DFCC බැංකුව කුඩා පරිමාණ කිරි ආශ්‍රිත නිෂ්පාදන ව්‍යවසාය සංවර්ධන වෙනුවෙන් රු. මිලියන 500 ක් වෙන් කරයි

DFCC බැංකුව ශ්‍රී ලංකාවේ කිරි කර්මාන්තය ශක්තිමත් කිරීම සඳහා සුවිශේෂී පියවරක් තබමින්, මෙරට කුඩා පරිමාණ කිරි නිෂ්පාදන ආශ්‍රිත ව්‍යවසායකයින් වෙනුවෙන් රු. මිලියන 500 ක මූල්‍ය පහසුකම් සැපයීමට පියවර ගෙන තිබේ. මෙය රටේ තිරසාර සංවර්ධනයට දායක වීම සඳහා බැංකුව දරන උත්සාහයේ තවත් වැදගත් පියවරකි. බැංකුවේ ක්ෂුද්‍ර, කුඩා හා මධ්‍යම පරිමාණ ව්‍යාපාර ඒකකයේ [MSME (Micro, Small, and Medium Enterprises) Unit ] සංකල්පයක් අනුව, මීට පෙර ඇමරිකා එක්සත් ජනපදයේ කෘෂිකර්ම දෙපාර්තමේන්තුවේ අනුග්‍රහය සහිතව ක්‍රියාවට නැංවූ ‘Market-Oriented Dairy’ (MOD) වැඩසටහනේ සාර්ථකත්වය තුළින් ලද අත්දැකීම් මත පදනම් වෙමින් මෙම වැඩසටහන සැලසුම් කරන ලදි. මුළුමනින්ම DFCC බැංකුව විසින් ක්‍රියාවට නංවනු ලබන ණය යෝජනා ක්‍රමයක් වන මෙහි මූලික ඉලක්කය වන්නේ, ශ්‍රී ලංකාවේ කිරි කර්මාන්තයේ සැලකිය යුතු කොටසක් වන කුඩා පරිමාණ කිරි ගොවීන් වෙත සහනදායී පොලී අනුපාත යටතේ මූල්‍ය පහසුකම් සපයමින්, බිම් මට්ටමේ සිටම ඔවුන්ගේ දියුණුව උදෙසා අත්වැලක් සැපයීම ය.

Market-Oriented Dairy (MOD) වැඩසටහනේ සමාප්ති උත්සවයේදී DFCC බැංකුවේ උප සභාපති (ක්ෂුද්‍ර, කුඩා හා මධ්‍යම පරිමාණ ව්‍යාපාර සේවා) චන්දන වනිගසේන මහතා විසින් මෙම නව ණය යෝජනා ක්‍රමය නිල වශයෙන් නිවේදනය කරන ලදි. “Sri Lanka Dairy—The Art of the Possible” නම් වූ මෙම උත්සවය 2024 මැයි 17 දින කොළඹ ගාලු මුවදොර හෝටලයේදී පැවැත්විණි. ශ්‍රී ලංකාවේ කුඩා පරිමාණ කිරි ගොවීන් නගාසිටුවීම සඳහා (Market Oriented Dairy) වැඩසටහනෙන් ලැබුණු දායකත්වය එහිදී ප්‍රධාන වශයෙන් සාකච්ඡාවට ලක්විය.

මෙම උත්සවයේදී අදහස් දැක්වූ චන්දන වනිගසේන මහතා, DFCC බැංකුවේ ක්ෂුද්‍ර, කුඩා හා මධ්‍යම පරිමාණ ව්‍යාපාර ඒකකය අත්කරගෙන ඇති ප්‍රගතිය සම්බන්ධයෙන් අදහස් පළකළේ ය. කිරි ගොවීන් ව්‍යවසායකයන් බවට පරිවර්තනය කිරීම සඳහා MOD වැඩසටහන මගින් දරන ලද උත්සාහයට අත්වැලක් වෙමින්, සුවිශේෂි මූල්‍ය සම්පාදන ආකෘතියක් යටතේ කිරි ගොවීන් 2,500 කට අධික පිරිසකට මූල්‍ය පහසුකම් සැපයීමට එම ඒකකය සමත් විය. මෙය සාර්ථකත්වය පරීක්ෂා කළ හැකි ක්‍රමවේදයකට මනා උදාහරණයක් ලෙස හැඳින්විය හැකි අතර, එය මේ වනවිට ක්ෂේත්‍රයේ වර්ධනය උදෙසා කැපීපෙනෙන දායකත්වයක් දක්වා තිබේ.

“DFCC බැංකුව මෙම වැඩසටහන මෙතරම් මුදලක් වෙන්කිරීම මගින් පෙනී යන්නේ, මෙරට කිරි කර්මාන්තයේ දියුණුව සම්බන්ධයෙන් බැංකුව දක්වන උනන්දුව හා කැපවීමයි. යෝජිත ‘DFCC-MOD Dairy Farmer Loyalty’ වැඩසටහනට සහය දැක්වීම සහ දිනකට කිරි ලීටර් 100 ක් නිෂ්පදනය කිරීමට සමත් වන කිරි ව්‍යවසායකයන් පිරිසක් බිහිකිරීමේ ප්‍රයත්නය තුළ MOD ආකෘතිය පෙන්නුම් කළ සාර්ථකත්වය මත පදනම් වෙමින්, කුඩා පරිමාණ කිරි ගොවීන්ගේ මූල්‍ය ස්ථාවරත්වය සහ ඔවුන්ට දියුණුව කරා යාමට ඇති අවස්ථා වැඩිදියුණු කිරීමට අප පියවර ගනිමින් සිටිනවා.” චන්දන වනිගසේන මහතා වැඩිදුරටත් පැවසී ය.

මෙම වැඩසටහන මඟින් කිරි නිෂ්පාදනය කර්මාන්තයේ දියුණුව උදෙසා විශාල සහයෝගයක් ලැබෙන  ඇති අතර, එය ශ්‍රී ලංකාවේ ආර්ථිකයට යහපත් බලපෑමක් ඇතිකිරීමේ හැකියාව ඇති කර්මාන්තවල දියුණුව වෙනුවෙන් DFCC බැංකුව යොමුකරන ක්‍රමෝපායික අවධානයට මනා සාක්ෂියකි. මේ ඔස්සේ සහනදායී පොලී අනුපාත යටතේ මූල්‍ය පහසුකම් ලබාගත හැකි නිසා මෙම වැඩසටහන කුඩා පරිමාණ ගොවීන්ට බෙහෙවින් ආකර්ෂණීය සහ වාසිදායක වනු ඇත. වටිනාකම් දාම සංවර්ධනයට අවධානය යොමුකිරීම, ප්‍රධාන කාර්යසාධන දර්ශක 10 ක් භාවිතයට ගැනීම සහ MOD වැඩසටහනේ Climate-Smart Dairy (CSD) මුලපිරීමට සහය දැක්වීම යන සාධක, තිරසාර කෘෂිකාර්මික ක්‍රමවේදයන් වෙනුවෙන් බැංකුව දක්වන කැපවීමට තවදුරටත් සාක්ෂි දරයි.

ශ්‍රී ලංකාව තුළ ක්‍රියාවට නංවන ලද Market-Oriented Dairy (MOD) වැඩසටහනට අරමුදල් සපයන ලද්දේ ඇමරිකා එක්සත් ජනපදයේ කෘෂිකර්ම දෙපාර්තමේන්තුව මගින් වන අතර, වොෂින්ටනය පදනම් කරගත් ලාභ සඳහා නොවන සංවිධානයක් වන Improving Economies for Stronger Communities (IESC) විසින් එය මෙහෙයවන ලදි. කිරි ගොවීන්ගේ තාක්ෂණික දැනුම වැඩිදියුණු කිරීම, ඔවුන් තුළ ව්‍යවසායකත්ව ආකල්ප ඇතිකිරීම තුළින් නැණවත් ලෙස ආයෝජනය කිරීමට ඔවුන් යොමුකරවීම මෙන්ම, ඔවුන්ගේ කිරි නිෂ්පාදනය දෙගුණ කරවීම මෙම ව්‍යාපෘතියේ මූලික අරමුණු විය. එහිදී මෙම කිරි ගොවීන්ගේ හැකියාවන් තක්සේරු කර, ඔවුන්ට විශ්වාසයෙන් යුතුව ණය පහසුකම් ලබාදීමට බැංකුව කටයුතු කළේ ය.

ශ්‍රී ලංකාවේ වැදගත් කර්මාන්ත තුළ තිරසාර සංවර්ධනයක් ඇතිකරවීම සඳහා අවශ්‍ය සහයෝගය ලබාදීමට DFCC බැංකුව අඛණ්ඩව කටයුතු කරමින් සිටී. එම උත්සාහයේ කොටසක් වශයෙන් මෙරට කිරි කර්මාන්තයේ පරිවර්තනයක් සිදුකරමින්, එහි දීර්ඝකාලීන තිරසාරත්වය හා සමෘද්ධිය ඇතිකරවීම බැංකුවේ අරමුණ වී තිබේ.

The post DFCC බැංකුව කුඩා පරිමාණ කිරි ආශ්‍රිත නිෂ්පාදන ව්‍යවසාය සංවර්ධන වෙනුවෙන් රු. මිලියන 500 ක් වෙන් කරයි appeared first on Adaderana Biz Sinhala | Sri Lanka Business News.