ශ්‍රී ලංකාවේ ආයෝජන වෙත පහසුකම් සැලසීම සඳහා සාර්ව ආර්ථික ස්ථායීතාවය සහ ස්ථාවර ප්‍රතිපත්ති රාමු ස්ථාපිත කිරීම සඳහා රජය දක්වන නොසැලෙන කැපවීම මත ජාත්‍යන්තර ආයෝජකයින්ගේ විශ්වාසය නැවත ස්ථාපනය වීම, නව ආයෝජන යෝජනා ලැබීමට හේතු වී ඇති බව ආයෝජන මණ්ඩලය අවධාරණය කරයි.
2025 ජුනි මාසය වන විට, නව ව්‍යාපෘති යෝජනා 40 ක් සහ දැනට පවතින ව්‍යාපාර පුළුල් කිරීම සඳහා යෝජනා 39 ක් ඇතුළුව ආයෝජන යෝජනා 79 ක් ශ්‍රී ලංකා ආයෝජන මණ්ඩලයට ලැබී ඇත. මෙම ආයෝජනවල මුළු ඇස්තමේන්තුගත වටිනාකම ඇමෙරිකානු ඩොලර් මිලියන 4,669ක් වන අතර, එයින් ඇමෙරිකානු ඩොලර් මිලියන 3,899ක් විදේශ ආයෝජන ලෙස සඳහන් වන අතර ඉතිරි ඇමෙරිකානු ඩොලර් මිලියන 770 දේශීය ආයෝජන ලෙස සඳහන් වේ. මෙය 2024 වසරේ අනුරූප කාලපරිච්ඡේදය තුළ ලැබුණු ආයෝජන යෝජනාවලට සාපේක්ෂව 18% ක වැඩිවීමක් පෙන්නුම් කරයි.
මෙම ආයෝජන යෝජනා පුළුල් පරාසයක විහිදෙන අංශ වලින් සහ ලොව පුරා විවිධ රටවලින් ලැබුනු යෝජනා වේ. මේවා, අපනයනය සඳහා වන ටයර් සහ ධාවන පථ, ඛනිජ සැකසුම් සහ ඇඟලුම් ආශ්‍රිත භාණ්ඩ ඇතුළු නිෂ්පාදන අංශයේ ව්‍යාපෘති සඳහා මෙන්ම බලශක්ති, සහාධිපත්‍ය මහල් නිවාස සහ මිශ්‍ර භාවිත සංවර්ධන ව්‍යාපෘති ඇතුළු දේපළ වෙළඳාම් ව්‍යාපෘති, හෝටල් ව්‍යාපෘති, කිරි ගව පාලනය, මුහුදු පැලෑටි සහ බෝග වගාව ඇතුළු කෘෂිකාර්මික ආශ්‍රිත ව්‍යාපෘති සඳහා ද වන අංශ වලින් සමන්විත වන අතර කැනඩාව, චීනය, ඉන්දියාව, සිංගප්පූරුව, ස්විට්සර්ලන්තය, චෙක් ජනරජය, ඔස්ට්‍රේලියාව, සෞදි අරාබිය, නෙදර්ලන්තය, දකුණු කොරියාව සහ තවත් රටවල් කිහිපයකින් ලැබුනු යෝජනා වේ.
දැනට පවතින ව්‍යාපාර වල මෙහෙයුම් පුළුල් කිරීම සඳහා කැපී පෙනෙන උනන්දුවක් දක්නට ඇති අතර, මෙම වසර තුල ලැබුනු ඇ.ඩො. මිලියන 4,669 ක සමස්ත ආයෝජන යෝජනාවලින් ඩොලර් මිලියන 322 ක ඇස්තමේන්තුගත ආයෝජන යෝජනා ව්‍යාපෘති පුළුල් කිරීම සඳහා වේ. විශේෂයෙන්ම, විදුලි සංදේශ අංශයේ සිටින ප්‍රධාන පෙලේ ව්‍යාපාර මෙම වසරේ පුළුල් කිරීමේ සැලසුම් ප්‍රකාශයට පත් කර ඇත. මීට අමතරව, තොරතුරු හා සන්නිවේදන තාක්ෂණය (ICT), ඇඟලුම් නිෂ්පාදනය, රබර් නිෂ්පාදන, වරාය සංවර්ධනය සහ මහල් නිවාස සංකීර්ණ ඉදිකිරීම සම්බන්ධ ව්‍යාපාර කිහිපයක් තම ව්‍යාපෘති පුළුල් කිරීම සඳහා අයදුම්පත් ඉදිරිපත් කර ඇත.
ආයෝජන මණ්ඩලය වෙත ලැබෙන සියලුම ආයෝජන යෝජනා, පුළුල් ඇගයීම් ක්‍රියාවලියකට යටත් වන අතර, අදාළ රේඛීය ආයතනවලින් නිෂ්කාශනය ලැබීමෙන් පසු ආයෝජන අනුමැතිය ලබා දෙනු ලැබේ. ඒ අනුව, 2025 ජනවාරි සිට ජූනි දක්වා කාලය තුළ, ආයෝජන මණ්ඩලය විසින් අලුත් ව්‍යාපෘති 28 ක් සහ පුළුල් කිරීමේ ව්‍යාපෘති 20 කින් සමන්විත ව්‍යාපෘති 48 ක් අනුමත කර ඇත. ඒවායේ සමස්ත ආයෝජන වටිනාකම ඇමරිකානු ඩොලර් මිලියන 499 කි. මෙය පෙර වසරේ අනුරූප කාලපරිච්ඡේදයට සාපේක්ෂව 28% ක වර්ධනයක් පෙන්නුම් කරයි. මෙම අනුමත ආයෝජන වාණිජකරණයෙන් පසු රැකියා අවස්ථා 10,000 ක් පමණ උත්පාදනය කිරීමට අපේක්ෂා කෙරේ.
ආයෝජන යෝජනා ලැබීමෙන් අනතුරුව, ඒවා හරහා රට තුලට ලැබුනු සෘජු විදේශ ආයෝජන (FDI) සහ දේශීය ආයෝජන අගයන් පිළිබඳ දත්ත රැස් කිරීම ද ආයෝජන මණ්ඩලය විසින් සිදු කරයි. ඒ අනුව, 2025 පළමු කාර්තුව තුළදී රටට ලබුණු සෘජු විදේශ ආයෝජන ප්‍රමාණය ඇමෙරිකානු ඩොලර් මිලියන 203ක් වූ අතර, එය 2024 පළමු කාර්තුවේදී වාර්තා වූ ඇමෙරිකානු ඩොලර් මිලියන 107ට සාපේක්ෂව 90%ක සැලකිය යුතු වර්ධනයක් සනිටුහන් කර ඇත. මෙම කාලසීමාව තුළ ලබා ගත් මුළු සෘජු විදේශ ආයෝජන ප්‍රමාණයෙන් 41% ක් වරාය සංවර්ධන අංශයට ද, 34%ක් නිෂ්පාදන අංශයට ද, 20% ක් තොරතුරු හා සන්නිවේදන තාක්ෂණය (ICT), කෘෂිකර්මය, දේපල සංවර්ධනය සහ විදුලි සංදේශ වැනි අංශ‍යන්ට ද ලැබී ඇත.
මීට අමතරව, එම කාලසීමාව තුළ සිදු කරන ලද දේශීය ආයෝජන ප්‍රමාණය ඇමෙරිකානු ඩොලර් මිලියන 87 දක්වා ළඟා වූ අතර, එය පෙර වසරේ පළමු කාර්තුවේ ඇමෙරිකානු ඩොලර් මිලියන 66 සිට 32% ක වැඩිවීමක් පෙන්නුම් කරයි.
සෘජු විදේශ ආයෝජන ගලා ඒම, දේශීය ආයෝජන, අපනයන ඉපැයීම් සහ රැකියා උත්පාදනය තුළින් ආයෝජන මණ්ඩල ව්‍යාපෘතීන් ශ්‍රී ලංකා ආර්ථිකයට සැලකිය යුතු දායකත්වයක් සපයයි. පවතින දත්ත වලට අනුව, ආයෝජන මණ්ඩලය යටතේ ඇති අපනයන-අභිමුඛ ව්‍යාපෘතීන් 2025 ජනවාරි සිට අප්‍රේල් දක්වා කාලය තුළ ඇමරිකානු ඩොලර් මිලියන 2,658 ක වෙළඳ භාණ්ඩ අපනයන වාර්තා කර ඇත. එය 2024 එම කාලය තුළ ඇමරිකානු ඩොලර් මිලියන 2,392 ට සාපේක්ෂව 7% ක වර්ධනයකි. මෙය ජාතික වෙළඳ භාණ්ඩ අපනයනයෙන් 59% ක් වන අතර, ජාතික කාර්මික අපනයනන්ගෙන් 73% ක් වේ.
ආයෝජකයින් තුල විශ්වාසය නැවත ඇති කිරීම මඟින් ශ්‍රී ලංකාව තුළ ආයෝජනය කිරීමට ආයෝජකයින්ගේ උනන්දුව සැලකිය යුතු ලෙස ඉහළ නැංවී ඇති අතර, එය මෙම වසර තුළ ආයෝජන මණ්ඩලය විසින් සත්කාරකත්වය සපයන ලද විදෙස් රට වලින් පැමිණි නියෝජිත කණ්ඩායම් සංඛ්‍යාවෙන් පිළිබිඹු වේ. විශේෂයෙන්, පළමු මාස හය තුළ පමණක්, ආයෝජන මණ්ඩලය විසින් ජපානය, ස්විට්සර්ලන්තය, එක්සත් රාජධානිය, ඉන්දියාව, චීනය, බංග්ලාදේශය, කොරියාව, එක්සත් අරාබි එමීර් රාජ්‍ය, නෙදර්ලන්තය, බහරේනය, තායිලන්තය, පකිස්ථානය සහ වියට්නාමය ඇතුළු රටවල් ගණනාවක නියෝජිත පිරිසකට සත්කාරකත්වය සැපයූ අතර, මෑත කාලීන ජර්මනි‍යේ සිදු කරන ලද රාජ්‍ය තාන්ත්‍රික සංචාරය හරහා පැමිණි ආයෝජකයින් සමඟ ද සාකච්ඡා ආරම්භ කරන ලදි.
මෙම ධනාත්මක ප්‍රවණතාවය ශ්‍රී ලංකාව තරඟකාරී ආයෝජන ගමනාන්තයක් ලෙස වර්ධනය කරමින් අයෝජකයන් තුල විශ්වාසය තහවුරු කරන අතර උපායමාර්ගික ආයෝජන පහසුකම හරහා තිරසාර ආර්ථික වර්ධනයක් ඇති කිරීම සඳහා ආයෝජන මණ්ඩලයෙහි ප්‍රධාන භූමිකාව පිළිබිඹු කරයි.
The post ස්ථාවර ආයෝජන වාතාවරණයක් තුල ශ්‍රී ලංකාවේ සෘජු විදේශ ආයෝජනවල කැපී පෙනෙන වර්ධනයක් – ශ්‍රී ලංකා ආයෝජන මණ්ඩලය appeared first on Adaderana Biz Sinhala | Sri Lanka Business News.
Source From biz.adaderana
Author: Biz Editor
#SriLanka #News #lka