සිව්වැනි දිනයටත් කොටස් වෙළෙඳපොළ පහළ යද්දී විදෙස් මිල දී ගැනීම් ඉහළ යයි

අඛණ්ඩව සිව්වැනි දිනයටත් කොළඹ කොටස් වෙළෙඳපොළ මිල දර්ශක අද (26) දිනයේ දී පහළ යන ලදී. ඒ අනුව දිනය අවසානයේ දී සියලු කොටස් මිල දර්ශක අගය ඒකක 8,193.39 ක් ලෙසත් S&P SL20 දර්ශක අගය ඒකක 2,863.75 ක් ලෙසත් සටහන්ව තිබුණි. මෙය පෙර දිනයට සාපේක්ෂව පිළිවෙලින් ඒකක 34.69 ක හා ඒකක 2.49 ක පහළ යාමක් වේ.

රු. බිලියන 2.28 ක ගනුදෙනු පිරිවැටුමක් අද දිනයේ දී වාර්තා විය.

මෙහිදී දක්නට ලැබෙන සුවිශේෂී සිදුවීම නම් අද දිනයේ දී විදේශීය මිල දී ගැනීම් හි කැපී පෙනෙන ඉහළ යාමක් වාර්තා වීමයි. එහිදී රු. මිලියන 476.20 ක විදේශීය මිල දී ගැනීම් ප්‍රමාණයක් සටහන් වූ අතර අද දින දේශීය මිල දී ගැනීම් රු. බිලියන 1.81 ක් ලෙසින් සටහන්ව ඇත. දිනය තුළ දේශීය විකිණුම් රු. බිලියන 2.21 ක් ලෙසත්, විදේශීය විකිණුම් රු. මිලියන 70.75 ක් ලෙසත් වාර්තා වේ.

අද දින ගිවිසා ගනු ලැබූ ගනුදෙනු 3 ක් වාර්තා විය. එහිදී එක්ස්පෝලංකා හෝල්ඩිංග්ස් හි කොටස් මිලියනයක් එකක් රු. 215.00 බැගින්, ජෝන් කීල්ස් හෝල්ඩිංග්ස් හි කොටස් 500,000 ක් එකක් රු. 122.00 බැගින් සහ CDB සමාගමේ කොටස් 525,000 ක් එකක් රු. 200.00 බැගින් හුවමාරු වී තිබුණි. එහිදී පිළිවෙලින් රු. මිලියන 215 ක්, රු. මිලියන 61 ක් හා රු. මිලියන 105 ක් වශයෙන් පිරිවැටුම් වාර්තා වී තිබුණි.

මීට අමතරව අද දින සාමාන්‍ය දෛනික ගනුදෙනුවලින් පිරිවැටුමට ඉහළ දායකත්වයක් ලබා දී තිබුණේ එක්ස්පෝලංකා හෝල්ඩිංග්ස් (රු. මිලියන 359 ක්) හා ලංකා IOC (රු. මිලියන 310.92 ක්) සමාගම්වල කොටස් ගනුදෙනුවලින් පමණි. සෙසු සියලු සමාගම්වල ගනුදෙනු පිරිවැටුම් රු. මිලියන 100 මට්ටමින් පහළ පැවති ඒවායි.

සමස්තයක් ලෙස රු. බිලියන 15.01 ක පිරිවැටුමක් මෙම සතිය තුළ වාර්තා වුණු අතර එය පසුගිය සතියේ සමස්ත පිරිවැටුම වූ රු. බිලියන 20.88 හා සැසඳීමේ දී 28% ක පහළ යාමකි.

අද දින සියලු කොටස් මිල දර්ශකයේ හැසිරීමට එක්ස්පෝලංකා හෝල්ඩිංග්ස්, හේමාස් හෝල්ඩිංග්ස්, සම්පත් බැංකුව, HNB හා CDB යන සමාගම්වලින් ධනාත්මක දායකත්වයක් ලබා දී තිබුණු අතර LOLC හෝල්ඩිංග්ස්, හේලීස්, රෝයල් සෙරමික්ස්, බ්‍රවුන්ස් ඉන්වෙස්ට්මන්ට්ස් සහ LOLC ෆිනෑන්ස් යන සමාගම්වලින් සෘණාත්මක දායකත්වයක් ලබා දී තිබුණි.

 

 

 

 

 

The post සිව්වැනි දිනයටත් කොටස් වෙළෙඳපොළ පහළ යද්දී විදෙස් මිල දී ගැනීම් ඉහළ යයි appeared first on Adaderana Biz Sinhala | Sri Lanka Business News.