මෙම ඩිජිටල් මාසය ශ්‍රී ලංකාව 2030 වන විට ඩිජිටල් ආර්ථිකයේ ඇමරිකානු ඩොලර් බිලියන 15 පමණ වටිනාකමක් ළඟා කිරීමට අරමුණු කරනගත් ජාතික අභිලාශයක් කරා යන ගමනට දැවැන්ත රුකුලක් වනු ඇත. මේ ඔස්සේ, TechFront Fortnight ඇතුළු වැඩසටහන් 100 කට වැඩි සංඛ්‍යාවක් දීප ව්‍යාප්තව සංවිධානය කර ඇති අතර, එමඟින් රාජ්‍ය නවෝත්පාදන සහ සියලු දෙනා ඇතුළත් ඩිජිටල් ආර්ථිකයක් කරා අප රට පරිවර්තනය කෙරෙනු ඇත.
මේ පිළිබඳ අදහස් දැක්වමින් ඩිජිටල් ආර්ථික නියෝජ්‍ය අමාත්‍ය ගරු (ඉංජිනේරු) එරංග වීරරත්න මහතා සඳහන් කළේ: “ශ්‍රී ලංකා TechFront Fortnight යනු හුදෙක් වැඩසටහන් මාලාවකට එහා ගිය දැවැන්ත කාර්‍යක්, එමෙන්ම, නවෝත්පාදනයන් දිරිගැන්වීමට, අපගේ තරුණ තරුණියන් බලගැන්වීමට සහ ඩිජිටල් යුගයට නායකත්වය දීම සඳහා ශ්‍රී ලංකාව සූදනම් බවට කලාපීය වශයෙන් පෙන්නුම් කිරීමට හැකියාව ලැබෙන ජාතික වේදිකාවකි. ඒ අනුව සහයෝගීතාවය, ආයෝජන සහ නිර්මාණශීලිත්වය තුළින්, කිසිවෙකු මඟනොහැරෙන සහ ශ්‍රී ලංකාවට ගෝලීය තලයේදී විශ්වාසයෙන් යුතුව තරඟවැදිය හැකි ඩිජිටල් අනාගතයක් ගොඩනගන්නට අප මේ ඔස්සේ කැපවෙන්නෙමු” යනුවෙනි.
TechFront Fortnight ප්‍රධාන වැඩසටහන් තුනක් කේන්ද්‍ර කරගනිමින් පැවැත්වේ. ඒ අනුව Disrupt Asia 2025 සැප්තැම්බර් 17 සිට 20 දක්වා කොළඹ දී පැවැත්වෙන අතර, එය ආරම්භක ව්‍යාපාර, ආයෝජකයින්, නවෝත්පාදන හා සංස්කෘතික විශේෂාංග එකට ගෙන එන ජාතික තාක්ෂණ උත්සවයක් ලෙස සංවිධානය කර තිබේ. ඒ අනුව;
සැප්තැම්බර් 17 – කොළඹ Cinnamon Life හි දී Venture Engine සම්මන්ත්‍රණය
ලංකා ඒන්ජල් නෙට්වර්ක් විසින් සංවිධානය කරන මෙම සම්මන්ත්‍රණයේදී, තේරීම් වට ගණනාවකින් පසු, අයදුම්පත් 130 කට වැඩි සංඛ්‍යාවකින් ආරම්භක සමාගම් 12 ක් තෝරාගෙන ඇති අතර ඔවුන්ට ශ්‍රී ලංකාවේ ප්‍රමුඛ සමාගම් හා කලාපීය ආයෝජකයින් ඉදිරියේ තම ව්‍යාපාර අදහස් ඉදිරිපත් කිරීමට අවස්ථාව ලැබෙන අතර, වටිනා ව්‍යාපාර අවස්ථාද ඔවුන්ට ලබා දෙනු ඇත.
සැප්තැම්බර් 18 –කොළඹ Cinnamon Life, – ප්‍රධාන සම්මන්ත්‍රණය සහ ආරම්භක ප්‍රදර්ශනය
ශ්‍රී ලංකා ආරම්භක පරිසරයේ ප්‍රමුඛ අවස්ථාවක් වන මෙම දිනය පුරා, දේශීය සහ ජාත්‍යන්තර ආයෝජකයින්ගේ සහභාගිත්වය යටතේ, ප්‍රධාන සටහන්, මූලික සැසි, පැනල් සාකච්ඡා සහ තෝරාගත් සමාගම් සමඟ සම්බන්ධ වීම සිදුවේ. මේ සඳහා ශ්‍රී ලංකාවේ ඉහළම ආරම්භක සමාගම් 30 ක් තම නිර්මාණයන් ඉදිරිපත් කරයි.
සැප්තැම්බර් 19 – TRACE, කොළඹ – නවෝත්පාදන උළෙල
50 කට වැඩි නවෝත්පාදන ආරම්භක ව්‍යාපාර සහ තාක්ෂණික කණ්ඩායම් රැසක් TRACE හිදී එක්වෙමින් පවත්වන අතර මෙම නවෝත්පාදන උත්සවය මහජනතාවට විවෘතව පැවැත්වේ. නොමිලේ පිවිසිය හැකි මෙම උත්සවය, සහභාගිවන්නන් 5,000 කට අධික සංඛ්‍යාවක් පැමිණෙනු ඇතැයි අපේක්ෂා කෙරේ.
සැප්තැම්බර් 20 – Mirissa, Asaya Sands – සංස්කෘතික සංදර්ශනය
ශ්‍රී ලංකාවේ නවෝත්පාදනය සහ නිර්මාණශීලිත්වය ගෝලීය ප්‍රේක්ෂකයින්ට අත්විඳීමට අවස්ථාව සලසන මෙම විශේෂ සංස්කෘතික සන්ධ්‍යාව මිරිස්ස Asaya Sands හිදී පැවැත්වේ. දේශීය වෙළඳ නාම සහ සංස්කෘතික උරුමයන් ඉදිරිපත් කෙරෙන මෙම අවස්ථාව පුරාවට මෙරට ආහාර ඉදිරිපත් කිරීම් රස බැලීම්, මැණික් ප්‍රදර්ශන සහ ශ්‍රී ලාංකික සංස්කෘතික අංග ඇතුළත් වේ. ඒ අනුව Disrupt Asia 2025 ශ්‍රී ලංකාවේ නවෝත්පාදන සහ නිර්මාණශීලිත්වය ගෝලීය තලයට ගෙන යාම සඳහා පළමු පියවර තබනු ඇත.
ඊට අමතරව Sri Lanka FinTech සමුළුව 2025 සැප්තැම්බර් 24 සහ 25 යන දිනවල කොලඹ BMICH හි දී පැවැත්වීමට නියමිත අතර, . “ශ්‍රී ලංකාවේ ඩිජිටල් ආර්ථිකය බලගැන්වීම: මූල්‍ය ඇතුළත් කිරීම සහ වර්ධනය මෙහෙයවන නවෝත්පාදනයන්” යන තේමාව යටතේ, දේශීය සහ ජාත්‍යන්තර නායකයන් සම්බන්ධ කරගනිමින්, Blockchain, AI, ඩිජිටල් මුදල්, නියාමන සහ ආයෝජන අවස්ථා පිළිබඳව වන විශේෂිත සාකච්ඡා සදහා මෙය වේදිකාවක් වනු ඇත. මෙම සමුළුවට පෙර Finnovation Lab 2025 ඔස්සේ විශ්වවිද්‍යාල සිසුන් 200 ක් සඳහා වැඩමුළු මඟින් දැනුම සහ අත්දැකීම් ලබා දී ඇති අතර , FinTech සමුළුව මඟින් නවෝත්පාදන සඳහා තරුණ පරපුර සූදානම් කෙරෙනු ඇත.
TechFront Fortnight හි අවසානය සනිටුහන් කරමින් ජාතික AI ප්‍රදර්ශනය සහ සමුළුව 2025 සැප්තැම්බර් 29 සහ 30 යන දිනවල දී කොළඹ Monarch Imperial හි දී පැවැත්වීමට නියමිතය. SLT-MOBITEL සහ ඩිජිටල් ආර්ථික අමාත්‍යාංශය එක්ව සංවිධානය කරන මෙම උත්සවය, AI භාවිතය සියලුම ආර්ථික අංශ වෙත ව්‍යාප්ත කිරීමට සහ සෞඛ්‍ය, අධ්‍යාපනය, කෘෂිකර්මාන්තය සහ මූල්‍ය ආදී ක්ෂේත්‍රවල AI යෙදුම් ඉදිරිපත් කිරීම, සජීවී නිරූපණ, වැඩමුළු සහ ප්‍රායෝගික ප්‍රදර්ශනයන්ගෙන් ද සමන්විත වේ. එසේම AI පර්යේෂණ සහ නවෝත්පාදන සඳහා SLT-MOBITEL විසින් AI අරමුදලක් සහ AI විශිෂ්ටතා මධ්‍යස්ථානයක් පිහිටුවීම ද සම්මන්ත්‍රණයට සමඟාමීව සිදු කෙරේ.
ඒ අනුව TechFront Fortnight 2025, ශ්‍රී ලංකාව ගෝලීය තලයේ විශ්වාසයෙන් තරඟ කිරීමට සහ ජනතාවට, කර්මාන්තයන්ට සහ තාක්ෂණය සම්බන්ධ ජාත්‍යන්තර ප්‍රජාවට සහයෝගීත්වයෙන් යුතුව නවෝත්පාදන අත්විඳීමට අවස්ථාව ලබා දෙන අතර ඩිජිටල් ආර්ථික අමාත්‍යාංශය ලෙස අප සියලුම පුරවැසියන් සහ කර්මාන්ත හිමියන් මෙන්ම නවෝත්පාදකයින් සඳහා මෙම ජාතික උත්සවයට සහභාගී වන ලෙස විවෘත ආරාධනයක් කරන්නෙමු.
The post ශ්‍රී ලංකා TechFront Fortnight 2025 – ශ්‍රී ලංකාවේ ඩිජිටල් අනාගතය හැඩගැස්වීමේ පළමු පියවර appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka