවා, ගැහුවා, ගැහුවා …. කොල්ලට. ගහලා ගහලා කොල්ලා මැරුණා. පස්සෙ මේ ගොල්ලො ගඟට වීසි කරා” යනුවෙනුයි සැකකරුගේ පියා පැවසුවේ. 

මියගිය සැකකරුගේ මව හඬාවැටෙමින් ප්‍රශ්න කළේ “එළවං ගියා නම් මේ 30ක් 20ක් ඉන්න පොලිසියෙ ඇයි මගේ දරුවා අල්ලාගන්න බැරුවුණේ මහත්තයෝ …” යනුවෙනි. 

මියගොස් ඇත්තේ ගෝනාපිනූවල ප්‍රදේශයේ පදිංචිව සිටි 24 හැවිරිදි තරුණයකු වන අතර ඔහුට එරෙහිව චෝදනා එල්ල වී තිබුණේ මුදල්, රන් භාණ්ඩ සහ යතුරු පැදි සොරකම් කිරීම සම්බන්ධයෙනි. 

The post ‘අත්අඩංගුවේ සිටියදී ගඟට පැන්නයි කියන මගේ පුතා පොලිසිය විසින් පහරදී මරා ගඟට දාලා‘ – සැකකරුගේ මව හඩමින් කියයි. appeared first on ColomboXnews.